BRD yahaye umwihariko imishinga iteza imbere ibikorwa remezo mu Rwanda

Yanditswe na Cyprien Niyomwungeri
Kuya 2 Werurwe 2017 saa 06:47
Yasuwe :
1 0

Harabura igihe gito ngo u Rwanda rushyire umutemeri kuri gahunda zitandukanye z’iterambere, nk’Imbaturabukungu II, icyerekezo 2020 na gahunda ya Guverinoma y’imyaka irindwi zizasiga ubukungu bwarwo bwariyongereye n’imibereho y’Umunyarwanda ikarushaho kuba myiza.

Imwe mu nkingi mwikorezi izatuma rwesa iyi mihigo rukanakomereza mu cyerekezo 2050, ni iterambere ry’ibikorwaremezo no guhanga udushya, ariyo mpamvu Banki Itsura Amajyambere y’u Rwanda, BRD, yatangije ishami rishinzwe imishinga yihariye n’ibikorwaremezo (DSPI), ngo risembure ibyo byiciro by’ubukungu.

Mu myaka itanu iri imbere, BRD, irateganya gushora miliyoni 712 z’amadolari mu bikorwa bitandukanye biteza imbere ubukungu, bizinjiza nibura miliyari 1.6 z’amadolari mu gihugu bikanahanga imirimo 180 000.

Umuyobozi Mukuru w’ishami DSPI ryatangiye mu 2016, Regina Mukamusinga, asobanura ko ku bufatanye na Guverinoma n’abandi bafatanyabikorwa bazibanda ku gutera inkunga imishinga myiza igamije kwihutisha iterambere ry’ibikorwaremezo, cyangwa kugaragaza impinduka mu iterambere ry’ubukungu bw’Abanyarwanda.

Yagize ati “Inkunga ya DSPI izafasha ibikorwa remezo cyane cyane amasoko, inyubako z’ubucuruzi, imishinga yo mu rwego rw’ubuzima, ubwikorezi, ikoranabuhanga, amazi n’isukura ndetse n’indi mishinga Guverinoma ikeneramo ibigo by’imari ngo biyunganire.”

Mu mwaka umwe gusa iri shami ryatumye BRD irenga intego y’inguzanyo yari yiyemeje gutanga zingana na miliyari 15 Frw, itanga izibarirwa muri miliyari 28; aho mu mishinga y’inganda hashowemo miliyari 8.3 Frw, ubucuruzi n’amahoteli hashyirwamo miliyari 10.3 Frw, ubwikorezi n’ubwubatsi bishyirwamo miliyari 4.1 Frw, na serivisi zishorwamo miliyari 5.9 Frw.

Mukamusinga avuga ko uyu mwaka wa 2017, hazibandwa mu kongera ishoramari mu mishinga yo guteza imbere ibikorwa remezo mu Rwanda.

Yagize ati “Tumaze kugira imishinga tuzakora ikeneye gushorwamo imari, imyinshi ni minini twiteze ko izagira akamaro mu bukungu cyane cyane mu guhanga imirimo, kwinjiza imisoro no kongera ibikorwaremezo bigezweho. Dufite icyizere ko uko imyaka igenda ishira tuzatera inkunga imishinga myinshi izagira ingaruka nziza ku Banyarwanda.”

Imwe mu mishinga y’ingenzi yitezwe muri uyu mwaka ni isoko rya kijyambere rya Batsinda, inzu y’ubucuruzi ya Kinyinya, isoko rya Rusizi, inyubako ya Baho Clinic, gare y’imodoka ya Kabuga, inyubako y’ubucuruzi ya Koperative y’abamotari muri Rusizi n’iyindi.

Uyu mwaka kandi hazitabwaho imishinga y’abantu bishyize hamwe kuko imishinga yabo iba ifite ingufu kandi ikagirira akamaro abantu benshi.

BRD ikaba izabigeraho bitewe n’amasezerano y’ubufatanye yasinyanye n’abafatanyabikorwa batandukanye barimo Fonds de SolidariteAfricain (FSA), African Guarantee Fund (AGF), BDF n’abandi.

Umwaka wa 2016 ntuzibagirana

Mukamusinga avuga ko mu 2016, hahanzwe imirimo mishya 5,436 binyuze mu mishinga BRD yateye inkunga. 17,6% ni abakozi bahoraho, na ho 20% ni abagore. Iyo mishinga yitezweho kubyara miliyari 61.7 z’imisoro mu myaka 10 iri imbere zizatanga umusanzu ufatika mu iterambere ry’igihugu.

Muri uwo mwaka kandi BRD yateye inkunga umushinga wo kubaka isoko rya Kijyambere muri Nyamagabe, aho yatanze miliyari 1.073 Frw muri miliyari 1.6 Frw zaryubatse. Mu mujyi wa Kigali yatanze inguzanyo ya miliyari 5.4 Frw inyubako y’isoko rya kijyambere, Inkundamahoro, rigiye kuzura.

Yateye inkunga imishinga ine yo mu rwego rw’ubuzima ingana na miliyari 3.3 Frw, iyo mishinga ikazahanga imirimo 142 ihoraho n’indi 200 idahoraho. BRD kandi yatanze miliyari 4.1 Frw mu mishinga yo guteza imbere ubwikorezi bw’amakoperative n’abantu ku giti cyabo.

Umuyobozi Mukuru w’ishami DSPI ryatangiye mu 2016, Regina Mukamusinga, asobanura ko ku bufatanye na Guverinoma n’abandi bafatanyabikorwa bazibanda ku gutera inkunga imishinga myiza igamije kwihutisha iterambere ry’ibikorwaremezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244