BRD yahamije ko imaze gukemura ibibazo bya buruse kuri 95%

Yanditswe na Kanamugire Emmanuel
Kuya 18 Ukwakira 2016 saa 11:27
Yasuwe :
0 0

Mu gihe amafaranga y’inguzanyo ya buruse agenewe abanyeshuri bo muri kaminuza yajyaga abageraho anyuze mu nzira ndende kandi yanakererewe,ubu ngo asigaye abageraho mu gihe gito.

Ubuyobozi bwa Banki y’u Rwanda ishinzwe iterambere(BRD),bwatangarije abasenateri ko ibibazo byagaragaraga muri urwo rwego bimaze gukemuka ku kigero cya 95%.

Hari mu biganiro iyi Banki yagiranye na Komisiyo ya sena ishinzwe Imibereho Myiza y’Abaturage, Uburenganzira bwa Muntu n’Ibibazo by’Abaturage, mu cyumweru gishize.

Umuyobozi ushinzwe inguzanyo za buruse muri BRD, Fred Mugisha, yavuze ko inzira ndende zisaba imikono y’abantu bo mu nzego nyinshi zatumaga ayo mafaranga atagerera igihe ku banyeshuri, ariko ikibazo cyarimo bageze kure bagikemura.

Ati “Ibibazo tumaze kubikemura ku kigero cya 95%, ubungubu amafaranga ya buruse ahita agera kuri konti y’umunyeshuri. Mbere yagombaga guca kuri konti ya kaminuza ikaba ariyo iyashyira kuri konti y’umunyeshuri kandi yaciye mu zindi nzira nyinshi, ariko ubu ava muri BRD akajya kuri konti ye.”

Yongeyeho ati “Ndabivuga mbihamya, kuva muri Mutarama uyu mwaka kugeza uyu munsi, ibibazo byari birimo twari tumaze kubikemura, ku kigero kirenga 95% , iby’ubukererwe byararangiye.”

Mugisha avuga ko hari ‘utubazo’ duke tukigaragara muri urwo rwego bari mu nzira zo gukemura.

Ati “Utubazo duke tuba turimo ni nko ku bantu 10 cyangwa se 20. Ni umuntu usanga yanditse nka konti ye nabi, amafaranga yagenda akagaruka, turizera ko uyu mwaka urangira nta kibazo kizongera kubamo.”

Muri rusange ngo ibibazo byari bihari ni ibijyanye n’ubukerererwe byakunze kugaragara mu mitangire y’inguzanyo ya buruse, ari na byo BRD yihatiye gukemura kuva yahabwa inshingano zo gucunga inguzanyo ya buruse, ku buryo ngo abanyeshuri basigaye banayihabwa mbere.

Ati “ Kugeza uyu munsi tumaze gutanga buruse zo guhera mu kwezi kwa Cyenda kugeza mu kwa 12.”

Yavuze ko iyo nguzanyo ya buruse imaze guhabwa abanyeshuri ibihumbi 25, ariko ngo bagarukiwe n’amafaranga y’abantu 40 na bo ngo bagize ibibazo mu kwandika nabi konti zabo.

Ayo mafaranga angana n’ibihumbi 25 umunyeshuri ahabwa ku kwezi ari kumwe n’ikiguzi cy’uburezi, atangwa na leta, agahabwa BRD yahawe inshingano zo kuyacunga no kuyagaruza mu isanduku ya leta mu gihe abo yayagurije bayishyuye.

Mu minsi yashize yagiye atangwa mu buryo bwakemangwaga, ku buryo hari n’abamaraga igihe kirekire batabonye kugeza ubwo ikibazo bakigejeje kuri Perezida wa Repubulika.

Umuyobozi ushinzwe uburezi muri BRD, Fred Mugisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza