Kwamamaza

BRD igiye guhana abakoresha bananiwe kwishyuza abakozi bigiye ku nguzanyo ya Leta

Yanditswe kuya 5-10-2016 saa 18:42' na Cyprien Niyomwungeri


Banki itsura Amajyambere y’u Rwanda (BRD), yahaye abakoresha bose amezi atatu ngo babe bayishyikirije urutonde rw’abakozi babo babonye inguzanyo yo kwiga n’imyirondoro yabo kugira ngo batangire kwishyuzwa,bityo hanahanwe abatazabyubahiriza.

Mu Ukwakira umwaka ushize nibwo BRD yahawe inshingano zo gucunga no gutanga inguzanyo z’abanyeshuri biga mu mashuri makuru za Kaminuza, kwishyuza inguzanyo ya buruse ku barangije kwiga bari mu kazi no gufasha ababyeyi kuzigamira uburezi bw’abana babo.

Muri Werurwe uyu mwaka ubuyobozi bwa BRD bwatangaje ko mu mezi atatu gusa babashije kwishyuza miliyoni 198,221,758, muri miliyari eshatu na miliyoni 700 z’amafaranga y’u Rwanda yihaye nk’intego muri uyu mwaka.

Icyo gihe Umuyobozi wayo, Alexis Kanyankole yavuze ko bafite ingamba zirimo kuganira n’abakozi n’abakoresha, gutanga urutonde rw’abarimo imyenda mu bigo bakorera hifashishijwe amakuru y’ikigo cy’igihugu cy’ubwiteganyirize (RSSB) n’umushinga w’indangamuntu.

Yagize ati “Hazabaho kuganira na bo kuko twamaze kwegeranya amakuru yose. Abazinangira bazakurikiranwa nkuko amategeko abiteganya.”

Itangazo rya BRD, IGIHE ifitiye kopi riravuga ko mu mezi atatu abakoresha bazaba batarayishyikiriza urutonde rw’abakozi babo bigiye ku nguzanyo n’abakata amafaranga y’abakozi ntibayashyire kuri konti zayo bazahanwa nk’uko itegeko ribiteganya. Iri tangazo rireba abakoresha bo mu nzego za Leta n’izabikorera.

Ibihano bitegereje abakozi n’abakoresha baniniye ku nguzanyo ya buruse

Ingingo ya 22 mu itegeko rigenga inguzanyo na buruse bihabwa abanyeshuri, riteganya ko iyo umukoresha atamenyekanishije mu kigo cy‘imari umukozi we wahawe inguzanyo akimara guhabwa akazi, ahanishwa kwishyura buri kwezi k’ubukererwe ihazabu yo mu rwego rw’ubutegetsi ingana n’amafaranga icumi ku ijana (10%) y’inyugu y’amafaranga umukozi we yagombaga kuba yarishyuye.

Ivuga ko kandi umukoresha wamenyekanishije mu kigo cy‘imari umukozi we wahawe inguzanyo akanamenyeshwa ingano y’inguzanyo ye ariko ntakate ku mushahara we amafaranga agomba kwishyura, ahanishwa ihazabu yo mu rwego rw’ubutegetsi buri kwezi k’ubukererwe ingana n’icumi ku ijana (10%) y’amafaranga umukozi we yari kuba yarishyuye.

Umukoresha wamenyekanishije mu kigo cy‘imari umukozi we wahawe inguzanyo akanavana ku mushahara we amafaranga yo kwishyura inguzanyo ariko ntashyirwe kuri konti yabigenewe y’ikigo cy’imari, ahanishwa kwishyura buri kwezi k’ubukererwe ihazabu yo mu rwego rw’ubutegetsi ingana n’amafaranga makumyabiri ku ijana (20%) y‘inguzanyo umukozi we yari kuba yarishyuye.

Ingingo ya 23 y’iri tegeko iteganya ko iyo uwahawe inguzanyo yo kwiga atamenyesheje umukoresha we ko hari inguzanyo agomba kwishyura, ahanishwa kwishyura buri kwezi kw’ubukerwe inyungu z’ubukererwe zingana n’icumi ku ijana (10%) by’inguzanyo yagombaga kuba yarishyuye.

Kuva mu 1980 abigiye ku nguzanyo ya leta bose barishyuzwa umwenda ungana na miliyari 72 z’amafaranga y’u Rwanda. Umwaka ushize hishyujwe miliyari ebyiri gusa.

Uwahawe inguzanyo afite inshingano yo kuyishyura. Mu gihe kitarenze iminsi irindwi (7) atangiye akazi, uwahawe inguzanyo amenyesha mu nyandiko umukoresha we ko yigiye ku nguzanyo.

Umukozi yishyura amafaranga y’ikiguzi cy’uburezi wongeyeho ahabwa umunyeshuri ngo amutunge buri kwezi. Uwishyura inguzanyo akatwa 10% by’umushahara we mbumbe n’inyungu ya 11% by’ayo yishyura ku mwaka.

Kanyankore Alexis, Umuyobozi wa BRD

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved