BK na BDF batangije gahunda yo gukangurira amakoperative gukora imishinga bakiteza imbere

Yanditswe na IGIHE
Kuya 7 Ukuboza 2017 saa 07:57
Yasuwe :
0 0

Binyuze muri gahunda yiswe ‘Bigereho’, Banki ya Kigali yatangije gahunda yo gukangurira amakoperative gukorana nayo, BDF nayo isaba abafite imishinga isobanutse kuyigaba bagahabwa ingwate.

Ni ubukangurambaga bumaze amezi agera kuri ane dore ko bwatangiye tariki ya 25 Kanama 2017, bukaba buzarangira muri uku Ukuboza aho BK ikangurira abanyarwanda b’ingeri zitandukanye gukorana nayo kugira ngo biteze imbere.

Tariki ya 6 Ukuboza , BK yakomereje ubwo bukangurambaga mu makoperative atandukanye, ku ikubitiro ayo mu Turere dutanu akaba ariyo yahuriye i Kigali.

Umukozi ushinzwe kwamamaza muri Banki ya Kigali, Nshuti Thierry, yavuze ko iyi gahunda izarangira baganiriye n’abayobozi b’amakoperative yose yo muri buri Karere.

Yagize ati “Tumaze iminsi dufite gahunda yitwa ‘Bigereho’ irimo ibice bitandukanye, harimo igice kireba umuntu ushaka kuba umukiriya ku giti cye hamwe n’igice kireba amakoperative atandukanye. Uyu munsi rero twahurije hamwe abayobozi b’amakoperative yo mu turere dutanu aritwo Nyarugenge, Kicukiro, Gasabo, Kamonyi ndetse na Bugesera.”

Akomeza avuga ko iha abakiriya bayo inguzanyo, ugize ikibazo cy’ingwate afite umushinga, akaba yagana BDF ikamwishingira.

Yakomeje avuga ko mu gihe cy’amezi ane ubu bukangurambaga bumaze, abatari bake bamaze kugana BK.

Ati “Kuva iyi gahunda yatangira tariki 25 Kanama 2017, BK imaze kubona abakiliya bashya bafunguje konti bagera ku bihumbi 23, abagera ku bihumbi bitanu bakaba barongeye bagakoresha konti zabo bari bararetse. Mu gihe amafaranga asaga miliyari eshatu na miliyoni 500 amaze kunyura kuri izo konti.”

Biteganyijwe ko iyi gahunda izagera mu Ntara zose z’u Rwanda, BK ifatanyije na BDF bakazajya bahuriza hamwe amakoperative yo mu turere twegeranye bakagirana ibiganiro babungura ibitekerezo by’uburyo bakwiteza imbere.

Ushinzwe ibikorwa by’itumanaho muri BDF, Umugwaneza Carine, yavuze ko nta mpungenge y’ingwate abanyarwanda bakwiye kugira.

Ati “Twishingira umuntu hagati ya 70 na 75% by’inguzanyo ashaka, akabasha kubona inguzanyo. Dufite inkunga ihabwa abantu ku giti cyabo, baba bakoze imishinga myiza, hari igenewe abantu bari mu buhinzi n’ubworozi hamwe n’inkunga ihabwa urubyiruko rurangije kaminuza, aho BDF ibafasha ikabaha amafaranga bakoresha bakazagenda bishyura buhoro buhoro.”

Umuyobozi wa Koperative Mbahafi y’Abamotari ikorera mu Karere ka Nyarugenge, Ndayambaje Ndekezi Jean Pierre, yavuze ko kwitabira inama ihuriwemo na BK na BDF byamwunguye byinshi.

Ati “Bk ntabwo twumvaga ko ari banki y’abantu bose ahubwo twumvaga ari banki yo ku rwego rwo hejuru. Ariko kubera uburyo batuganirije bakadusobanurira imikorere yayo twasanze buri wese yatinyuka akayigana.”

Ndekezi avuga ko agiye gukangurira abanyamuryango ba koperative ayobora bagizwe n’umubare munini w’urubyiruko kugana BK bagakorana nayo udafite ingwate akagana BDF.

Nshuti Thierry Ushinzwe ibikorwa byo kwamamaza muri Banki ya Kigali
Abayobozi b'amakoperative atandukanye bitabiriye ibiganiro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza