00:00:00 IGIHE NETWORK KN KINYARWANDA EN ENGLISH FR FRANCAIS

Birara Aminadab wagizwe intwari mu Bisesero yashyiriweho urwibutso i Paris

Yanditswe na Karirima A. Ngarambe
Kuya 20 Ugushyingo 2021 saa 04:31
Yasuwe :
0 0

Birara Aminadab ufatwa nk’intwari yo mu Bisesero yashyiriweho urwibutso mu Mujyi wa Paris mu Bufaransa nk’ikimenyetso cy’umurava we mu gufasha abo bari kumwe guhangana n’Interahamwe zicaga Abatutsi bo muri aka gace mu 1994.

Bisesero ni agace kari gatuwemo n’Abatutsi benshi bivugwa ko bageraga ku 60.000, mu gihe cya Jenoside habereye amateka yo kwirwanaho kw’Abatutsi mu buryo bukomeye ku buryo bagejeje muri Gicurasi 1994 abicanyi batarabasha kubameneramo.

Barwanaga bari bayobowe na Birara Aminadab, umuhungu we Nzigira, Segikware, Habiyambere, Paul Bitega bose baje kwicwa. Icyo gihe hari abashoboye kurokoka barimo Karamaga Siméon [witabye Imana ku wa 21 Gicurasi 2020], Aron Gakoko na Vincent Munyaneza.

Ibitero byagabwe ku Banyabisesero nubwo babanje guhangana na byo bakoresheje intwaro gakondo ndetse n’amabuye, baje gucogora ndetse Interahamwe zibicamo benshi.

Mu guha agaciro umuhate w’Abanyabisesero, ku wa 19 Ugushyingo 2021, Inteko y’Umujyi wa Paris yarateranye ndetse abayigize bose bemeza ko hashyirwaho icyanya cyihariye kimwitirirwa mu gace ka 18ème arrondissement de Paris.

Umuyobozi wa IBUKA-France, Nsanzimana Etienne, yabwiye IGIHE ko iki cyemezo bacyakiriye neza kuko byerekana ukuntu bakomeje kubungabunga amateka ya Jenoside yakorewe Abatutsi

Ati “Ni uburyo buzatuma buri wese uzajya ahanyura azajya abona izina rya Birara, wabaye intwari mu Bisesero mu gihe cya Jenoside yakorewe Abatutsi. Icyo cyanya kizitirirwa Birara ariko hanashyirweho ibyerekeye ibyo yakoze.’’

IBUKA yishimiye icyemezo cy’Inteko y’Umujyi wa Paris iyobowe na Anne Hidalgo ku buryo akomeje kubaba hafi mu bijyanye n’amateka u Rwanda rwanyuzemo ya Jenoside yakorewe Abatutsi.

Cyafashwe nyuma y’uko muri Nyakanga 2021, Anne Hidalgo yari mu Rwanda aho yitabiriye Inama y’Inteko ya 41 y’Ihuriro ry’Imijyi ikoresha Igifaransa abereye umuyobozi.

Icyo gihe ku wa 20 Nyakanga 2021 yasuye Urwibutso rwa Jenoside rwa Kigali ruhereye ku gisozi n’urwa Nyanza ya Kicukiro, ashengurwa n’ubukana bwa Jenoside yakorewe Abatutsi ashingiye ku byo yabonye avuga ko azahora abizirikana iteka.

Urwo rugendo kandi rwakurikiye urwo Perezida Emmanuel Macron yagiriye mu Rwanda muri Gicurasi 2021, rwasize umubano w’u Rwanda n’u Bufaransa ugiye mu cyerekezo gishya nyuma y’imyaka birebana ay’ingwe ahanini kubera uruhare rwabwo muri Jenoside yahitanye Abatutsi miliyoni mu mezi atatu.

Mu Bufaransa hasanzwe hari inzibutso icyenda zashyiriweho kwibuka Jenoside yakorewe Abatutsi, hakaba hiyongereyeho icyanya kigari kizitirirwa Birara.

Izi nzibutso ziri mu duce twa Cluny, Dieulefit, Bègles, Châlette-sur-Loing, Toulouse, Paris, Garges-lès-Gonesse, Lutterbach na Strasbourg.

Yavuze ko kugeza ubu 18ème arrondissement de Paris, iyoborwa na Eric Lejoindre hagiye kuba ahantu Umunyarwanda cyangwa umunyamahanga utuye i Paris azajya afata imodoka, akerekeza muri ‘Place Birara Aminadab’, bitume hamenyekana ku ikarita y’Isi.

Biteganyijwe ko uru rwibutso rwashyiriweho Birara ruzatahwa mu ntangiriro za Mata umwaka utaha.

Yakomeje ati “Hagomba kubaho gushima no gutaha ku mugaragaro aha hantu hahawe u Rwanda n’abantu bose bumva kandi bashaka kumenyekanisha amateka [ya Jenoside yakorewe Abatutsi] ku buryo ibyabaye bitazongera kubaho ukundi.’’

Birara Aminadab yari ayoboye Abatutsi bo mu Bisesero ubwo bahanganaga n’Interahamwe. Yarabahuje batangira guhangana n’Interahamwe zashakaga kubatsemba.

Icyo gihe bahigishwaga uruhindu n’Interahamwe ariko bakirwanaho kugira ngo baticwamo benshi.

Bakoreshaga ibikoresho bari bafite aho abana n’abagore bateraga amabuye Interahamwe, abagabo bakazitera amacumu n’ibisongo ngo barebe ko barokora ubuzima bwabo.

Birara yarokotse ubwicanyi butandukanye kuva mu 1959, 1962, 1963 no mu 1973. Yishwe mu 1994 nyuma y’ukwezi we n’abandi Batutsi bahanganye n’Interahamwe zateye umusozi wa Bisesero.

Yabaye intwari kugeza yishwe na grenade yatewe n’abasirikare batumijwe n’uwahoze ari Perefe wa Perefegitura ya Kibuye, Kayishema Clément.

Yafatanyije n’uwahoze ari Burugumesitiri wa Komini Gisovu, Eliézer Niyitega mu gutegura Jenoside yibasiye Abatutsi muri Kibuye harimo n’abaguye mu Bisesero.

Urukiko Mpuzamahanga Mpanabyaha rwahamije Kayishema uruhare muri Jenoside yakorewe Abatutsi, rumukatira gufungwa burundu.

Senateri Havugimana yashimye Meya w’Umujyi wa Paris n’abo bafatanyije kuyobora ku cyemezo cyiza bafashe cyo gushaka ahantu bitirira intwari Aminadabu Birara, wagize uruhare rukomeye mu kuyobora abatutsi bari bahungiye mu Bisesero, birwanaho bahanganye n’ibitero bidasiba by’Interahamwe zashakaga kubamara.

Ubwicanyi bwo mu Bisesero bwaguyemo Abatutsi barenga 50.000 barimo na Birara wishwe ku wa 25 Kamena 1994 ubwo yari afite imyaka 68. Mu bari bahungiye kuri uyu musozi, abatagera ku 1.000 ni bo barokotse.

Ibuka France yahamagariye uturere two mu Bufaransa ndetse n’indi mijyi guha agaciro abazize Jenoside yakorewe Abatutsi binyuze mu gushyiraho ahantu ho kubibukira.

Kugeza ubu ibihugu bimaze gushyirwamo inzibutso birimo u Bufaransa, u Busuwisi, u Bubiligi, u Butaliyani, Canada n’ibindi byasabwe ko hashyirwaho ibikorwa by’inzibutso zo kwibuka Jenoside yakorewe Abatutsi.

Paris ni Umujyi usurwa buri mwaka na ba mukerarugengo baturutse mu mpande zose z’isi ndetse u Bufaransa buri mwaka bwakira ba mukerarugengo baruta ubwinshi abaturage bose b’u Bufaransa.

Abazagera aho icyanya cyitiriwe Aminadabu Birara giherereye, bizatuma babaririza uwo ari we, bityo batahe bamenye amateka yo kwirwanaho yaranze Abasesero mu mu 1959, 1961, 1963, 1973 na 1994.

Umuyobozi wa IBUKA-France, Nsanzimana Etienne, yabwiye IGIHE ko iki cyemezo bacyakiriye neza kuko gishimangira umubano mwiza w’u Rwanda n’u Bufaransa
Inteko y’Umujyi wa Paris yemeje ko hashyirwaho icyanya cyihariye mu gace ka 18ème arrondissement de Paris kimwitirirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .