Kwamamaza

Bimwe mu bigo by’abana bafite ubumuga ni nka "butike y’amata na fanta bikonje"-Bamporiki

Yanditswe kuya 27-10-2016 saa 12:27' na Philbert Hagengimana


Depite Bamporiki Edouard agereranya bimwe mu bigo by’abafite ubumuga bwo kudindira mu mikurire y’ubwenge nka butike zicuruza amata na fanta, bitewe n’uko ngo ababishinga baba batagamije gufasha abo bana nyir’izina, ahubwo baba bashyize imbere inyungu zabo bwite.

Ibi Depite Bamporiki yabivugiye mu kiganiro Komisiyo y’Ubumwe bw’Abanyarwanda, Uburenganzira bwa muntu no kurwanya Jenoside mu Nteko Ishinga Amategeko yagiranye na Minisiteri y’Uburinganire n’Iterambere ry’Umuryango, kuri gahunda za Leta ziteza imbere uburenganzira bw’umwana, cyabaye kuri uyu wa 27 Ukwakira 2016.

Agaruka ku bigo byakira imfubyi, Depite Bamporiki yatanze urugero rwa kimwe muri ibyo bigo basuye maze ngo babaza nyiracyo ko baramutse bagihaye Leta bakamuha ibindi akora yabyemera, abasubiza ko atarekura abo bana kuko ngo nta kundi yabaho.

Avuga ko agereranyije 95% by’abafite ibyo bigo, ngo baba bari gucuruza ibibazo by’abana, aho kubafasha nk’uko biba bisabwa.

Depite Bamporiki yavuze ko abo bana bafite ibibazo by’ubumuga bwo kudindira mu mikurire y’ubwenge, yabasuye bose, ati “Tuzenguruka bwa mbere, njye ibyo bigo byose nabigiyemo. Nk’uko Nyakubahwa Visi Perezida (Depite Mwiza Espérance) yabivuze, njye njanishije nsanga 95% abantu bakora business (ubucuruzi) mu bibazo by’abana.”

Depite Bamporiki yakomeje atanga n’ingero za bimwe mu bigo, agira ati “Hari ikigo kiri i Nyamirambo, twahasanze umukecuru, njye ndamubwira nti ‘aba bana Leta iramutse ishyizeho ingengo y’imari wabaduha tukabakorera ibyo bagomba gukorerwa bakeneye nk’abantu ko tubona mwe ntacyo mubamariye?’ Aradutsembera ati ‘aba bana nabarekura nkabaho nte?’ Noneho ukabona afite impuhwe zihishe inyuma y’ikibazo ariko mu by’ukuri wacukumbura ugasanga ni ubucuruzi bakora.”

Akomeza avuga ko muri ako gace ku muhanda ugana Nyabugogo, hari ikindi kigo yagereranyije na butike, ati “Ni butike iri ku muhanda kumwe utubutike twa fanta ikonje n’amata, […] muvayo bakabanura(bakahabakura) kuko ntibashobora kuhirirwa, ni akantu k’akabutike, nari nzi ko kafunzwe ariko kugeza ubu namenye ko katarafungwa.”

Yakomeje atanga igitekerezo cy’uko Minisiteri yashyiraho urugero fatizo rw’ibigo bifata abana bafite ubumuga bumeze butyo, asaba ko amafaranga asaga miliyoni 40 asaranganywa ibigo byinshi bikora bityo kandi ugasanga yabaye iyanga, hashyizweho ibigo bibiri bikajya biba ari byo biyahabwa, byarushaho kugira akamaro.

Minisitiri w’Uburinganire n’Iterambere ry’Umuryango, Nyirasafari Espérance yemereye Abadepite ko hari ibigo bimeze nka Butike, anizeza kugira igikorwa mu buryo bwihuse.

Ati “Nanjye ndemera ibyo mwavuze, ibi bigo by’i Nyamirambo mwasuye, izo butike rwose ndumva dukwiye kugira icyo dukora cyihutirwa, kuko ntabwo abo bana bakwiriye gukomeza kwicwa kurutaho, kuko bafite ubumuga, bakwiriye kwitabwaho byihariye.”

Itegeko Nshinga ry’u Rwanda rigaragaza ko umuryango ari ryo shingiro rya sosiyete nyarwanda, bityo ko umwana wese afite uburenganzira bwose bwo kwitabwaho n’umuryango we, Abanyarwanda ndetse n’igihugu muri rusange kugira ngo abashe kubaho neza.

Guverinoma y’ u Rwanda yashyizeho amategeko, politiki na gahunda zigamije guteza imbere uburenganzira bw’umwana, ndetse mu 2012, abana 2323 bashyizwe mu bigo by’imfubyi 33 byo mu turere 19 tw’igihugu.

Muri Nzeri uyu mwaka, abana 2288 bakuwe mu bigo by’imfubyi byari byarabakiriye basubizwa mu miryango bavukamo.

Ubushakashatsi bwerekana ko 70% by’abana barererwa mu bigo by’imfubyi baba bafite umubyeyi umwe cyangwa bombi cyangwa se abo mu muryango wabo.

Depite Bamporiki (uwa gatatu iburyo) avuga ko ibigo byinshi by’imfubyi biba bigamije gucuruza ibibazo byabo aho kubafasha
Minisitiri Nyirasafari (hagati) avuga ko Leta igerageza gukemura ibibazo by'abana ishyiraho gahunda zigamije kubarengera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved