Bidasubirwaho Maroc yasabye kugaruka mu Muryango wa Afurika Yunze Ubumwe

Yanditswe na Philbert Girinema
Kuya 24 Nzeri 2016 saa 11:58
Yasuwe :
0 0

Mu buryo bwemewe n’amategeko Maroc yatanze ubusabe bwo kugaruka mu Muryango wa Afurika Yunze Ubumwe, AU, yavuyemo mu myaka 32 ishize.

Ukugaruka kwa Maroc muri uyu muryango ntikwaganiriwe n’abakuru b’ibihugu mu nama yawo iheruka kubera i Kigali, gusa ibaruwa yoherejwe n’Umwami wa Maroc, Mohammed VI, muri iyo nama yacaga amarenga ko ari icyifuzo iki gihugu gifite.

Kuwa Kane w’iki cyumweru Umujyanama w’Umwami Mohammed VI mu by’Ububanyi n’Amahnaga Taieb Fassi Fihri, yahuriye n’Umuyobozi wa Komisiyo ya AU, Dr. Nkosazana Dlamini Zuma, mu nama ya 71 y’Inteko Rusange y’Umuryango w’Abibumbye amushyikiriza kopi y’ibaruwa isaba gusubira muri AU.

Nkuko AU ubitangaza, Taieb Fassi, yamenyesheje Dr.Dlamini ko bamazze gutanga urwandiko rusaba kugaruka mu Muryango ku cyicaro cyawo i Addis Ababa muri Ethiopia, aboneraho no kumushyikiriza kopi y’urwo rwandiko.

Dr.Dlamini yavuze ko hazakurikizwa ibiteganyijwe birimo kubanza kubimenyesha ibihugu byose bigize AU, hanyuma igihugu cya Maroc kikamenyeshwa umwanzuro.

Maroc yavuye muri AU mu 1984 nyuma yo kurakazwa n’uko uwahoze ari OUA wemeje agace ka Sahrawi Arab Democratic Republic, kahoze kometse kuri iki gihugu nk’umunyamuryango wawo kandi katigenga katanemewe n’Umuryango w’Abibumbye nk’igihugu.

Kwakirwa kw’aka gace muri OUA kwashyigikiwe bikomeye na Algeria na Libyia yayoborwaga na Col. Muammar Gaddafi wari ufite ijambo rikomeye muri uwo muryango Maroc ivuga ko wari utaragira ubunararibonye.

Umwami Mohammed VI mu ibaruwa ye yabwiye abakuru b’ibihugu ko igihe kigeze ngo Afurika itere umugongo ibiyisubiza inyuma, yite ku iterambere rirambye ry’abayituye aho gukomeza “kwikorera umuzigo w’ikosa ry’amateka”.

Maroc ishobora kugaruka muri AU ibisikana na Sahrawi Arab Democratic Republic, isohoka kuko kugeza ubu ibihugu 28 byo muri AU byamaze gusinya ku nyandiko isaba ko iki gihugu cyakurwa muri uwo muryango, icyakora iki cyemezo kikazanyura mu matora ya kamarampaka.

Dr.Dlamini Zuma na Taieb Fassi Fihri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza