Benshi bazi imbaraga ze z’igisirikare ariko yagaragaje iz’umutima -Kizito Mihigo ashima Perezida Kagame

Yanditswe na Mathias Hitimana
Kuya 15 Nzeri 2018 saa 12:51
Yasuwe :
0 0

Umuhanzi Kizito Mihigo yasohotse muri gereza ya Nyarugenge, ashimira byimazeyo imbabazi yahawe na Perezida Kagame, anagaragaza ko yari amwizeye cyane ko azazimugirira kurenza uko abantu babitekereza.

Mu gitondo cyo kuwa Gatandatu nibwo Kizito Mihigo yafunguwe nyuma y’imbabazi yahawe na Perezida Kagame nk’uko byatangajwe mu byemezo by’Inama y’Abaminisitiri yo ku wa 14 Nzeri 2018.

Akigera hanze, Kizito Mihigo yabwiye itangazamakuru ryari rimutegereje, ko mu rubanza rwe yemeye icyaha, aho kuburana agahitamo gutakamba, asaba imbabazi kuko yari yizeye ko Umukuru w’igihugu azazimuha.

Yababariwe yarakatiwe igifungo cy’imyaka 10 n’Urukiko Rukuru mu 2015, aza guhagarika ubujurire yari yatanze mu Rukiko rw’Ikirenga muri uku kwezi.

Mihigo yemeje ko mu gusaba imbabazi yari afite icyizere ko azazihabwa, kuko azi neza ko Perezida Kagame ari umunyembabazi.

Yagize ati “Ndashimira Perezida wa Repubulika wambabariye. Iki cyemezo kigaragaza imbaraga ze z’umutima. Wenda benshi bazi imbaraga ze z’igisirikare ariko yagaragaje iz’umutima. Ni icyemezo kigiye kungirira akamaro ku buzima bwanjye bwite ariko no ku gihugu”.

Imbaraga z’igisirikare za Perezida Kagame zizwi mu kuba yarayoboye urugamba rwo kubohora igihugu no guhagarika Jenoside yakorewe Abatutsi mu 1994.

Imbabazi Kizito yahawe, yishimira ko agiye gusubira mu muryango nawe agashinga urugo.

Kizito Mihigo yavuze ko agiye gukomeza akazi yitangiye akiri muto ko gutanga ubutumwa bw’amahoro, ubumwe, ubwiyunge, imbabazi, ubutagoma ubworoherane mu Banyarwanda.

Yashimangiye ko ako kazi azagakomereza mu Muryango we ‘KMP’ afatanyije na Leta. Yizeye ko kuba ababariwe, hazaboneka n’ubwiyunge n’ubuyobozi kuko ibyaha yari yarahamijwe ari ibiburwanya.

Kizito Mihigo mu gukomeza ubuhanzi

Kizito Mihigo yashimangiye ko agiye gukomeza impano ye y’ubuhanzi, azwiho cyane n’Abanyarwanda basanzwe ndetse n’abayoboke ba Kiliziya Gatolika yarerewemo.

Yagize ati “Ubuhanzi ni impano kandi tutiha duhabwa n’Imana. Birumvikana ko ntashobora kureka kuririmba, kandi buri gihe iyo ndirimbye ikinzamo bwa mbere ni ukuririmba amahoro, ni ukuririmba ubwiyunge.”

Yakomeje avuga ko atazibagirwa kuririmba indirimbo zo gusingiza Imana kuko ishingiro rya byose ni umukirisitu.

Kizito Mihigo yizeye ko aziyunga na leta, bagakorana nk’uko ibyigisha Abanyarwanda nyuma ya Jenoside, kandi nawe yibutsa ko yayifashaga.

Agira indirimbo nyinshi mu kiliziya n’izindi nyinshi zakoreshwaga mu bihe byo kwibuka Jenoside yakorewe Abatutsi. Nyuma y’ifungwa rye, ibihangano bye ntibyari bigikoreshwa nubwo nta cyemezo kibihagarika kigeze gisohoka.

Uretse Kizito Mihigo, Ingabire Victoire Umuhoza nawe ibyishimo byari byose ku mbabazi yahawe.

Perezida wa Repubulika Paul Kagame yababariye abagorowa 2140 bari bujuje ibiteganywa n’amategeko.

Kizito Mihigo yashimye imbabazi yagiriwe na Perezida Kagame ashimangira ko amuzi ko ari umunyembabazi

[email protected]

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza