BBOXX yiyemeje kurushaho kunoza serivisi isanga abakiliya aho batuye

Yanditswe na Ishimwe Israel
Kuya 13 Ukwakira 2016 saa 11:30
Yasuwe :
0 0

Mu rwego rwo kurushaho kunoza serivisi zihabwa abakiliya, Sosiyete BBOXX itanga imirasire y’izuba yihaye intego yo kurushaho kubegera no kumva ibibazo bafite ibasanze aho batuye.

BBoxx itanga imirasire y’izuba n’amatara acagingwa ku buryo bworoshye, n’ibindi bikoresho birimo televiziyo na radio bitwara umuriro muke; yibanda ku bantu badafite umuriro w’amashanyarazi cyane cyane abatuye mu cyaro.

Mu kiganiro na IGIHE, Umuyobozi w’ishami rishinzwe kwita ku bakiriya muri BBOXX, Joane Kayibanda yavuze ko bafite nimero abakiliya bahamagara ku buntu bagahabwa ubufasha byaba ngombwa bakoherezwa ku maduka ari hirya no hino mu gihugu.

Ati “Nk’uko baduhamagara natwe turabahamagara. Tureba umubare w’abakiliya dufite, uko biyongera ni nako twongera umubare w’abakozi bashinzwe kubakira.”

Yakomeje avuga ko kandi mu cyumweru cyahariwe kwakira abakiliya, bagiye bahamagara abakiliya bamaranye n’abo igihe kirekire kugira ngo babashimire.

Ati “Kimwe mu bintu turi kurushaho gushyiramo imbaraga ni ukugenda dusura abakiliya bacu kugira ngo tumenye ibibazo bagenda bahura nabyo. Turashaka kuzagira icyumweru cyahariwe abakiliya ba BBOXX aho tuzagenda mu gihugu hose aho dufite abakiliya, kugira ngo tubatege amatwi bitari uguhamagara ku cyicaro(call center).”

Kayibanda uhagarariye itsinda ry’abantu barenga 20, avuga ko iteka abwira abo ayoboye ko bagomba kwakira neza ababagana n’umutima mwiza.

Ati “Kwakira neza abakugana ni ikintu gihera muri wowe. Inama natanga n’uko Abanyarwanda dukwiye kwiga kwakirana abantu urugwiro, uko twifuza kwakirwa niko twagakwiye kwakira abatugana.”

BBOXX ni sosiyete ikomoka mu Bwongereza, yatangiye gukorera mu Rwanda muri Mata 2014; imaze kugeza imirasire y’izuba ku ngo ibihumbi 10 ziri hirya no hino mu gihugu.

Ubuyobozi bwa BBOXX Rwanda buvuga ko intego ari uko 2017 yazarangira bamaze kugira ingo ibihumbi 100 ziyongera kuzo basanzwe bacanira.

Leta y’u Rwanda yihaye intego y’uko umwaka wa 2018 uzarangira abanyarwanda 70% bagerwaho n’ingufu z’amashanyarazi.

Muri rusange, ingufu z’amashanyarazi aturuka ku mirasire y’izuba zari mu ngo zingana n’ibihumbi 47, amashuri 260, n’amavuriro 163 mu gihugu hose. Uyu mwaka biteganyijwe ko uyu mubare uzagera ku ngo ibihumbi 255.

Umuyobozi w'ishami rishinzwe kwita ku bakiliya muri BBOXX, Kayibanda Joane avuga ko bafite gahunda yo kurushaho kwegera abakiriya
Abakozi ba BBOXX begera abakiliya bakumva ibibazo bahura nabyo
Batiri ijyana n'umurasire utangwa na BBOXX
Umurasire w'izuba utangwa na BBOXX

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza