Kwamamaza

Bayobore cyangwa baveho - Minisitiri w’Intebe atunga agatoki Meya wa Musanze

Yanditswe kuya 10-09-2016 saa 11:29' na Cyprien Niyomwungeri


Minisitiri w’Intebe, Anastase Murekezi, yatangaje ko impamvu Akarere ka Musanze kaje ku mwanya wa nyuma mu kwesa imihigo ya 2015/2016 n’amanota 70.37%, ari uko nyobozi yananiwe kuyobora abakozi, asaba ko bihinduka cyangwa ikavaho.

Mu muhango wo kwesa imihigo ya 2015/2016 no gusinya iya 2016/2017, Minisitiri w’Intebe Murekezi yagaragarije Perezida wa Repubulika uko uturere twakurikiranye mu kuyesa, aka Gasabo kaza ku isonga na ho Musanze iba iya nyuma.

Minisitiri w’Intebe yavuze ko mu mpamvu zituma uturere tuza inyuma harimo imikoranire itanoze hagati ya nyobozi, njyanama n’abakozi b’Akarere ndetse no hagati y’abayobozi b’Akarere n’abafatanyabikorwa babo.

Yatunze agatoki Umuyobozi w’Akarere ka Musanze, Musabyimana Jean Claude, kutayobora abakozi be bigatuma bikorera ibyo bashatse, yizeza Umukuru w’Igihugu impinduka kuri iki kibazo.

Yagize ati “Muri Musanze iba iya nyuma, hari ikibazo gikomeye cyane abakozi barigenga, meya se kuki utayobora abakozi bawe?Abakozi barakora ibyo bashaka nibo bayobozi nk’uko bari barabimenyereye kuva mbere, ntabwo ari byo, nyobozi igomba kuyobora rwose, bibe Nyakubahwa Perezida wa Repubulika, bayobore cyangwa baveho twikomereze.”

Yagarutse no ku Karere ka Kicukiro, avuga ko naho nyobozi idafite umurongo w’ubumwe mu miyoborere.

Umuyobozi w’Akarere ka Musanze, Musabyimana Jean Claude, yemera ko iki kibazo gihari kandi batangiye kukivugutira umuti binyuze mu masuzuma bakorera abakozi.

Yagize ati “Ni ikibazo tuzakomeza gusuzuma tukareba impamvu hari abakozi bameze gutyo. Abakozi hari uburyo bajyaho turakomeza gukurikirana ko bakora neza. Ikintu dukora hari abo twari twaragiye dukorera amasuzuma byari biri no mu nzira zo kuvugururwa, nkaba ntekereza ko ayo mavugururwa turakomeza kuyashyiramo imbaraga kugira ngo umuntu waba akora ibyo atagomba gukora akosorwe ndetse n’ibidakorwa uko bikwiye bikosorwe.”

Akomeza avuga ko impamvu yatumye akarere ayobora kaza ku mwanya wa nyuma ari ibikorwa byinshi bafatanyamo n’abandi bitagiye birangira, bakaba bagiye kwisuzuma bagakosora amakosa yose kugira ngo ubutaha ntibizongere.

Minisitiri w’Intebe Murekezi yagaragaje ko izindi mpamvu zituma uturere tuza mu myanya ya nyuma ari ugutinda kwishyura ba rwiyemezamirimo, bifitanye isano na ruswa, no guhiga imihigo yoroshye itagaragaza iterambere.

Uturere twa Huye, Nyanza, Gasabo, Nyamagabe na Muhanga tumaze kuza mu myanya ya mbere 10 mu myaka ibiri ikurikirana, na ho Nyabihu, Musanze, Rutsiro, Gakenke, Karongi na Ruhango tukagaragara mu myanya ya nyuma kenshi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved