00:00:00 IGIHE NETWORK KN KINYARWANDA EN ENGLISH FR FRANCAIS

Batatu muri 24 baherutse gufatirwa muri ‘Kitchen Party’ i Musanze basanganywe COVID-19

Yanditswe na Claude Bazatsinda
Kuya 13 Nyakanga 2021 saa 12:52
Yasuwe :
0 0

Polisi y’Igihugu yatangaje ko mu bantu 24 baherutse gufatirwa mu rugo rw’umuturanyi wabo bari mu gikorwa cyo gutera inkunga umukobwa witegura ubukwe muri Kanama uyu mwaka, harimo batatu basanganywe ubwandu bwa Coronavirus.

Ibi birori bya ‘Kitchen Party’ byabaye ku wa 11 Nyakanga 2021, aho aba bantu bose bafatiwe mu rugo rwa Nyiramafaranga Epiphanie w’imyaka 52, mu Mudugudu wa Kabudundu, Akagari ka Kivugiza mu Murenge wa Muko, Akarere ka Musanze.

Uretse kuba bose bari barenze ku mabwiriza bagakora ibirori kandi bitemewe, Abapolisi basanze bamwe bari hanze abandi bari mu nzu kandi begeranye ndetse bamwe muri bo batambaye udupfukamunwa.

Bamaze gufatwa bavuze ko ibyo bakoze babitewe n’ubujiji bwo kutamenya amabwiriza yo kurwanya Covid-19 ndetse n’amarangamutima yo gushaka gushyigikira umukobwa w’inshuti yabo Nyiramafaranga Epiphanie.

Nyuma yo gufata aba bantu uko ari 24 bajyanywe mu kato i Nkumba bapimwa icyorezo cya COVID-19, ibisubizo biza byemeza ko batatu muri bo banduye COVID-19. Muri bo harimo na nyir’urugo ari we Nyiramafaranga Epiphanie w’imyaka 52 ari na we wari watumiye bariya bantu bose.

Umuvugizi wa Polisi y’u Rwanda, CP John Bosco Kabera yavuze ko Abanyarwanda bakwiye kubona ko imibare y’abandura n’abahitanwa na COVID-19 bikomeje kwiyongera, kandi imyitwarire nk’iyi yo guhura mu birori iri mu byongera ubwandu.

Yakomeje agira ati “Birababaje ko kugeza ubu hari abatabyumva bakarenga ku mabwiriza nkana. Nyamuneka aya mabwiriza twese tuyakurikize!”

Ubwo bafatwaga, Nyiramafaranga yavuze ko yari yatumiye abantu bakeya atazi ko bari buze ari benshi bene ako kageni.

Ati” Bariya bantu ni inshuti zanjye zashakaga kumfasha gushyingira umukobwa wanjye, natunguwe no kubona haza abangana kuriya nari natumiye bakeya. Twakoze amakosa ariko ntabwo tuzongera kandi ndanakangurira n’abandi kujya birinda kurenga ku mabwiriza aba yatanzwe.”

Umuyobozi wa Polisi mu Karere ka Musanze, SSP Kanobayire Jean Pierre, yavuze ko usibye no kuba bariya bantu bararenze ku mabwiriza yo kurwanya ikwirakwira ry’icyorezo cya COVID-19, amabwiriza ahagarika ibirori n’amakoraniro muri ibi bihe, bariya bantu nta bwirinzi na buke bari bafite kuko bari bateraniye mu cyumba cy’uruganiriro begeranye cyane.

SSP Kanobayire yakomeje ashimira abaturage batanze amakuru akangurira abaturage muri rusange kubahiriza amabwiriza yo kwirinda Covid-19 kandi bakabikora badakorera ku jisho bacungana n’inzego z’ubuyobozi.

Yabibukije ko ayo makoraniro ari yo ashobora kubakururira ibibazo byo kwandura cyangwa bakanduzanya iki cyorezo kigakomeza kwiyongera, asaba abaturage gukomeza ubufatanye na Polisi n’izindi nzego muri uru rugamba rwo kurwanya icyorezo cya COVID-19.

Abagore batatu muri 24 baherutse gufatirwa mu birori byo kuremera mugenzi wabo wari ugiye gushyingirwa basanganywe COVID-19
Nyiramafaranga Epiphanie ni umwe mu basanzwemo ubwandu bwa COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .