Batatu mu maboko ya Polisi bazira kwinjiza toni ndwi za magendu y’imyenda ya caguwa

Yanditswe na Kanamugire Emmanuel
Kuya 30 Ugushyingo 2016 saa 01:53
Yasuwe : XX
0

Nyuma yo gufata toni zisaga zirindwi z’imyenda ya caguwa ifite agaciro k’asaga 5000 by’amadolari, yinjijwe mu Rwanda mu buryo bwa magendu, Polisi y’u Rwanda n’Ikigo cy’igihugu gishinzwe imisoro n’amahoro (RRA) bamaze gufata abantu batatu.

Umukwabo udasanzwe wa RRA ifatanyije na Polisi y’igihugu, umaze gufatirwamo Toni zisaga zirindwi z’imyenda ya caguwa, yinjijwe iva i Goma muri Repubulika Iharanira Demukarasi ya Congo, ije gucururizwa i Kigali.

Nisingizwe Conolate, umwe mu bafatanywe iyo Caguwa ya magendu, yabwiye itangazamakuru ko yafatanywe ‘amabaro’ 29, ubwo yarimo yerekeza i Kigali avuye i Rubavu.

Ati “Nari mpakiye amabaro 29, arimo 10 yishyuriwe imisoro, n’andi 19 ya magendu.”
Akomeza asobanura ko mu mabaro yafatanywe hari harimo zimwe zirangura amadolari 80 n’izindi zirangura amadolari 120, izidasoreye akaba yarakoranye n’Umunyecongo wamwambukirije ayo mabaro 19.

Munyampeta Joseph, usanzwe acururiza imyenda ya Caguwa mu Mujyi wa Kigali, yemera ko imyenda ya Caguwa acuruza harimo iya magendu, agasobanura ko yabitewe no kuba yararanguraga akishyura imisoro ariko akabona ntiyunguka.

Aha ni ho havuye igitekerezo cyo kujya asorera bimwe ibindi ‘bakabimucorera’ ngo bize gucungura ibindi byemewe n’amategeko, kandi ngo ibyo si umwihariko we gusa, kuko abacuruza nka we bose ni ko babigenza.

Yagize ati “Bamfatiye mu isoko ku Gisozi, bambwira ko nazanye ibaro zivuye muri Congo zidafite ibyangombwa. Ndabyemera, hari izasoze n’izitarishyuriwe imisoro. Nagiye kurangura i Goma, nzana zimwe zisoreye, ndazicuruza mbona amafaranga ntavamo.”

Munyampeta yafatanywe amabaro 59 y’imyenda ya Caguwa, apima toni ebyiri n’igice, we akemera ko iya magendu ari 19 gusa n’ubwo andi 40 asigaye aterekana ibyangombwa yasoreweho.

Kugeza ubu hamaze gufatwa toni zisaga zirindwi z’imyenda ya caguwa, RRA na Polisi y’u Rwanda bakaba bakomeje iperereza mu rwego rwo gucyaha abinjiza magendu mu Rwanda bakamunga ubukungu bw’igihugu.

Umuyobozi w’ishami rishinzwe kurwanya magendu muri RRA, Mugabe Robert yatangaje ko ibicuruzwa bya magendu nk’ibyo bigira uruhare mu kumunga ubukungu bw’igihugu.

Ati “Iyo winjije ibicuruzwa bidasoze, hari icyo uba ugomwa igihegu n’abanyarwanda, niba ucuruza uba ugomba gusora. Iyo utasoze rero ibyo igihugu kiba kigomba kwinjiza mu msioro ntikiboneka, ikindi wica isoko kuko utasoze araza akishyiriraho ibiciro yishakiye. Ibyo rero urumva ko atari ibintu byiza.”

Umuvugizi wa Polisi mu Mujyi wa Kigali, SP Emmanuel Hitayezu yatangaje ko muri izi mpera z’umwaka hakajijwe ingamba n’imikwabo mu rwego rwo gucyaha abanyereza imisoro, ari na rwo rwego abo batatu bamaze gufatwa ariko iperereza rikaba rigikomeje.

Ingingo ya 369 y’Igitabo cy’amategeko ahana ibyaha mu Rwanda iteganya ko umuntu wese unyereza imisoro, ahanishwa igifungo kuva ku mezi atandatu kugeza ku myaka ibiri, n’ihazabu ingana n’imisoro yanyereje, cyangwa kimwe muri byo.

Umuyobozi w’ishami rishinzwe kurwanya magendu muri RRA, Mugabe Robert yatangaje ko ibicuruzwa bya magendu nk’ibyo bigira uruhare mu kumunga ubukungu bw’igihugu
Umuvugizi wa Polisi mu Mujyi wa Kigali, SP Emmanuel Hitayezu yatangaje ko muri izi mpera z’umwaka hakajijwe ingamba n’imikwabo mu rwego rwo gucyaha abanyereza imisoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza