Batanu bakekwaho ibyaha by’iterabwoba bagejejwe imbere y’Urukiko rwa Gasabo

Yanditswe na Ishimwe Israel
Kuya 27 Nzeri 2016 saa 02:35
Yasuwe :
0 0

Abanyarwanda batanu bakekwaho ibyaha by’iterabwoba barimo n’umwe wafatiwe i Dubai bagejejwe imbere y’urukiko rwisumbuye rwa Gasabo, aho baburanye ku ifungwa n’ifungurwa ry’agateganyo.

Ismail Nsengiyumva na bagenzi be bane bagejejwe mu rukiko kuri uyu wa Mbere, tariki ya 26 Nzeri bambaye imyenda ibaranga nk’abayoboke b’idini ya Islam, banambitswe amapingu nk’uko BBC dukesha iyi nkuru ibitangaza.

Ubushinjacyaha bubakurikiranyeho ibyaha byo kurema umutwe wa gisirikare utemewe no kuba mu mitwe y’Iterabwoba, bukaba bwahise buvuga ko bukurikije uburemere bwabyo busaba urukiko ko urwo rubanza rwaburanishirizwa mu muhezo.

Batatu baregwa babwiye Urukiko ko basanga nta mpamvu yatuma bataburanira mu ruhame, ariko babiri bo bavuga ko ntacyo bibatwaye kuburanira mu muhezo.

Nyuma yo gusuzuma ibivugwa n’impande zombi z’ababuranyi kuri iyo ngingo yo kuburanisha urwo rubanza mu muhezo cyangwa mu ruhame, Urukiko rwahise rwemeza ko rushyirwa mu muhezo, maze rutegeka ko abari mu cyumba cy’iburanisha bose basohoka.

Icyo cyemezo cyafashwe nyuma y’uko Umucamanza yari amaze gusoma bimwe mu byaha baregwa, aho ku isonga haza kuba mu mutwe w’iterabwoba n’uruhare mu kurema umutwe wa gisirikare utemewe.

Baregwa kandi gushishikariza abandi kujya mu mitwe y’Iterabwoba, icyakora nta mazina y’uwo mutwe n’aho ukorera byigeze bivugwa.

Ubushinjacyaha busaba urukiko ko bakomeza gufungwa by’agateganyo, ngo bukomeze bukusanye ibimenyetso, abaregwa bo bagasaba kurekurwa bakaburana bari hanze.

Ismail Nsengiyumva na bagenzi be, bagize icyiciro cya kabiri cy’abaregwa ibyaha nk’ibyo by’iterabwoba, bakaba bakurikira abandi 23 bafunzwe kuva mu ntangiriro z’uyu mwaka, bafatiwe mu bice bitandukanye by’u Rwanda.

Muri Mutarama uyu mwaka ni bwo Sheikh Muhamad Mugemangango yarashwe na Polisi y’u Rwanda, yanatangaje ko yari agerageje gutoroka inzego z’umutekano aho yari agiye kwerekana bimwe mu bimenyetso by’ibyaha yashinjwaga.

Mugemangango wari Umuyobozi w’Umusigiti wa Kimironko yashinjwaga kwigisha urubyiruko ubuhezanguni no kurukangurira kwinjira mu mitwe y’iterabwoba nka Islamic State ufite ibirindiro bikomeye muri Syria.

Urupfu rwa Mugemangango rwatumye harushaho kumenyekana ibyaha by’Iterabwoba by’ubwo bwoko, bitari bisanzwe bimenyerewe mu Rwanda.

Ijambo ‘Iterabwoba’ ndetse n’ubuhezanguni, ubu akunda kugaruka mu mbwirwaruhame z’abanyapolitiki batandukanye ndetse no mu nyigisho zihabwa abayoboke b’idini ya Islam, bakangurira abanyarwanda ubufatanye mu kubirwanya.

Uretse kudohoka kw’ababyeyi mu guha uburere abana babo, ubushomeri n’ikibazo cy’ubukene mu rubyiruko bitungwa agatoki mu bituma urubyiruko rwishora mu byaha nk’ibyo by’iterabwoba.

Urukiko rwisumbuye rwa Gasabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza