Kwamamaza

Banki ya Kigali ifite gahunda yo guca ikoreshwa ry’impapuro habungabungwa ibidukikije

Yanditswe kuya 22-10-2016 saa 19:51' na Jean Pierre Tuyisenge


Banki ya Kigali yatangaje ko ifite gahunda yo guca impapuro mu kazi kayo ka buri munsi, mu rwego rwo kugabanya ibiti byangirika mu gihe zikorwa no kurengera ibidukikije muri rusange.

Umuyobozi w’iyi Banki, Dr.Diane Karusisi, yabitangaje ubwo abakozi bayo, Minisitiri w’Umutungo Kamere(Ubutaka, amashyamba, ibidukikije n’ubucukuzi bw’amabuye y’agaciro), Dr Vincent Biruta n’abaturage bo mu murenge wa Karangazi, bateraga ibiti 1000 mu gitondo cyo kuri uyu wa Gatandatu, tariki ya 22 Ukwakira 2016, mu rwego rwo kwizihiza isabukuru y’imyaka 50 iyi Banki imaze ikora.

Diane Karusisi, yavuze ko kugira ngo iki kigo gikomeze gutera imbere n’igihugu muri rusange, hakenewe ko habungwabungwa ibidukikije.

Yagize ati ” Turi kwizihiza imyaka 50 Banki ya Kigali imaze ikora, ariko twasanze kugira ngo irusheho gutera imbere ari uko twabungabunga ibidukikije. Twifuje gufatanya na Leta n’abandi bafatanyabikorwa kugira ngo turebe ko ikirere cyacu cyarushaho kuba cyiza.”

Yongeyeho ati “ Muri Banki dukoresha impapuro byinshi kandi tuzi aho ziva, dufite gahunda yo guca ikoreshwa ryazo muri banki yacu tugakoresha uburyo bw’ikoranabuhanga, bwaba ubwa mudasobwa cyangwa telefoni.

Minisitiri w’Umutungo Kamere ( Ubutaka, amashyamba, ibidukikije n’ubucukuzi bw’amabuye y’agaciro), Dr Vincent Biruta na we wari witabiriye uwo muhango, yavuze ko ashimira BK by’Umwihariko kuko ngo ari cyo kigo cyonyine cyigenga kibashije kwibwiriza gutera ibiti ntawe ubigisabye.

Yagize ati “ Ni ubwambere ikigo cyikorera gikoze gahunda nk’iyi, atari Minisiteri y’Umutungo kamere yabibasabye, atari Inama y’Abaminisitiri yabibasabye, bo ubwabo bakicara bakavuga bati ’tugiye kwizihiza isabukuru y’imyaka 50 dute?’, kuyizihiza rero batera amashyamba ni ikintu cyiza cyane.”

Minisitiri Biruta, yavuze ko Minisiteri y’Umutungo kamere na Banki ya Kigali, bazakomeza gukurikirana ibiti byatewe kugira ngo bizakure neza.

Banki ya Kigali iri kwizihiza imyaka 50 imaze ishinzwe, ni muri urwo rwego yahisemo kubikora itera amashyamba mu rwego rwo kubungabunga ibidukikije. Uyu munsi yateye ibiti 1000, muri gahunda bafite yo gutera ibiti ibihumbi 150.

Gahunda iyi banki ifite yo guca impapuro mu kazi kayo, yayitangiye ubwo yatangiza gahunda yo kubitsa no kubikuza hakoreshejwe ikarita y’ikoranabuhanga no gukoresha telefoni mu bikorwa bya Banki bise Mobile Banking.

Umuyobozi Mukuru wa BK, Dr. Diane Karusisi
Minisitiri w'Umutungo Kamere, Dr.Vincent Biruta

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved