Abapasiteri ba ADEPR bandikiye Minisitiri w’Intebe basabira abayobozi babo kwegura

Yanditswe na Uwishyaka Jean Louis
Kuya 12 Ukwakira 2016 saa 02:50
Yasuwe : XX
0

Bamwe mu bapasiteri bo mu Itorero rya Pentekote mu Rwanda(ADEPR), bandikiye Inteko Ishinga Amategeko na Minisitiri w’Intebe,basaba ko abagize Biro Nyobozi y’iri torero begura cyangwa bakeguzwa, babashinja kutaba inyangamugayo, gusesagura umutungo w’Itorero no guhindura imyizerere y’itorero.

Rev. Mitsindo Gratien, Umuyobozi wa Paruwasi ya Jabana mu Karere ka Gasabo na Rev Kayitare Vedaste, Umuyobozi wa Paruwasi ya Gikomero, bafatanyije n’abandi barimo uwitwa Kalisimbi Jean Bosco na Pasiteri Uwabimfura Modeste wahoze muri ADEPR akaza kwirukanwa, ni bamwe mu banditse ibaruwa basaba ko Biro Nyobozi ya ADEPR yegura cyangwa ikeguzwa n’ubuyobozi bw’Igihugu.

Ibaruwa IGIHE ifitiye kopi yandikiwe Umuyobozi Mukuru w’Ikigo cy’Igihugu Gishinzwe imiyoborere RGB, Inteko Ishinga Amategeko imitwe yombi n’izindi nzego nkuru za Leta, igaragaza ingingo bashingiraho basaba ko abayobozi ba ADEPR begura, zirimo ko iyo biro itari inyangamugayo, bashingiye ku kuba bamwe mu bayobozi barambuye abantu harimo n’abakirisitu b’iri torero, batanga sheke zitazigamiye(chèque sans provision) ku buryo ngo n’ubu bari mu nkiko.

Bavuga kandi ko bashyira bakanakura mu myanya abayobozi mu buryo bunyuranyije n’amategeko, bazamura abantu mu ntera batitaye ku mabwiriza agenga umuryango, guha abantu inshingano za gipasiteri badafite ubuhamya bwiza, gusesagura umutungo w’umuryango, kunyereza umutungo w’abanyamuryango wari mu kigega SICO hamwe no kwiyegurira umutungo wari uwa ADEPR babicishije muri DOVE Hotel n’ibindi.

Bakomeza bavuga ko aba bayobozi bahinduye imyizerere ya ADEPR ku nyungu zabo batagishije inama abayoboke, ku buryo Umuvugizi hamwe n’umwungirije batangaje ko babaye ba Bishop/abasenyeri, kandi ngo bitemewe mu myizerere y’Abapentekote.

‘Batugenzura nka bande?’

Mu kiganiro yagiranye na IGIHE, Umuvugizi wa ADEPR wungirije, Bishop Rwagasana Tom, yavuze ko ababasaba kwegura atari bo babimitse.

Yagize ati “Ntabwo ari abanyetorero, nta mpamvu yo kweguza abantu, Itorero ryacu ntabwo rijugunyanze hirya no hino rifite amabwiriza n’amategeko arigenga. Abo se bafite ubuhe bushobozi bwo kweguza abantu? Bahuriye he n’itorero? Bafite ubuhe bushobozi? Dufite Inama y’Ubutegetsi, dufite Inteko Rusange, batugenzura nka bande ?”

Uyu muyobozi yakomeje avuga ko abanditse basaba ko abayobozi ba ADEPR begura, bari gukora akazi katari akabo.

Ati “Inzego zacu zirubakitse, ubuyobozi buriho bwatowe n’inzego zibyemerewe, bariya rero nta burenganzira bafite bwo kweguza abantu barakora akazi katari akabo.”

Bamwe mu basinye ku ibaruwa bahagaritswe ku mirimo

Tumubajije impamvu yatumye Rev. Mitsindo Gratien na Rev Kayitare Vedaste, barahagarikwa ku mirimo nyuma yo gusinya mu basabye ko abayobozi bakuru ba ADEPR begura, Bishop Rwagasana yasubije ko ibyo atarabimenya.

Yagize ati “Ubundi niba ubwira umuyobozi wawe uti egura uveho, icyo gihe nawe ntabwo uba ukiri umuyobozi, ubuyobozi uba wabwanze."

‘Nta gikuba cyacitse muri ADEPR’

Mu butumwa yageneye abakirisitu bo muri ADEPR, Bishop Rwagasana yagize ati “Abakirisitu nababwira ko nta gikuba cyacitse mu Itorero ryabo, abayobozi babo bari gukora neza, amateraniro aragenda neza, bahumure nta kibazo Itorero rifite ni abantu ku giti cyabo. Ari Modeste uvuga ari n’abo ngabo ba Karisimbi bavuye mu Itorero ryacu nta mpamvu yo kurigenzura bataririmo.”

Yakomeje asaba abandika babasaba kwegura kureka kuvogera ADEPR, yongeraho ko u Rwanda ari igihugu kigendera ku mategeko, bityo ko nibiba ngombwa bazayitabaza bakabarega.

Aba bapasiteri bandikiye ibaruwa inzego za Leta basaba ko abayobora ADEPR begura cyangwa bakeguzwa
Bishop Rwagasana Tom, umuvugizi wungirije na Bishop Sibomana Jean, umuvugizi wa ADEPR ngo bagizwe abasenyeri bidakwiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza