Kwamamaza

Abafite ubumuga baracyahura n’imbogamizi mu guhabwa inguzanyo

Yanditswe kuya 16-08-2016 saa 10:31' na Hakizimana Elias


Bamwe mu bafite ubumuga mu Rwanda baratunga agatoki amwe mu mabanki bavuga ko ataborohereza kubona inguzanyo, mu gihe badahwema gusaba ko habaho uburyo bwihariye bubafasha kwibeshaho badategeye abandi amaboko ahubwo na bo bakagira uruhare mu kwifatira imyanzuro biteza imbere.

Imyaka irenga 11 irashize, umubare munini w’abafite ubumuga butandukanye bahabwa amahugurwa mu bubaji, ubudozi, ubwubatsi n’ibindi, ariko si aho birangirira kuko nabo bakomeza guharanira gushaka icyabateza imbere bashimangira ihame ryo kwigira.

Nyankiko Pierre, umubyeyi w’abana batatu ufite ubumuga bwo kutabona atuye mu kagali ka Bibare mu mudugudu wa Amariza mu murenge wa Kimironko ho mu karere ka Gasabo ubusanzwe akaba ari umuganga w’imitsi wigenga na rwiyemezamirimo ukora mu by’ubwubatsi yatanze ubuhamya bw’uburyo hari banki yimye uburenganzira umugore we(nawe ufite ubumuga bwo kutabona) bwo gufunguza konti mu izina rye bwite.

Ati “Tujya gufunguza konti mu ishami muri imwe mu mabanki ifite ishami i Byumba, umugore wanjye banze kumufungurira konti kugira ngo ajye ayihemberwaho.

Badusabye gushaka ushobora kumahagararira akanamukorera gahunda zose za konti ye, ariko twabasobanuriye ko bidashoboka, kuko umuntu agomba gufunguza konti mu izina rye akajya ayikoreraho icyo ashaka, akaba ari we wishyiriraho umwishingizi ku bushake bwe, bitarinze gusabwa na banki.”

Yakomeje atangaza ko yahamagaye Visi Guverineri wa Banki Nkuru y’igihugu, Dr Monique Nsanzabaganwa bamusaba kubakorera ubuvugizi.

Ati “ Twavugishiije umuyobozi wungirije muri Banki Nkuru y’igihugu tumubwira icyo kibazo , nawe ahamagara iryo shami abasaba ko baha uburenganzira umugore wanjye agafunguza konti akajya ayihemberwaho kuko yari umukozi w’umushinga witwaga ‘Mentorship’ wakoranaga na REB.”

Nyankiko ngo ibyo yabonye byamuteye impungenge cyane ku mikoranire hagati y’amabanki ndetse n’abafite ubumuga.

Ati “Undi munsi nanjye nashatse kujya mu yindi banki ifite ishami Kimironko, njya gufunguza konti banyohereza mu karere gushaka urupapuro rumpa uburenganzira, ariko byasabye kubanza guhamagara abandi bantu badukorera ubuvugizi.

Yakomeje agira ati “ Inzira dusabwa kunyuramo dusaba ibyangombwa ni ndende cyane. Mu myaka ibiri ishize nagiye gusaba inguzanyo ku mushahara barayinyima. Banki aho kubona ubushobozi, ibanza kubona ubumuga.”

Bahuza Jean Floribert uyobora Umuryango w’abamugariye ku rugamba n’abandi bafite ubumuga bukomeye, RECOPDO yasobanuye ko ikibazo cyo kutizerwa n’amabanki ari kimwe mu bituma imishinga y’abafite ubumuga idindira ngo kuko amabanki atabizera mu gihe bayagannye bakeneye inguzanyo.

Ati “ Usanga kubura igishoro bibera imbogamizi abafite ubumuga, hari igihe baguha ikiraka nk’icyo gusudira inzugi z’inzu ugasanga koperative murimo nta bushobozi ifite kandi na banki kenshi ntabwo zikunda kubizera.”

Yakomeje agira ati “Icyo twifuza ni uko amabanki yafata abafite ubumuga nk’abandi Banyarwanda bakabaha inguzanyo kuko na bo bashoboye. Kuba umuntu afite ubumuga ntibikwiye kumwambura uburenganzira bwe.”

Maurice Toroitich, ukuriye urugaga rw’abanyamabanki mu Rwanda avuga ko yatunguwe no kuba hari abafite ubumuga bavuga ko batoroherezwa mu buryo bwo kubona inguzanyo.

Agira ati “ Icyo nzi ni uko amabanki akorera mu mucyo nta vangura tugira hagati y’abakiriya bacu, twakira mu buryo bumwe abakiriya batugana, ntunguwe cyane no kumva ko hari bamwe bavuga ko bahabwa akato kuko iyo abantu baje gusaba inguzanyo tureba icyo binjiza ntakindi dukurikiza.”

Yakomeje atangaza ko abakozi b’amabanki bagomba kumenya ko kumugara bidasobanuye kudashobora.

Ati “Tugiye gukomeza kwigisha politiki ya banki kuri iyi ngingo, igisabwa ni ukwigisha umuryango nyarwanda usibye n’amabanki gusa, bagasobanukirwa ko ibiremwamuntu aho biva bikagera bigomba gufatwa kimwe kuko abafite ubumuga ni abantu nk’abandi, bakorera amafaranga, bagira imishinga ibyara inyungu, kandi bashoboye kwishyura inguzanyo iyo bagujije amafaranga.”

Nyankiko Pierre ufite ubumuga bwo kutabona avuga ko batoroherezwa mu kubona inguzanyo
Bahuza Jean Floribert uyobora Umuryango w’abamugariye ku rugamba n’abandi bafite ubumuga,avuga ko amabanki atizera abafite ubumuga mu kubaha inguzanyo

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved