Ba rwiyemezamirimo batakambiye PAC kubera akayabo baberewemo na WASAC

Yanditswe na Ndayishimye Jean Claude
Kuya 6 Kamena 2018 saa 07:42
Yasuwe :
0 0

Bamwe muri ba rwiyemezamirimo bafitanye amasezerano n’Ikigo gishinzwe amazi, isuku n’isukura (WASAC) yo kubaka imiyoboro y’amazi mu duce dutandukanye tw’igihugu, bagaragarije abadepite bagize Komisiyo ishinzwe gukirikirana imikoreshereze y’imari n’umutungo by’igihugu (PAC) uburyo iki kigo kitubahirije amasezerano bagiranye ntikibishyure bigatuma imishinga idindira.

Kuri uyu wa Kabiri, ibigo bya leta byagaragawemo imicugire mibi y’umutungo wa leta byakomeje kubarizwa mu ruhame na PAC, aho hari hatahiwe WASAC.

Mu ruhuri rw’ibibazo biri muri iki kigo byagaragajwe n’Umugenzuzi Mukuru w’Imari ya Leta PAC yarondoye, harimo iby’imishinga yadindiye ku buryo yatinze kurangira ugereranyije n’igihe yari yarateganyijwe.

Bamwe muri ba rwiyemezamirimo batsindiye amasoko yo kubaka imiyoboro y’amazi bagaragaje imikorere idahwitse y’iki kigo usanga ishingiye ahanini ku kutabishyura kandi akazi bagakoze neza.

Ni imishinga yo gukwirakwiza amazi hirya no hino mu byaro, aho yatanzwe mu 2016, ikaba yari gutwara miliyari 17 z’amanyarwanda.

Ku ruhande rw’ubuyobozi bwa WASAC, bwasobanuye ko impamvu butahembye ba rwiyemezamirimo ari uko bahawe ingengo y’imari nke ugereranyije n’iyo bari bakeneye.

Muri ba rwiyemezamirimo batishyuwe harimo Umuyobozi Mukuru wa Sosiyete HYGEBAT, Mugabo Théobald wasobanuriye PAC ko muri Gicurasi 2016 yasinyanye amaserano na WASAC yo kubaka umuyoboro w’amazi wa Ntwari - Kayenzi mu Karere Kamonyi, atangira imirimo, byari biteganyijwe ko yagombaga kurangira mu Ugushyingo 2017 ariko kugeza ubu imirimo ikaba itararangira. WASAC ngo yakunze kumubwira ko byatewe no kuba nta mafaranga ifite.

Yavuze ko mu mezi atandatu ya mbere yakoranye neza na yo ariko nyuma y’aho aza kubaha fagitire ngo bamwishyure aho imirimo yari igeze aza kubwirwa ko nta mafaranga ahari.

Nyuma ngo yaje kwishyurwa gahoro gahoro, ndetse kugeza ubu umushinga ukaba wararengeje igihe wagombaga kurangirira hakiri n’imyenda bakimubereyemo.

Yagize ati “Twatangiye gukora icyo gihe tumara amezi atandatu nta kibazo dufite umushinga ugera kuri 60%, dukora fagitire, ntabwo twari tuzi ko amafaranga adahari noneho tumaze kuyikora barayidusubiza batubwira ko nta mafaranga bafite mu ngengo y’imari. Batubwira ko bashobora kutwishyura make make, bayabona tukishyuza.”

Undi mushinga HYGEBAT ifite ni uwo kubaka uruganda rw’amazi rwa Gashora -Kanyonyomba, aho na wo bawutangiye mu kwezi kwa Gatanu 2016, ugomba kurangira mu kwezi kwa Gatanu 2017, gusa kubera kutishyurwa ngo n’ubu nturarangira.

Uretse kutishyurirwa igihe, uyu mushinga ngo wari ufite inyigo ikoze nabi, WASAC iza gusaba iyi sosiyete gukora indi. Batangira gukora uruganda ngo rwagombaga gutanga metero kibe 2400 ku munsi, baza gusabwa ko barwongera rukazajya rutanga metero kibe 5000.

Undi rwiyemezamirimo ni Niyibizi David ufite isosiyete y’ubwubatsi yitwa NIE Ltd, akaba afitanye amasezerano na WASAC yo kubaka umuyoboro w’amazi wa Ruhashya-Ntyazo mu Karere Gisagara, aho bayasinye muri Kanama 2016 ukaba waragombaga kurangira nyuma y’amezi 16 ariko kubera kutishyurwa uyu mushinga nturarangira.

Abandi bagaragaje ibibazo ni sosiyete Fair Construction ifite imishinga ibiri yo kubaka imiyoboro y’amazi ya Gihengeri-Ngamba na Murama–Rwamiko mu Karere ka Gicumbi, ikaba yasobanuye ko na yo WASAC itigeze ibishyura uko bikwiye, aho byatumye imirimo itararangira kugeza ubu.

Iyo mishinga yose harimo iyo WASAC na ba rwiyemezamirimo bumvikanye ko yongererwa igihe ariko na cyo kikaba cyararenze itarangiye kandi bataranishyurwa.

Abadepite bagize PAC baguye mu kantu bumvise uko gutakamba kwa ba rwiyemezamirimo, bahuriza hamwe ko WASAC ifite igenamigambi rififitse.

Uretse aba ba rwiyemezamirimo bari bahamagajwe muri PAC ngo hari n’abandi benshi bahuje ibibazo.

Ukuvuguruzanya kwaranze abayobozi ba WASAC ndetse n’izindi nzego

Ubuyobozi bwa WASAC bwaranzwe no kuvuguruzanya, aho bamwe bavugaga ko ayo mafaranga yari ahari, abandi bakavuga ko bayateganyaga ntibayahabwe.

Monia Lobga wari ushinzwe amasoko icyo gihe iyo mishinga itangira gukorwa, yavuze ko ayo masoko yari ari ku igenamigambi ry’amasoko kandi afite ingengo y’imari na ho Umuyobozi Mukuru wa WASAC Muzola Aimé, akavuga ko ayo mafaranga bayateganyaga, bakaza guhabwa ingengo y’imari idahagije.

Gusa uyu Monia yaje kwisubiraho asobanura ko bari barijejwe ko bazahabwa ingengo y’imari ihagije ariko ntibayihabwe. Ikintu Visi Perezida wa PAC, Karenzi Théoneste yavuze ko ari ukwivuguruza gukomeye.

Ibi byahamijwe kandi n’Umunyambanga Uhoraho muri Minisiteri y’Ibikorwa remezo, Rwakunda Christian, wasobanuye ko ikibazo cyabayeho ari ukubera ko muri 2016/17, WASAC yateganyaga guhabwa ingengo y’imari ya miliyari 27 ariko iza guhabwa 18 bitera ingaruka.

Gusa abadepite bashimangiye ko bitabaho ko imishinga yatangiye gukorwa ishobora kwimwa ingengo y’imari, basaba ubuyobozi bwa WASAC gusobanura aho ayo mafaranga yari kwishyurwa ba rwiyemezamirimo yagiye.

Ibi kandi byashimangiwe n’Umubaruramari Mukuru muri MINECOFIN, Mukeshimana Marcel, wavuze ko igihe imishinga yatangiye gukorwa bitajya bibaho ko yimwa ingengo y’imari.

Depite Munyangeyo Théogène yavuze ko kutishyura ba rwiyemezamirimo bibatera igihombo na cyane ko benshi baba bashoye amafaranga akomoka ku nguzanyo baba bahawe na banki.

Imishinga nk’iyi idindira mu gihe abaturage mu bice binyuranye by’igihugu cyane cyane mu cyaro bakunze kwinubira ikibazo cyo kubura amazi meza.

PAC yasabye WASAC kuyikorera raporo igaragaza ibyaranze iyi mishinga yadindiye ndetse n’ingano y’amafaranga yagombaga guhabwa ba rwiyemezamirimo.

Umubaruramari Mukuru muri Minisiteri y'Imari n'Igenamigambi, Mukeshimana Marcel
Umuyobozi Mukuru wa Sosiyete HYGEBAT, Mugabo Théobald
Abari bahagarariye Fair Construction muri iri bazwa rya PAC
Niyibizi David ufite isosiyete y’ubwubatsi yitwa NIE Ltd, akaba afitanye amasezerano na WASAC
Umuyobozi Mukuru wa WASAC, Muzola Aimé, aganira n'umwungirije, Umuhumuza Gisèle

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza