Ba rwiyemezamirimo basabwe ubunyangamugayo nabo basaba gukuraho amanyanga mu masoko ya leta

Yanditswe na Prudence Kwizera
Kuya 6 Ukwakira 2017 saa 08:37
Yasuwe :
0 0

Ikigo cy’Igihugu gishinzwe amasoko ya Leta (RPPA), cyasabye ba rwiyemezamirimo kuba inyangamugayo mu bikorwa byabo kandi bagapiganira isoko igihe bafite ubushobozi bwo kurishyira mu bikorwa nabo basaba ko hakurwaho amanyanga agaragara mu mitangire y’amasoko ya leta.

Hashize iminsi ba Rwiyemezamirimo bavugwaho amanyanga atandukanye nko kudahemba abo bakoresheje, kutubahiriza amasezerano y’amasoko batsindiye no guta imirimo batayirangije n’ibindi.

Ariko havuzwe ko no mu mitangire y’amasoko ya Leta hagaragaramo amanyanga nko guha isoko ababanje gutanga ruswa, gukoresha ikimenyane n’ibindi.

Mu nama nyunguranabitekerezo yahuje RPPA (Rwanda Public Procurement Autority) na ba Rwiyemezamirimo bo mu Ntara y’Amajyepfo kuri uyu wa 6 Ukwakira 2017, habayeho gusasa inzobe buri ruhande rubwirwa ibyo rukwiye gukosora.

RPPA yasabye ba rwiyemezamirimo kwisubiraho bakareka amanyanga amaze iminsi abavugwaho, bagakora ibishoboka byose bakagaragaza isura nziza mu mwuga wabo bakawuhesha agaciro.

Umuyobozi w’ishami rishinzwe kongera ubumenyi muri RPPA, Celestin Sibomana, yabibukije ko ubunyangamugayo ari ipfundo ry’ibyiza byose, bityo buri wese akwiye kubuhorana.

Sibomana ati “Burya ipfundo rya mbere ni ubunyangamugayo, niba mu masoko ya Leta ari ahantu haca amafaranga menshi ya Leta agomba gukoreshwa neza, ubwo rero hagomba ubunyangamugayo ku mpande zombi no kubahiriza amategeko, byaba ku ruhande rw’abapiganira amasoko ya Leta n’abayatanga”.

Ba rwiyemezamirimo na bo basabye ko hakurwaho amanyanga agaragara mu itangwa ry'amasoko ya leta

Muri iyo nama ba Rwiyemezamirimo basabwe gucika ku ngeso yo kwiyemeza ibyo badashoboye, kudahemba abo bakoresheje, guta imirimo batayirangije, gusondeka ibyo bakora na ruswa.

Ba rwiyemezamirimo bari bitabiriye iyo nama bavuze ko bagiye kwisubiraho bagakosora amakosa akunze kubagaragaraho ariko nabo basaba ubuyobozi na RPPA kuvanaho amanyanga agaragara mu gutanga amasoko ya Leta.

Bemeje ko ayo manyanga ariyo atuma akenshi badakora imirimo neza nk’uko biba byashyizwe mu masezerano, cyangwa kubona isoko bitanyuze mu mucyo bigatuma bakora imirimo nabi ikagaragaramo amakosa n’umugayo.

JMV Munyanziza waturutse mu karere ka Gisagara ati “Amanyanga mu gutanga amasoko ya Leta arahari cyane ari na yo mpamvu twasabye ko byakosorwa, natwe byatubayeho aho twatsindiye isoko ariko bariha undi. Aya manyanga mu mitangire y’amasoko ya Leta niyo atuma hagaragara ubungangamigayo buke kuri ba rwiyemezamirimo no guta imirimo, kudahemba abakozi n’ibindi”.

Ba rwiyemezamirimo baganiriye bagaragaje ko amanyanga mu mitangire y’amasoko ya Leta nakurwaho bizabafasha gukorana ubunyangamugayo no guteza imbere igihugu.

Celestin Sibomana, Umuyobozi w'Ishami rishinzwe kongera ubumenyi muri RPPA

Umuyobozi ushinzwe igenamigambi n’ingengo y’imari mu Ntara y’Amajyepfo, Faustin Mutambuka, yavuze ko ba rwiyemezamirimo, RPPA, abaturage n’ubuyobozi bose bahuriye ku ntego nziza yo guteza imbere igihugu, bityo bakwiye kunoza ibyo bakora kandi bagakorera hamwe ahagaragye ikibazo bakiyambaza inzego zibishinzwe zikagikemura.

Ati “Dusangiye gupfa no gukira kuko iyo twubaka igihugu tucyubakira hamwe kandi buri munyarwanda wese akagira icyo azana kugira ngo yubake igihugu. Umusanzu ba rwiyemezamirimo basabwa ni ubunyangamugayo no gukora neza naho twe icyo dusabwa ni ugutanga amasoko ya Leta binyuze mu mucyo”.

Iyo nama nyunguranabitekerezo yahuje RPPA na ba rwiyemezamirimo bo mu Ntara y’Amajyepfo yari ifite insanganyamatsiko igira iti “Uruhare rw’amasoko ya Leta mu kubaka ubukungu bw’igihugu”.

Ba rwiyemezamirimo beretse ubuyobozi na RPPA ibikwiye kunozwa bizabafasha kurangwa n'ubunyangamugayo mu mikorere
Ba rwiyemezamirimo basabwe kurangwa n'ubunyangamugayo
Mutambuka Faustin, Umuyobozi w'Igenamigambi n'ingengo y'imari mu Ntara y'Amajyepfo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza