00:00:00 IGIHE NETWORK KN KINYARWANDA EN ENGLISH FR FRANCAIS

Ba rwiyemezamirimo b’urubyiruko bahawe miliyoni 20 Frw zo kwihangira imirimo

Yanditswe na Ntabareshya Jean de Dieu
Kuya 17 Ugushyingo 2021 saa 10:08
Yasuwe :
0 0

Umuryango Mpuzamahanga ukorana n’urubyiruko, abari n’abategarugori mu gukoresha ikoranabuhanga no guhanga udushya hagamijwe iterambere, DOT Rwanda, watanze miliyoni 20 Frw ku rubyiruko 40 rugiye gutangira imishinga y’iterambere.

Uru rubyiruko 40 rurimo 31 b’igitsina gore rwaturutse mu turere dutandukanye hirya no hino mu gihugu.

Ni inkunga bahawe nyuma y’igihe bahugurwa mu bijyanye no kwihangira imirimo igamije gushakira hamwe ibisubizo by’ibibazo byugarije sosiyete nyarwanda.

Bahawe amafaranga binyuze muri gahunda y’umushinga watangijwe na DOT mu Rwanda muri Werurwe 2021 wiswe “Daring To Shift”. Uzamara imyaka ine kandi biteganyijwe ko uzagera ku bagenerwabikorwa 7650 bagizwe na 70% by’abagore.

Abahawe inkunga yo kubafasha kunoza imitegurire y’imishinga yabo baganiriye na IGIHE bagaragaje ko iyi nkunga igiye kubafasha mu rugendo rwabo kugira ngo babashe kwiga neza isoko ndetse n’impinduka bakwiye kuzana aho batuye.

Ishimwe Josée wo mu Karere ka Kayonza, ufite umushinga ugamije kwigisha abana b’abakobwa kwiteza imbere binyuze mu kuboha, yavuze ko guhabwa iyi nkunga ari amahirwe akomeye.

Yagize ati “Biba bigoye kugira ngo umuntu akwizere, abe yavuga ngo reka nkubake mu mpande zombi. Ni ukuvuga mu bitekerezo no mu buryo bw’amafaranga. Hari igihe uba ufite igitekerezo ariko utazi uko wagishyira mu bikorwa ndetse ukagira n’imbogamizi z’amafaranga.”

“Ibyo byose DOT Rwanda irabireba ikagufasha guha umurongo igitekerezo cyawe, ikaguha n’ubushobozi mu buryo bw’amafaranga. Ni ikintu cyiza kandi natwe turabizeza ko iyi nkunga tuzayibyaza umusaruro kugira ngo tubashe kwiyubakira u Rwanda twifuza.”

Tuyishimire King Evariste wo mu Karere ka Kicukiro ufite umushinga ugamije guca ikoreshwa rya pulasitike mu Rwanda akoresheje ibikomoka ku mugano, yagaragaje ko aho umushinga we ugeze ari heza kandi ko inkunga yahawe igiye kumufasha kuwunoza neza.

Ati “Turagira ngo tubasezeranye ko mutagosoreye mu rucaca, natwe tuzaharanira kudasigana kandi duhinga mu kwacu, ibyo mwaduhaye tuzabishyira mu bikorwa kandi muzabyibonera n’amaso yanyu. Mu kurwanya ikoreshwa rya pulasitike natangiye gukora udutete two mu biro bashyiramo imyanda (dustbin). Iyi nkunga rero izamfasha kunoza neza umushinga no kumenya ibikenewe kugira ngo nigarurire isoko.”

Umuyobozi wa Carl Group Ltd, itunganya ibikomoka ku bijumba, Mugiraneza Regis, yagaragarije uru rubyiruko urugendo rwe mbere yo guhura na DOT Rwanda, ashimangira ko binyuze mu guhangana no kudacika intege bizagenda neza.

Yabasabye guhozaho no guharanira iterambere rishingiye kuri bo ubwabo mu rwego rwo kwiteza imbere.

Umuyobozi Mukuru ushinzwe kubaka ubushobozi bw’urubyiruko muri Minisiteri y’Urubyiruko n’Umuco, Tetero Solange, yasabye uru rubyiruko kudapfusha ubusa amahirwe rwahawe.

Ati “Urubyiruko muri aha mwavuye mu bandi, twavuga ko muvuye mu murongo w’ubukene cyangwa munsi yawo, ubundi imibare igaragaza ko abantu bahabwa akazi na Leta ari bake cyane.”

“Abikorera ni bo bafite ubushobozi bwo kuba batanga akazi ku bantu benshi bagakemura ikibazo cy’ubushomeri. Bizashoboka ari uko twese tubigizemo uruhare binyuze mu kwihangira imirimo. Mwebwe turabakeneye, ariko dukeneye abafite umuhate kuko ari rwo rufunguzo rwo kugera ku ntego.”

Umuyobozi wa DOT Rwanda, Uwamutara Violette, mu ijambo rye yasabye uru rubyiruko guharanira impinduka no gukomeza gutekereza ku kwiteza imbere.

Yagaragaje ko guhitamo gufasha urubyiruko ari inzira nziza zo guhangana n’ikibazo cy’ubushomeri mu rubyiruko no gutegura ahazaza heza.

Yavuze ko bazakomeza gushyigikira uru rubyiruko kugeza imishinga yarwo ishyizwe mu bikorwa ndetse na nyuma yaho, hagamijwe gusuzuma iterambere ryagezweho.

Ati “Urubyiruko rufite ubushobozi n’ubumenyi ku bijyanye n’ibibazo bikeneye ibisubizo bigararaga aho rutuye. Niyo mpamvu dukorana n’urubyiruko tukarufasha mu rugendo rwo gushaka ibisubizo birambye ku bibazo byugarije umuryango nyarwanda.”

“By’umwihariko urubyiruko rw’igitsinagore iyo rufashijwe guhanga udushya hagamijwe kuzana impinduka nziza muri sosiyete, ruba icyitegererezo no ku bandi bari n’abategarurgori bagifite ikibazo cyo kwitinya, ndetse usanga n’imishinga yabo ifasha bagenzi babo b’abari n’abategarurgori kugira imibereho myiza ku kigero kiri hejuru”.

Urubyiruko rwahawe inkunga ruzakomeza gukorana na DOT Rwanda binyuze mu kubakurikirana umunsi k’uwundi ndetse no guhabwa ubujyanama mubijyanye n’ubushabitsi.

DOT Rwanda izanabahuza n’abafanyabikorwa bafite ubunararibonye mubijyanye no gufasha ba rwiyemezamirimo bagitangira kunoza ibikorwa byabo hagamijwe kubigeza ku isoko byujuje ubuziranenge.

Mu 2022, hazanategurwa andi marushanwa kuri uru rubyiruko, abazahiga abandi bazahabwa inkunga y’ amafaranga izabafasha gutangiza ku buryo bwagutse imishinga yabo.

Umuyobozi wa DOT Rwanda, Uwamutara Violette (uri ibumoso) n’Umuyobozi Mukuru ushinzwe kubaka ubushobozi bw’Urubyiruko muri Minisiteri y’Urubyiruko n’Umuco, Tetero Solange, bitabiriye iki gikorwa
Ishimwe Josée yagaragaje ko biteguye kubyaza umusaruro amahirwe bahawe
Mbere yo guhabwa iyi nkunga babanje no guhugurwa ku bijyanye no kwihangira imirimo
Tetero yahawe impano kugira ngo azatanga igisubizo cy'uko yabibonye n'icyanozwa neza muri uyu mushinga
Tuyishimire King akora ibikoresho mu migano bigomba gusimbura ibikozwe muri pulasitike
Umuyobozi wa CARL Group Ltd itunganya Ibikomoka ku bijumba, Mugiraneza Régis, yagaragarije uru rubyiruko urugendo rwe mbere yo guhura na Dot Rwanda
Uhagarariye urubyiruko muri PSF na we ni umwe mu bitabiriye uyu muhango
Tuyishimire King Evariste yagaragaje ko aho umushinga we ugeze ari heza kandi ko inkunga yahawe igiye kumufasha kuwunoza neza
Uwahabwaga umwanya wese yagaragazaga ko inkunga yahawe azayibyaza umusaruro
Umuyobozi ushinzwe kubaka Ubushobozi bw’Urubyiruko muri Minisiteri y’Urubyiruko n’Umuco, Tetero Solange, yasabye uru rubyiruko kudapfusha ubusa amahirwe rwahawe
Urubyiruko rugera kuri 40 ni rwo rwahawe iyi nkunga yo kurufasha gutegura imishinga yarwo
Umufashamyumvire w'abahuguye mu rwego rwo guteza imbere imishinga yabo yavuze ko bazakomeza kubaherekeza
Umuhire Gisèle wo mu Karere ka Gasabo afite umushinga wo gutubura ibiti by’imbuto ziribwa hagamijwe kurengera ibidukikije no kurwanya imirire mibi
Umuyobozi mukuru wa Dot Rwanda, Uwamutara Violette, yasabye uru rubyiruko guharanira ishema ryarwo muri iyi mishinga
Aya mafaranga azafasha uru rubyiruko mu gutangira imishinga y’iterambere
Abanyabugeni n'abanyamideli na bo bagenewe inkunga
Imishinga izarebana n'ikoranabuhanga yahawe inkunga
Uru rubyiruko rwahize kuzakoresha neza amafaranga rwahawe
Uru rubyiruko rwasabwe guharanira impinduka muri sosiyete Nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .