Ba Ntaganda na Ingabire bashaka kugarura iyi ngengabitekerezo tugomba tubabwira tuti have – Dr Bizimana

Yanditswe na IGIHE
Kuya 15 Mata 2019 saa 09:17
Yasuwe :
0 0

Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, Dr Bizimana Jean Damascène, yasabye abanyarwanda kudaha umwanya abashaka kugarura ingengabitekerezo yagejeje kuri Jenoside yakorewe abatutsi, barimo n’abanyapolitiki nka Ingabire Victoire na Bernard Ntaganda.

Ni ubutumwa yatanze mu kiganiro yahaye Polisi y’u Rwanda ku wa Kane, mu muhango wo Kwibuka Jenoside yakorewe abatutsi mu 1994. Cyitabiriwe n’abapolisi bakuru n’abandi bo ku nzego zitandukanye.

Yasobanuye uburyo ingengabitekerezo ya Jenoside yacengejwe mu banyarwanda guhera mu 1957 bitangijwe n’abakoloni b’Ababiligi na bamwe mu bayobozi muri Kiliziya Gatolika, ihererekanywa kugeza mu 1994 ubwo Jenoside yakorwaga igahitana abasaga miliyoni imwe.

Dr Bizimana yagize ati “Igihugu cyacu cyubakiye kuri ubu bugome, kuri uru rwango, kuri aya mateka. Iyo abantu bageze aho bica abana, bakica, impinja, bakabyaza abagore batwite, byakomotse kuri uru rwango, kuri ubu bugome bari barigishijwe. Mureke rero dukomeze dufatanye, mu mwuga wanyu mushinzwe wo kurengera umutekano w’igihugu, ubutabera, mubikorane ubuhanga nk’ubwo mubikorana, mumenya ko twanavuye kure.”

Yavuze ko nubwo abanyarwanda bazi ingaruka za Jenoside yakorewe Abatutsi hari abagifite ingengabitekerezo yayo urebye ibyandikwa ku mbuga nkoranyambaga n’ibitekerezo bitangwa mu binyamakuru bitandukanye.

Dr Bizimana yakomoje ku rugero rw’abana aheruka kubona i Zaza mu Ntara y’Amajyepfo bakinira ku muriro, umwana umwe akoramo arashya, bagenzi be batangira kugendera kure aho wari ucanye n’igihe wari wazimye.

Ibyo ngo byamweretse ko iyo umuntu yabonye ko hari ikintu gishobora kumukomeretsa cyangwa kumubabaza, ahora yikanga bityo agafata ingamba zo kutahasubira. Uko ngo niko Abanyarwanda bakwiye gufata ingengabitekerezo ya Jenoside kuko bazi aho yabagejeje.

Ati “Abayifite tubarwanye ku buryo bwose bushoboka. Buriya nk’iyo haje abantu bashaka gushinga imitwe ya politiki, ba Bernard Ntaganda, ba Ingabire, bakaza bashaka kugarura bene iyi ngengabitekerezo, umuntu azi neza uko imeze, imiterere yayo n’aho yagejeje abantu, tugomba kujya duhita tubabwira tuti have! Ntidutinye kubakurikirana, ntidutinye kubahana, igihe bigaragara ko ari aha bashaka kugarura u Rwanda. Abazungu babashyigikiye nibashaka basakuze, ariko twe ntitwakwemera ibyo.”

Ingabire Victoire aheruka gufungurwa ku mbabazi za Perezida muri Nzeri 2018, nyuma y’uko ku wa 13 Ukuboza 2013 Urukiko rw’Ikirenga rwamukatiye gufungwa imyaka 15 rumaze kumuhamya ibyaha byo kugambanira igihugu agamije kukibuza umudendezo no kurema umutwe w’abagizi ba nabi no gupfobya Jenoside yakorewe Abatutsi.

Umuyobozi Mukuru wungirije wa Polisi y’u Rwanda ushinzwe ubutegetsi n’abakozi, DIGP Juvénal Marizamunda, yavuze ko nubwo Jenoside imaze imyaka 25 ihagaritswe, u Rwanda rugihanganye n’ingaruka za Jenoside, ipfobya n’ihakana ryayo, abakoze Jenoside bakatiwe n’inkiko bacyihishahisha n’abandi bidegembya haba mu karere n’ahandi ku Isi.

Ati “Hari abagifite umugambi mubisha wo kugaruka gusohoza umugambi wa Jenoside barimo FDLR n’abandi bafatanyije ingengabitekerezo ya Jenoside, ndetse hari n’abari mu gihugu nabo bagifite ingengabitekerezo ishingiye ku ivangura rishingiye ku byiswe amoko.”

“Ibi byose biradusaba nka Polisi y’Igihugu n’izindi nzego z’umutekano, gukora cyane kugira ngo turwanye uwo ari we wese washaka guhungabanya umutekano w’igihugu, duharanira ko jenoside itakongera kubaho ukundi.”

Nyuma y’ibi biganiro, abapolisi bavuze ko bagiye kurushaho kuzirikana inshingano zabo, kugira ngo Jenoside itazasubira ukundi.

Inkuru bisa:

- Polisi yiyemeje guhangana n’abagishaka gukomeza umugambi wa Jenoside yakorewe Abatutsi

- Umurunga w’amateka yakongeje urwango rwagejeje kuri Jenoside yakorewe Abatutsi

Umunyamabanga Nshingwabikorwa wa Komisiyo y’Igihugu yo Kurwanya Jenoside, CNLG, Dr Bizimana Jean Damascène, yavuze ko umuntu wese ufite ingengabitekerezo agomba kurwanywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza