Kwamamaza

Muyumbu, kamwe mu duce turi kuyobokwa n’abimukira ba kavukire bakajya gusembera

Yanditswe kuya 31-08-2016 saa 15:04' na Emma-Marie Umurerwa


Abimurwa mu mujyi wa Kigali kubera ibikorwa bijyanye n’inyungu rusange, abenshi bajya gutura mu nkengero zawo, aho bagura amasambu n’ubutaka bwo kubakaho bigatuma abo bahasanze bajya gushakira imibereho ahandi.

Umujyi wa Kigali ugenda waguka ijoro n’amanywa, bityo uduce turi mu nkengero zawo tukagenda turushaho guturwa n’abimukira, ba kavukire bamwe bakabura iyo berekeza, kubera ko ngo baba barahawe amafaranga bita intica ntikize.

Umurenge wa Muyumbu ho mu Karere ka Rwamagana, uhana imbibi n’Akarere ka Gasabo na Kicukiro mu Mujyi wa Kigali, ni agace kari guturwa cyane muri iki gihe, bikaba bigoranye kuba wahabona umuntu ukubwira amateka mpamo yaho kuko ba kavukire benshi usanga batakihabarizwa.

Uyu murenge ugizwe n’ibice bibiri, icy’icyaro aho benshi muri ba kavukire bajya gutura ndetse n’icy’umujyi aho usanga habarizwa abimukira benshi kubera ko bagerwaho n’ibikorwaremezo byinshi birimo amazi, imihanda, amashanyarazi, n’ibindi ku buryo bworoshye.

Nshimiyimana Léonidas, umwe mu bimukiye ku Muyumbu yagize ati “Nahoze ntuye mu Karere ka Gasabo ahitwa i Gacuriro baratugurira bahashyira imidugudu, tuza kugura inaha kuko ariho hari hahendutse, abahoze bahatuye bamwe baguze ahandi abandi baracumbitse.”

Kamana Bosco na we wahoze atuye mu mujyi wa Kigali ari na ho akorera imirimo ye ya buri munsi avuga ko aka gace gatuwe n’abantu baturuka ahantu hatandukanye.

Yagize ati “Muyumbu navuga ko ituwe n’u Rwanda rwose kubera ko uhasanga abantu baturutse mu turere dutandukanye. Ba kavukire ni bake cyane kandi nabwo mu bice by’icyaro cyane.”

Ba kavukire ba Muyumbu bagiye gutura he?

Ba kavukire basigaye muri Muyumbu, bavuga ko abo bahoze baturanye bamwe bagiye gutura mu Mutara, Bugesera n’ahandi. Ariko kandi ngo hari n’ababuze aho berekeza kubera ko amafaranga bagurishije ubutaka bwabo yababanye iyanga.

Mukakibibi Marie, afite umuvandimwe wagurishije isambu yose yari afite, abura ahandi agura.

Yagize ati “Hari musaza wanjye yagurishije umugabane we ashiduka wose yarawumaze. Ubu araho ntafite aho kuba, kandi hari n’abandi bagiye bagurisha ubu babuze aho kwerekeza kuko bagurishije amafaranga make atabasha kugura ahandi.”

Mutiganda Léonard avuga ko ba Kavukire ba Muyumbu bagiye gutura kure.

Ati “Ntiwagurisha ku Muyumbu ngo ujye gutura mu Mujyi, abagurishije bagiye gutura mu Mutara, Bugesera, Ngoma n’ahandi kure.”

Umukozi w’Umurenge wa Muyumbu ushinzwe kubungabunga ubutaka, ibikorwa remezo n’imiturire, Batagaruka Ferdinand avuga ko umuturage wese yemerewe gutura aho ashatse.

Yagize ati “Biteganywa n’itegeko Nshinga, ingingo ya 21 ivuga ko umuturage yemerewe gutura ahantu ashatse mu gihugu. Kuva i Muyumbu si ukuva mu Rwanda. Umuturage uhavuye wenda hari n’igihe ashobora kubaho neza, icyo si ikibazo. Icyo tureba ni uko umuturage uje gutura i Muyumbu abaho neza.”

Batagaruka yakomeje avuga ko umuturage ugurishije ubutaka, abanza kumugenzura neza akamenya aho ashaka kwerekeza.

Ati “Iyo umuntu agurishije ubutaka bwe ndamubaza nti ugiye he? Nawe akambwira ati ‘Naguze isambu iruta kariya kabanza nari ndimo k’amafuti, abanyakigali bampaye ayuzuye ngiye guhinga urutoki’. Icyo gihe mba nziko ibyo itegeko riteganya mbikoze nk’umuyobozi ndetse n’ugurishije na we agiye ahantu heza.”

Akomeza avuga ko kugura no kugurisha ari ubushake bw’umuturage, igiciro nacyo ngo ni abaturage bakiyumvikaniraho, kuko ubuyobozi bw’Umurenge wa Muyumbu budafite ubushobozi bwo kugena igiciro cy’ubutaka kuri metero kare.

Umurenge wa Muyumbu uri mu yahoze ari segiteri Muyumbu muri Komini Bicumbi, Perefegitura ya Kigali Ngali, ugizwe n’Utugali dutanu n’imidugudu 35, ukaba utuwe n’abaturage basaga ibihumbi 24.

Ku Muyumbu hari kuzamurwa inyubako nyinshi zigezweho
Ibiro by'umurenge wa Muyumbu

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved