AVEGA igiye kwizihiza Yubile y’imyaka 25 yubaka icyizere cyo kubaho mu bacitse ku icumu rya Jenoside

Yanditswe na Twarabanye Venuste
Kuya 30 Nzeri 2019 saa 02:45
Yasuwe :
0 0

Umuryango w’abagizwe abapfakazi na Jenoside yakorewe Abatusti (AVEGA), ugiye kwizihiza Yubile y’imyaka 25 umaze utangiye urugendo rwo kwiyubaka no guhangana n’ingaruka za Jenoside mu banyamuryango n’abarokotse muri rusange.

Byagarutsweho, muri Kongere isanzwe ya 20 y’Uwo muryango yateranye ku Cyumweru, aho abayigize bashimye uburyo abanyamuryango biyubatse ndeste bakagira imbaraga zo gukomezanya n’abandi Banyarwanda kubaka igihugu nyuma ya Jenoside yabashegeshe.

Perezida wa AVEGA, Mukabayire Valerie, yavuze ko bashimira abanyamuryango bemeye gukora urwo rugendo kandi bakabishobora.

Ati “Muyi iyi myaka 25 icyo AVEGA yishimira ni urugendo yakoze kuva Jenoside ikirangira. Urugendo nta kindi rwari rugamije, kwari ugufasha abapfakazi ba Jenoside kuva mu bwigunge bari barimo, kwiyubaka no guhangana n’ingaruka za Jenoside bakagira ahantu bagera bagatangirana n’abandi banyarwanda kubaka igihugu. Icyo twishimira urwo rugendo bararukoze ni rurerure ariko ni na rugufi.”

Muri urwo rugendo, uwo muryango uvuga ko mu byo wagezeho wishimira ari uko wafashije abari basigaranye imfubyi kuzirera, ubu benshi akaba ari urubyiruko abandi barubatse ingo.

Hari abasigiwe ubumuga n’indwara zikomeye na Jenoside babonye ubuvuzi kandi bakomeje kwitabwaho ndetse n’ubuvugizi bwo kwita ku basigaye ari incike bagenda bagera mu za bukuru, bwatumye hubakwa inzu zo kubashajisha neza, ziswe Impinganzima.

Ku bufatanye n’abaterankunga; AVEGA ifite umujyanama ku ihungabana muri buri Karere no mu bitaro Bikuru by’Ikitegererezo, ibafite ku bigo nderabuzima byayo ndetse no mu mishinga yose ikora haba harimo umujyanama ku ihungabana, ifite kandi abakorerabushake ku byerekeye Ihungabana muri buri murenge.

AVEGA iteganya ko mu mwaka wa 2019/20, bazibanda cyane ku guhangana n’ihungabana, ibibazo mbonezamategeko abanyamuryango bahura nabyo, ubuvuzi, kwita no kubungabunga ubuzima bw’abanyamuryango bandujwe Virusi itera SIDA no gufasha abanyamuryango kwivana mu bukene bukabije.

Ibibazo by’amacumbi nabyo ngo bizakomeza gushakirwa umuti kandi bakomeze kwita ku babyeyi b’ Intwaza baba mu Impinganzima.

Abanyamuryango ba AVEGA ubu ngo bariyubatse kuburyo bamwe bari mu matsinda yo kwizigamira no mu mishinga iciriritse ibyara inyungu ndetse abandi batangiye no gukorana n’ibigo by’imari.

Kwiyubaka kwabo kimwe n’abandi barokotse Jenoside muri rusange, bifatwa nk’igikorwa cy’ubwitange nkuko byagarutsweho na Perezida Paul Kagame mu ijambo ritangiza kwibuka ku nshuro ya 25 Jenoside yakorewe Abatutsi.

Yavuze ko “bigoye kumva no gusobanura ukwigunga n’umubabaro by’abarokotse Jenoside, ariko kandi ko igihugu kidasiba kubasaba kwitanga kugira ngo cyongere kigire ubuzima. kuko ari bo bonyine bafite icyo batanga: imbabazi.”

Yavuze ko bakomeje kwikorera uwo mutwaro uremereye batinuba. Bifasha Abanyarwanda kuba beza kurushaho, no kunga ubumwe buhamye.

Umuryango AVEGA washinzwe n’abapfakazi ba Jenoside 50 mu 1995, ugamije kwegeranya abari basigaye iheruheru, nta mwana cyangwa umuryango n’abari basigaranye imfubyi bagomba kwitaho kandi badafite aho kuba n’imitungo yasahuwe. Kwari ukugira ngo bahumurizanye bave mu bwigunge, bongere kubaho.

Yubire iteganyijwe mu ntangiro z’umwaka utaha wa 2020, kuko nubundi AVEGA yashinzwe muri Mutarama 1995.

Abagize kongere barimo abashinze AVEGA mu 1995
Abanyamuryango bishimira ko mu myaka 25 bagize imbaraga zo kubaho n'ubufatanye mu kubaka igihugu
Bagaragaje ko bagomba kugira uruhare mu bikorwa bibateza imbere ubwabo n'igihugu muri rusange
Bishimira ko abanyamuryango ba AVEGA bageze mu za bukuru bari kubona amasaziro meza
Bishimiye urugendo bafatanyijemo muri iyo myaka
Murebwayire Josephine, umunyamuryango wa AVEGA akaba n'umurinzi w'igihango yibukije ko bagomba gukomeza kwimakaza ubumwe n'ubwiyunge kugira ngo bakomeze gutera imbere
Uhagarariye AVEGA mu Ntara y'Iburengerazuba avuga ko abanyamuryango bashyize imbaraga mu kwiyubaka no kubaka igihugu
Umuyobozi wa AVEGA Madame Mukabayire Valerie avuga ko bishimira ko urugendo rwari rurerure ariko bakarushobora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza