Kwamamaza

Arenga miliyari yo muri Girinka, Mituweli na VUP yanyerejwe mu myaka ibiri

Yanditswe kuya 12-09-2016 saa 16:23' na Jean Pierre TUYISENGE


Ubushinjacyaha bukuru bwa Repubulika y’ u Rwanda bwagaragaje ko amafaranga asaga miliyari 1.5 yaburiwe irengero mu myaka ibiri y’ingengo y’imari, bukavuga ko igice kinini cy’aya mafaranga kingana na miliyari 1.3 yari ayagenewe kuzamura imibereho y’abaturage.

Izo gahunda zikubiyemo gahunda y’ubwisungane mu kwivuza (Mutuelle de Santé) yanyerejwemo angana na miliyoni 557, VUP yanyerejwemo angana na miliyoni 454, ndetse na gahunda ya Girinka yanyerejwemo agera kuri miliyoni 269. Iyi mibare ngo ni iy’imyaka y’ingego y’imari ya 2014/2015 na 2015/2016.

Imanza 100 zarimo abantu 179 bari biganjemo abayobozi bo mu nzego z’ibanze, mu mirenge n’uturere nkuko imibare y’ubushinjacyaha bukuru bwa Repubulika y’u Rwanda ibigaragaza.

Ahandi hagaragaye inyerezwa rikabije ry’umutungo wa Leta wari ugenewe kuzamura Imibereho y’abaturage ni mu Murenge SACCO, aho Miliyoni 246.5 zanyerejwe mu mwaka umwe w’ingengo y’imari, ndetse na Gahunda ya Nkunganire y’inyongeramusaruro yanyerejwemo angana na Miliyoni 4 mu mwaka ushize w’ingengo y’imari.

Nubwo bimeze gutya, ngo umubare w’imanza zijyanye n’ibi byaha zaciwe uracyari muke, kuko ngo nko mu mwaka w’ingengo y’imari wa 2014/15, imanza 13 zarimo abaregwa 20 nizo zaburanishijwe, abagera kuri 17 bahamwa n’ibyaha mu gihe abandi 3 bagizwe abere.Abahamijwe ibyaha bategetswe kwishyura miliyoni 32.

Mu mwaka w’ingengo y’Imari wa 2015/2016 haciwe imanza 32 zaregwagamo abantu 71, aho abagera kuri 23 bahamijwe ibyaha abandi 26 bagirwa abere.

Umuvugizi w’ubushinjacyaha bukuru bwa Repubulika y’u Rwanda Faustin Nkusi aganira na The new times mu cyumweru gishize yagize ati “ Amategeko arahari kandi icyo dushinzwe ni ugukora iperereza kuri ibi byaha, tukabikurikirana, twabona ari ngombwa tukajyana ibirego mu nkiko.”

Yongeyeho ko abayobozi bakwiye kwitondera gahunda Leta yashyizeho zo kuzamura abaturage, bakora uko bashoboye inkunga zikagera kubo zigenewe, kuko gukoresha nabi iyi nkunga bidindiza iterambere ry’igihugu.

Hari gukorwa iki ngo harandurwe iki kibazo?

Ladislas Ngendahimana, umuvugizi wa Minisiteri y’ubutegetsi bw’igihugu, yemeza ko hagaragara imbaraga nke mu gukurikirana imikoreshereze y’inkunga ziba zagenewe gahunda zigamije kuzamura imibereho y’umuturage, akavuga ko hakwiye kwimakazwa umuco wo kumva ko biri mu nshingano za buri wese (Accountability).

Gusa yavuze ko nubwo bimeze bityo, hashyizwe imbaraga nyinshi mu kugabanya ibyaha bikorerwa mu nzego z’ibanze cyane ibishingiye ku inyerezwa ry’amafaranga ya gahunda zigamije kuzamura umuturage.

Yagize ati “ Aho tumaze kugera, twabonye ko habayeho intege nke, gusa twabibonye nyuma y’uko amafaranga akoreshwa nabi bitewe no kudashyiraho uburyo buhamye bwo kubigenzura, ariko ubu ku rwego rwa Minisiteri twashyizeho urwego rushinzwe igenzura mu nzego z’ibanze ndetse n’abayobozi barwo bazafasha abayobozi b’inzego z’ibanze guhangana n’ikoreshwa nabi ry’inkunga zigenewe abaturage."

Ngendahimana avuga kandi ko ibikorwa byo kuzuza abazaba bagize uru rwego bikomeje kuburyo mu ntangiriro z’umwaka utaha uru rwego ruzaba rwatangiye gukora akazi karwo.

Yagize ati "Komite ngenzuzi ku nzego z’ibanze yashyizweho ndetse Njyanama y’umurenge yahawe inshingano yo kujya ikurikirana niba inkunga za gahunda zigamije kuzamura umuturage zirimo iya Girinka, Ubudehe na VUP zigera ku bo zagenewe kuko mu gihe gishize Abanyamabanga Nshingwabikorwa b’imirenge babikoraga bonyine.”

Ngendahimana yavuze ko hari uburyo bw’ikoranabuhanga bwitwa , “Monitoring Evaluation and Information System” bwashyizweho bwo gukurikirana ndetse no gusesengura amakuru yo mu nzego z’ibanze mu rwego rwo kwizera ko byose byakozwe neza. Iri koranabuhanga ngo rizamurikwa ku mugaragaro mu kwezi gutaha.

Umuyobozi ushizwe iby’amatungo mu kigo cy’igihugu cy’ubuhinzi n’ubworozi RAB, Dr.Christine Kanyandekwe, yavuze ko nyuma yo kubona uburyo gahunda ya Girinka yacunzwe nabi, Minisiteri y’Ubuhinzi n’ubworozi yasohoye amabwiriza y’uko gutoranya umugenerwabikorwa muri iyi gahunda bizakorwa ndetse n’ibihano bigenewe abakoresha nabi gahunda ya Girinka.

Kuri ubu gahunda ya Girinaka isigaye igenzurwa na Minisiteri y’Ubuhinzi n’Ubworozi , mu gihe VUP na gahunda y’ubudehe zicungwa n’ikigo cy’igihugu gishinzwe guteza imbere ibikorwa by’iterambere mu nzego z’ibanze (LODA).

Umuyobozi w’icyo kigo (LODA) Laetitia Nkunda, avuga ko inyerezwa ry’amafaranga ya gahunda zitandukanye zigamije kuzamura imibereho y’umuturage, ryagiye rikorwa kenshi ugasanga umuyobozi yashyize ku rutonde amazina ya baringa agafata ayo mafaranga.

Kuva gahunda zigamije gukura abaturage mu bukene zatangira mu Rwanda, kugeza ubu zimaze kuzamura umubare munini w’abaturage bari mu bukene nk’uko bitangazwa na Minisiteri y’Ubutegetsi bw’Igihugu, gusa yakunze kugaragaramo ibibazo bishingiye ku inyerezwa ryayo, kuko nko mu kwezi gushize hasohotse raporo iriho abayobozi 110 bagejejwe mu bushinjacyaha bakekwaho kunyereza miliyoni hafi 500 za Girinka,VUP n’Ubudehe.

Soma inkuru bifitanye isano Abayobozi 110 mu bushinjacyaha kubera miliyoni hafi 500 za Girinka,VUP n’Ubudehe

Gahunda ya Girinka ni imwe muri gahunda za Leta zakunze kugaragaramo amanyanga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved