Amerika yatanze miliyari 5.6 Frw y’inyongera ku nkunga yo kugoboka impunzi mu Rwanda

Yanditswe na Rabbi Malo Umucunguzi
Kuya 4 Kamena 2018 saa 12:24
Yasuwe :
0 0

Leta Zunze Ubumwe za Amerika zatanze amafaranga y’inyongera angana na miliyoni 6.5 $, hafi miliyari 5.6 Frw, nk’inkunga y’inyongera yo kugura ibiribwa bigenewe impunzi ziri mu Rwanda.

Iyo nkunga y’inyongera yagejeje ubufasha bwa Amerika bugenewe impunzi mu Rwanda kuri miliyoni 10 $, yose atanzwe muri uyu mwaka w’ingengo y’imari.

Muri Mutarama 2018, Ishami ry’Umuryango w’Abibumbye rishinzwe ibiribwa (WFP) n’irishinzwe impunzi (UNHCR), yasabye abaterankunga kugira icyo bakora kugira ngo haboneke inkunga zihabwa impunzi zicumbikiwe mu Rwanda kuko yagabanutseho 25 %.

U Rwanda rucumbikiye impunzi zisaga 130,000 zirimo Abarundi n’Abanye-Congo mu nkambi esheshatu zitandukanye, babeshwaho n’inkunga ngo babone ibibatunga.

Uretse ibiribwa hari n’abahagabwa amafaranga buri kwezi na WFP, abafasha kugura ibiribwa ku masoko abegereye.

Itangazo ryashyizwe ahagaragara n’Ikigega cya Amerika Gishinzwe Iterambere Mpuzamahanga, USAID, rivuga ko iyi nkunga y’inyongera yanyujijwe muri WFP ngo ikoreshwe mu kugura ibiribwa no kwita ku bagore batwite n’abonsa, n’abana bari munsi y’imyaka ibiri. Hari no kwita ku bana bafite ikibazo cy’imirire mibi bafite munsi y’imyaka itanu.

Rikomeza rigira riti “Nk’umuterankunga wa mbere ku Isi mu bikorwa by’ubutabazi, Leta Zunze Ubumwe za Amerika zifatanyije n’aba bantu bakeneye ubufasha. Turanasaba abandi baterankunga guhaguruka kugira ngo ibikorwa by’ibanze impunzi zikeneye hamwe ‘ibihugu byabakiriye bibonerwe umuti.”

Kugeza mu Ugushyingo 2017, WFP yatangaga ibiro 16.95 by’ibiribwa kuri buri mpunzi ku kwezi; bigizwe n’ibigori, ibishyimbo, amavuta yo guteka n’umunyu. Abandi bahabwaga Frw 7,600 (US$9) yo kugura ibiribwa mu masoko yo hafi aho.

Ariko bitewe n’inkunga zagabanyutse, byabaye ngombwa ko WFP igabanya ibyo bagenerwaga bigera kuri 90 % mu Ugushyingo n’Ukuboza. Gusa muri Mutarama uyu mwaka, inkunga zakomeje kuba nke ku buryo yageze kuri 75 % ugereranyije n’ibyo impunzi zakabaye zibona.

Muri Gashyantare uyu mwaka, UNHCR na Minisiteri Ishinzwe Impunzi mu Rwanda hamwe n’abandi bafatanyabikorwa, batangaje ko nibura kugira ngo bahaze impunzi z’Abarundi ziri mu Rwanda mu 2018 zonyine, hakenewe miliyoni 74.3 $.

Inkambi ya Kiziba icumbikiye Abanye- Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza