Amerika yareze Edward Snowden kurenga ku masezerano yagiranye n’inzego z’iperereza

Yanditswe na IGIHE
Kuya 17 Nzeri 2019 saa 09:55
Yasuwe :
0 0

Minisiteri y’Ubutabera ya Leta Zunze Ubumwe za Amerika yajyanye mu nkiko Edward Snowden imushinja ko kurenga ku masezerano yagiranye n’inzego z’ubutasi z’iki gihugu, ubwo yasohoraga igitabo cye gishya.

CNN yatangaje ko ikirego cyatanzwe kigaragaza ko Snowden ushinjwa gushyira hanze amabanga menshi yagiye agerwaho n’inzego z’iperereza za Amerika, afitanye amasezerano n’inzego zirimo CIA na National Security Agency (NSA), yasinywe hagati y’imyaka ya 2005 na 2013 ubwo yakoranaga n’izo nzego.

Ngo ayo masezerano yavugaga ko igihe Snowden yagira ikintu ashaka gutangaza kirebana n’amakuru y’iperereza, agomba gushyikiriza izo nzego inyandiko ze ngo zirebe niba amakuru azikubiyemo ntacyo atwaye. Nyamara uyu mugabo byarangiye asohoye igitabo yise ‘Permanent Record’, abikora atabanje kugaragaza inyandiko ze ngo ahabwe uburenganzira bwanditse, nk’uko amasezerano abiteganya.

Mu kirego cyashyikirijwe urukiko muri Leta ya Virginia, Minisiteri y’ubutabera yavuze ko bitewe n’uko hari amakuru yatangajwe inzego z’iperereza zidatanze uburenganzira, Leta ari yo ifite uburenganzira kuri icyo gitabo aho kuba ikigo MacMillan Publishers cyagitangaje.

Ibyo ngo bigatuma urukiko rukwiye kwemeza ko icyo kigo nta burenganzira na buke gifite ku gitabo cya Snowden, ndetse hakirindwa ko hagira ifaranga na rimwe rigikomotseho ahabwa mbere y’uko urubanza rucibwa.

Intumwa Nkuru yungirije ya Leta ya Amerika, R. Trent McCotter, yavuze ko icyo gitabo gikwiye kuba icya leta n’ibikivuyemo bikajya mu mu kigega cyihariye cyayo, kuko amakuru yatangajwe yari akiri umutungo wayo. Ikigamijwe ngo si ukubuza ko igitabo gicuruzwa, ni ikoreshwa ry’umusaruro wacyo.

Ikirego gikomeza kiti "Mu gusinya amasezerano na CIA mu bijyanye n’ibanga ry’iperereza, Snowden yahamije ko yumvise neza kandi yemeye ko Guverinoma ya Leta Zunze Ubumwe za Amerika imubitsemo icyizere mu kumwemerera kugera ku makuru y’ibanga."

Iki gitabo cyatangajwe ku wa 1 Kanama, gishyirwa ku isoko kuri uyu wa Kabiri.
Abanyamategeko ba leta bashimangiye ko "amakuru y’iperereza akwiye kurinda igihugu cyacu, aho kubyarira inyungu umuntu ku giti cye."

"Permanent Record" gikubiyemo amakuru mashya ku cyemezo Snowden yafashe mu 2013 cyo kwiba amakuru menshi ya NSA yaba ayakuwe kuri telefoni zitandukanye no kuri internet, akayakwirakwiza mu binyamakuru birimo The Guardian na The Washington Post.

Umunyamategeko wa Snowden, Ben Wizner, yavuze ko nta mabanga ya leta agikubiyemo atarigeze atangazwa na mu binyamakuru bikomeye, ndetse ngo iyo Snowden asanga gikubiyemo amakuru akeneye kugenzurwa, yari kubanza kugiha inzego zibishinzwe zikagisuzuma.

Snowden unashinjwa na Guverinoma ya Amerika ibyaha by’ubutasi no kwiba umutungo wa Amerika, aba mu Burusiya mu buhungiro yishyizemo mu myaka itandatu ishize.

Aheruka kubwira ikinyamakuru CBS ko yifuza kuzasubira muri Amerika igihe yakwizezwa ko azahabwa ubutabera bukwiye.

Edward Snowden yashinjwe kurenga ku masezerano yagiranye n'inzego z'iperereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza