Ambasaderi Nkurunziza yabaye umudipolomate wa mbere uhagarariye u Rwanda muri Kazakhstan

Yanditswe na Philbert Girinema
Kuya 29 Ugushyingo 2016 saa 09:38
Yasuwe :
0 0

Ambasaderi William Nkurunziza yashyikirije Umunyamabanga wa Leta ya Kazakhstan, Gulshara Abdykalikova, impapuro zimwemerera guhagararira u Rwanda muri icyo gihugu.

Muri Gicurasi uyu mwaka, ni nabwo Ambasaderi William Nkurunziza yashyikirije Perezida wa Turikiya, Recep Tayyip Erdoğan, impapuro zo guhagararira u Rwanda muri icyo gihugu ku rwego rwa Ambasaderi, umwanya yahawe mu Ugushyingo 2015, akanahabwa guhagararira u Rwanda mu bwami bwa Jordan, Kazarkhstan na Lebanon.

Ambasade y’u Rwanda muri Turikiya yahise itangaza ko abaye “intumwa ya mbere y’u Rwanda muri Repubulika ya Kazakhstan ibayeho.’’

Mu muhango wabereye mu Murwa Mukuru Astana kuri uyu wa Mbere tariki 28 Ugushyingo, Amb. Nkurunziza yari umwe mu ba ambasaderi icyenda batanze impapuro zabo, barimo Ian Alexander Hill wa New Zealand; Ramón Díaz Pereira wa Paraguay; Antoine Somda wa Burkina Faso; Nadir Yousif Babiker wa Sudan; Dumitru Braghis wa Moldova; Berglind Ásgeirsdóttir wa Iceland; Jean-Klod Knebeler wa Luxembourg na Ambasaderi Igor Jovovic wa Montenegro.

Gulshara Abdykalikova yavuze ko uyu muhango ubaye mu gihe icyo gihugu kiri kwizihiza isabukuru y’imyaka 25 kimaze kibonye ubwigenge, avuga ko yizeye ko “aba bambasaderi b’ibihugu by’amahanga bazateza imbere ubutwererane” na Kazakhstan.

Izi ntumwa z’ibihugu nazo zamwijeje kwagura imikoranire mu ngeri zinyuranye, anabatumira kuzitabira imurikagurisha rikomeye riri gutegurwa muri icyo gihugu, EXPO 2017,rizabera mu Muwa Mukuru Astana.

Umunyamabanga wa Leta ya Kazakhstan washyizweho n’iteka rya Perezida ryo mu 2007, ashinzwe gutegura gahunda n’ibyemezo bya Perezida bireba igihugu n’imibanire n’amahanga; guhagararira inyungu z’Umukuru w’Igihugu mu Nteko Ishinga Amategeko, mu nzego za leta, imitwe ya politiki n’izindi nzego; guhuza ibikorwa by’inama ngishwanama ya Perezida wa Repubulika; kwakira impapuro zemerera ba ambasaderi bashya gukorera muri Kazakhstan n’izindi nshingano aherewe amabwiriza na Perezida wa Repubulika.

U Rwanda rukomeje kwagura amarembo n’ibindi bitandukanye ku Isi hagamijwe ubuhahirane, haba ari ku bihugu byo muri Afurika no hanze yayo.

Ambasaderi Williams Nkurunziza yigeze kuyobora Ikigo gishinzwe guteza imbere ishoramari n’ibyoherezwa mu mahanga (RIEPA) cyasimbuwe na RDB, aba Ambasaderi mu Buhinde anahagarariye Bangladesh na Sri Lanka, aza kwimurirwa mu Bwongereza mu 2013.

Abambasaderi icyenda nibo bakiriwe
Ambasaderi William Nkurunziza ashyikiza Umunyamabanga wa Leta ya Kazakhstan, Gulshara Abdykalikova impapuro zimwemerera guhagararira u Rwanda muri icyo gihugu
Ambasaderi Nkurunziza aganira na Gulshara Abdykalikova

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244