Ambasaderi Higiro yamurikiye ICAO icyemezo cy’u Rwanda cy’ikoreshwa rya Pasiporo z’ikoranabuhanga

Yanditswe na Uwimana Abraham
Kuya 30 Mutarama 2021 saa 01:40
Yasuwe :
0 0

Ambasaderi w’u Rwanda muri Canada akaba n’intumwa yarwo mu Muryango Mpuzamahanga ushinzwe iby’indege za gisivili (ICAO), Higiro Prosper, yamurikiye uyu muryango icyemezo cy’u Rwanda cyemeza ikoreshwa rya pasiporo nyarwanda zikoranye ikoranabuhanga.

Kuri uyu wa 29 Mutarama 2021 nibwo Ambasaderi Higiro yerekanye iki cyemezo (digital certificate) mu birori byabereye ku cyicaro cya ICAO i Montreal muri Canada.

Iki gikorwa cyerekanye intambwe ikomeye itewe mu ikoreshwa rya pasiporo Nyarwanda ikoranye ikoranabuhanga.

Pasiporo Nyarwanda ya Afurika y’Iburasirazuba ikoranye ikoranabuhanga yatangiye gutangwa mu Rwanda ku wa 28 Kamena 2019, mu mwaka ushize nibwo Urwego Rushinzwe Abinjira n’Abasohoka rwasohoye itangazo rivuga ko pasiporo zose zatanzwe mbere y’iyo tariki zizacyura igihe guhera ku wa 28 Kamena 2021, hagatangira gukoreshwa gusa Pasiporo Nyarwanda ya Afurika y’Iburasirazuba ikoranye ikoranabuhanga.

Ubwo hatangizwaga ikoreshwa rya Pasiporo Nyarwanda ya Afurika y’Iburasirazuba ikoranye ikoranabuhanga mu 2019, Urwego rw’Abinjira n’Abasohoka rwatangaje ko ari pasiporo ifite ibirango by’umuco nyarwanda, nko kuba irimo inzu ya Kinyarwanda, inzu igenzweho ya Kigali Convention Centre, intore ndetse n’umubyinnyi.

Ikindi kandi ngo izi pasiporo zikoranye ibimenyetso by’umutekano bituma byagorana cyane kuyigana, bikaba bizatuma irushaho kwizerwa ku ruhando mpuzamahanga.

Iyi pasiporo ikoranye ikoranabuhanga (e-passport), igizwe n’ibyiciro bitatu, birimo pasiporo isanzwe (ordinary passport), ifite ibara ry’ubururu bwerurutse, ikoreshwa mu ngendo zisanzwe kandi igahabwa buri munyarwanda wese uyifuza, nayo ikaba irimo ibyiciro bitatu bitandukanywa n’ikiguzi cya buri pasiporo.

Hari pasiporo isanzwe ihabwa abana, ikagira amapaji 34 kandi ikazajya imara imyaka ibiri. Iyi pasiporo igurwa amafaranga ibihumbi 25 y’u Rwanda, hari kandi pasiporo isanzwe y’abantu bakuru, ifite amapaji 50, yo ikazajya itangwa ku kiguzi cy’amafaranga ibihumbi 75 by’amafaranga y’u Rwanda, igakoreshwa mu gihe cy’imyaka itanu.

Hakaba na pasiporo isanzwe ihabwa abantu bakuru, ikaba ifite amapaji 66, yo ikaba igurwa amafaranga ibihumbi 100, kandi igakoreshwa mu gihe cy’imayaka 10.

Pasiporo ikoranye ikoranabuhanga kandi ifite icyiciro cya pasiporo z’akazi zihabwa abakozi ba Leta bajya mu butumwa bw’akazi.

Ambasaderi Higiro yerekanye icyemezo cy’u Rwanda cy’ikoreshwa rya pasiporo zikoranye ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .