00:00:00 IGIHE NETWORK KN KINYARWANDA EN ENGLISH FR FRANCAIS

Amb. Yamina Karitanyi yasabye kwita ku mihindagurikire y’ikirere mu bikorwa by’ubucukuzi bw’amabuye y’agaciro

Yanditswe na IGIHE
Kuya 2 Ugushyingo 2021 saa 09:26
Yasuwe :
0 0

Umuyobozi Mukuru w’Ikigo gishinzwe Mine, Peteroli na Gaze mu Rwanda (RMB), Amb. Yamina Karitanyi, yasabye abafite aho bahuriye n’ibikorwa by’ubucukuzi bw’amabuye y’agaciro kwita ku ngaruka z’imihindagurikire y’ikirere mu bikorwa byabo.

Ibi yabigarutseho kuri uyu wa Kabiri afungura ku mugaragaro inama mpuzamahanga ihuza abashoramari, inzobere n’abandi bakora mu rwego rw’ubucukuzi bw’amabuye y’agaciro muri Afurika “Africa Mining Forum.

Iyi nama ngarukamwaka y’iminsi itatu iri kuba hifashishijwe ikoranabuhanga itegurwa n’Ikigo Vuka Group ku bufatanye na RMB iba yitezweho gukemura imbogamizi zikigaragara muri uru rwego.

Bimwe mu bibazo byugarije ubucukuzi bw’amabuye y’agaciro by’umwihariko muri Afurika ni ibikorwa byangiriza ibidukikije bikagiramo bigatera n’ingaruka ku mihindagurikire y’ikirere.

Isanganyamatsiko y’uyu mwaka iragira iti “Gusesengura no kunoza amahame ajyanye no kwita ku bidukikije, imibereho myiza n’imiyoborere inoze y’amasosiyete.”

Ni insanganyamatsiko yitsa cyane ku kwita ku bidukikije n’imibereho myiza y’abaturage mu bucukuzi bw’amabuye y’agaciro.

Abitabiriye iyi nama bari kurebera hamwe uko ubucukuzi bwakorwa butangiza ibidukikije kandi bunita ku mibereho myiza y’abaturage ndetse no gufata neza abakozi n’abaturage bafite aho bahuriye n’ibikorwa by’izi sosiyete.

Amb. Yamina Karitanyi yavuze ko iyi nama ari umwanya abashoramari, leta n’abandi babonye wo gutekereza ku bucukuzi burambye bufite amahame yo kwita ku mihindagurikire y’ikirere no kwita ku ngamba zo guhangana n’iki kibazo, kugabanya imyuka ihumanya ikirere, ndetse sosiyete zikarushaho gukorera mu mucyo zikabana n’abaturage neza.

Yongeraho ko ubucukuzi butagomba kubonwa nk’imbogamizi ati “Ubucukuzi ntibugomba gufatwa nk’ikibazo mu baturage ahubwo bugomba kubonwa nk’amahirwe yo guhindura ubuzima bwa buri muturage ufite aho ahuriye nabwo.”

Umuyobozi ushinzwe gutegura ibikorwa muri Vuka Group ari nayo itegura iyi nama ku bufatanye na RMB, Elodie Delagneau, yavuze ko amasosiyete y’ubucukuzi ari kugenda ahindura imyumvire.

Yakomeje ati “Ubu ntibikiri bya bindi byo kurwanira kuba sosiyete ikomeye ku Isi ahubwo ni ukuba sosiyete ibereye Isi.”

Mu mwaka w’ingengo y’imari wa 2019/2020, u Rwanda rwasaruye miliyoni zisaga 730$ mu bikorwa by’ubucukuzi bw’amabuye y’agaciro.

Miliyari ziri hagati 8-10$ zishorwa mu bikorwa by’ubucukuzi bw’amabuye y’agaciro ku Isi nibura 50% byayo ashorwa muri Afurika mu gihe uyu mugabane wikubiye hejuru ya 60% by’amabuye y’agaciro yose agaragara ku Isi.

Umuyobozi Mukuru w’Ikigo gishinzwe Mine, Peteroli na Gaze mu Rwanda (RMB), yasabye kwita ku mihindagurikire y’ikirere mu bikorwa by’ubucukuzi bw’amabuye y’agaciro
Inama mpuzamahanga ihuza abashoramari, inzobere n’abandi bakora mu rwego rw’ubucukuzi bw’amabuye y’agaciro iri kuba hifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .