00:00:00 IGIHE NETWORK KN KINYARWANDA EN ENGLISH FR FRANCAIS

Amb. Mutsindashyaka yatanze impapuro zimwemerera guhagararira u Rwanda muri Repubulika ya Congo

Yanditswe na Bukuru JC
Kuya 9 Nyakanga 2021 saa 01:39
Yasuwe :
0 0

Ambasaderi Théoneste Mutsindashyaka yashyikirije Perezida wa Republika ya Congo, Denis Sassou N’Guesso, impapuro zimwemerera guhagararira u Rwanda muri icyo gihugu, igikorwa cyabaye ku wa Kane tariki ya 8 Nyakanga 2021, mu Ngoro y’Umukuru w’Igihugu i Brazzaville.

Mu kiganiro bagiranye, Perezida Denis Sassou N’Guesso yashimye umubano n’ubushuti u Rwanda na Congo Brazzaville bifitanye n’uruhare rwa Perezida Kagame mu guteza imbere u Rwanda, hamwe n’umurava we mu guharanira icyateza imbere Afurika Yunze Ubumwe.

Yavuze kandi ko igihugu cye cyiteguye gufatanya n’u Rwanda mu kuzamura imikoranire igamije kuzamura ubukungu bw’ibihugu byombi.

Ambasaderi Mutsindashyaka nyuma yo gutanga ubutumwa yahawe na Perezida Kagame, yatangaje ko yishimiye guhagararira u Rwanda muri Congo isanzwe ifitanye umubano mwiza n’u Rwanda, anizeza Perezida Denis Sassou N’Guesso ko azakomeza gushimangira ubufatanye ndetse n’umubano mwiza biri hagati y’ibihugu byombi.

Yavuze kandi ko azaharanira kuzamura ubuhinzi, ubworozi ndetse n’inganda zitunganya ibibikomokaho. Ibi bizashyirwamo ingufu hifashishijwe amasezerano y’umubano n’ubufatanye hagati y’inzego z’ubuyobozi zibishinzwe, kugira ngo bigirire akamaro abaturage b’u Rwanda na Congo.

Ambasaderi Mutsindashyaka yongeyeho ko azafatanya n’abandi bayobozi, agakora ibishoboka byose kugira ngo uyu mubano urusheho kungura ibihugu byombi mu bijyanye n’ubuhahirane, ubukerarugendo no bindi bifitiye akamaro ibihugu byombi ndetse n’umugabane wa Afurika muri rusange.

Ambasaderi Théoneste Mutsindashyaka ubwo yashyikirizaga Perezida wa Republika ya Congo, Denis Sassou N’Guesso, impapuro zimwemerera guhagararira u Rwanda muri icyo gihugu
Ambasaderi Théoneste Mutsindashyaka yagiranye ibiganiro na Perezida wa Republika ya Congo, Denis Sassou N’Guesso
Ambasaderi Théoneste Mutsindashyaka hamwe na Perezida wa Republika ya Congo, Denis Sassou N’Guesso nyuma yo kumushyikiriza impapuro zimwemerera guhagararira u Rwanda muri Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .