Amb.Mugambage yatanze impapuro zimwemerera guhagararira u Rwanda muri Sudani y’Epfo

Yanditswe na Kanamugire Emmanuel
Kuya 1 Ukwakira 2016 saa 08:57
Yasuwe :
0 0

Ambasaderi Frank Mugambage yashyikirije Perezida wa Sudani y’Epfo, Salva Kiir impapuro zimwemerera guhagararira u Rwanda muri iki gihugu, ku wa Gatatu w’icyumweru gishize.

Amb. Mugambage usanzwe uhagarariye u Rwanda muri Uganda, agiye kubifatanya na Sudani y’Epfo ariko icyicaro cye kiri i Kampala.

Itangazo ryashyizwe ahagaragara na ambasade y’u Rwanda muri Uganda rivuga ko Amb. Mugambage yashyikirije Kiir intashyo zivuye kuri Perezida Paul Kagame ndetse aniyemeza gukomeza gushimangira umubano w’ibihugu byombi aho yanagaragaje uruhare rwe mu ishyirwa mu bikorwa ry’imishinga y’akarere Sudani y’Epfo ihuriyeho n’u Rwanda.

Ku ruhande rwe perezida Kiir yakiriye Amb.Mugambage muri Sudani y’Epfo amubwira ko igiye kuba nk’igihugu cye cya kabiri.

Yakomeje kandi ashima ubufasha u Rwanda rwahaye igihugu cye ndetse anavuga imyato uburyo ubu rufite amahoro kandi rukomeje gutera imbere nyuma y’amateka mabi, ibi bikamuha icyizere ko na Sudani y’Epfo izabigeraho.

Kiir kandi yanashimye ibikorwa by’ingabo z’u Rwanda ziri mu butumwa bw’amahoro muri Sudani y’Epfo (UNMISS) kubera ko zikora ibyo zishinzwe neza.

The Newtimes dukesha iyi nkuru ivuga ko uretse gutanga impapuro zimwerera guhagararira u Rwanda muri Sudani y’Epfo, Amb. Mugambage yanahuye n’abanyarwanda baba mu mujyi wa Juba bamugaragarije ko bamwishimiye.

Mu biganiro bagiranye bamweretse imbogamizi bakomeje guhura nazo, na we abasaba kutemera ko zibaca intege mu kugaragaza isura nziza y’u Rwanda.

Yagiranye ibiganiro kandi n’ingabo n’abapolisi b’u Rwanda bari mu butumwa bw’amahoro bw’Umuryango w’Abibumbye (UNMISS), aho yabibukije guhora iteka bashyira imbere indangagaciro ziranga inzego z’umutekano mu Rwanda zirimo gukunda igihugu, ubwitange, kongera ubumenyi binyuze mu myitozo n’ikinyabupfura.

Mugambage kandi yanagiranye ibiganiro n’abambasaderi bo mu bihugu bigize umuryango w’ubukungu, IGAD aho bamusobnanuriye muri rusange uko ibintu byifashe muri Sudani y’Epfo.

Ambasaderi Mugambage ubwo yatangaga impanuro ku munsi wahariwe Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza