Amb. Kayonga yavuye imuzi uruhare rw’u Bushinwa mu iterambere ry’u Rwanda

Yanditswe na Rabbi Malo Umucunguzi
Kuya 19 Mata 2017 saa 11:17
Yasuwe :
3 2

Ambasaderi w’u Rwanda mu Bushinwa, Charles Kayonga, avuga ko uruzinduko rwa Perezida Kagame mu Bushinwa rwabaye ingirakamaro, rukaza rushimangira umubano wari usanzwe mu bucuruzi n’ubukungu, umaze imyaka isaga 45.

Mu kiganiro Ambasaderi Kayonga yagiranye n’ikinyamakuru Global Times, yagaragaje byinshi ku mubano w’u Rwanda n’u Bushinwa, uko abona itandukaniro hagati y’ishoramari ry’Abashinwa n’ibindi bihugu muri Afurika, impamvu u Rwanda rukomeje gutera imbere n’ibindi.

Kuwa 17 Werurwe 2017 nibwo Perezida Kagame yagiriye uruzinduko rw’iminsi ibiri mu Bushinwa, icyo gihe akaba yaragiranye ibiganiro na mugenzi we Xi Jinping.

Ni ibiganiro Amb. Kayonga abona byaravuyemo umusaruro ntagereranywa kuko byagenaga uburyo impande zombi zarushaho gukorana.

Yavuze ko muri ibyo biganiro abakuru b’ibihugu bombi bagize umwanya wo gutekereza ku buryo bumva ibintu no guteza imbere urwego rw’umubano hagati y’ibihugu byabo, cyane ko yaba ishyaka ry’abakomunisiti riyoboye u Bushinwa na FPR Inkotanyi iyoboye u Rwanda, yombi yubakiye kuri politiki ishyira imbere abaturage.

Hari ibituma u Rwanda rukomeza gutera imbere

Nyuma ya Jenoside yakorewe Abatutsi mu 1994, u Rwanda rwazamuye ubukungu bwarwo ku rwego rufatika, Amb. Kayonga avuga ko byose byashingiye ku miyoborere rufite.

Yagize ati “Guhera mu 1994, dufite guverinoma iha umwanya uhagije iterambere. Bityo imiyoborere ni ingenzi cyane. Icya kabiri dufite umutekano mu gihugu cyacu, utuma tubasha gukora icyo twifuza.”

Mu gihe cyashize ngo Guverinoma y’u Rwanda yahaye umwanya politiki yatanyaga abaturage idashobora kubageza ku iterambere, ariko guverinoma iriho uyu munsi ishyize imbere ubumwe no kongera kwiyubaka.

Ati “Imiyoborere n’umutekano nibyo bintu bibiri by’ingenzi iterambere ry’u Rwanda ryubakiyeho.”

Muri urwo rugendo rwo kwiyubaka kandi Amb. Kayonga yavuze ko ishoramari ry’u Bushinwa ribigiramo uruhare, aho uyu munsi ibigo byo muri icyo gihugu biri mu Rwanda bikora imishinga itandukanye nk’ubwubatsi.

Yakomeje agira ati “Biri kugira uruhare mu mishinga y’ibikorwa remezo, nk’urugero mu bwubatsi bw’imihanda n’inyubako. Bari no muri serivisi nk’ubuzima, aho dufite inkunga nini y’Abashinwa, dufite ibitaro bibiri byubatswe n’u Bushinwa. Mu buhinzi, mu Rwanda dufite imishinga yo kuhira iri gukorwa n’ibigo byo mu Bushinwa.”

“Hari n’ibigo by’ubushakashatsi mu buhinzi u Bushinwa bwashoyemo imari kandi biri gufasha cyane abaturage kwivana mu bukene, nko mu buryo bwo guhingamo ibihumyo.”

Amb. Kayonga yanavuze ko u Bushinwa buri kugira uruhare no mu iterambere ry’inganda mu Rwanda, cyane muri gahunda ya ‘Made in Rwanda’.

Yakomeje agira ati “Muri iyo gahunda, turashishikariza cyane ibigo byo mu Bushinwa n’ahandi kuza bigashora imari hano kugira ngo tubashe gukora ibicuruzwa byacu.”

Mu burezi naho ngo u Bushinwa ntibwatanzwe, aho butanga buruse ku banyeshuri b’Abanyarwanda, bugafasha mu kubaka amashuri mu gihugu cyane cyane atangirwamo ubumenyi ngiro.

Yakomeje ati “Icyerekezo cy’u Rwanda ni ukubaka ubukungu bushingiye ku bumenyi n’ikoranabuhanga kugira ngo tubashe kongera ubumenyi bw’abakozi dufite. Niyo mpamvu turi gukomeza uyu mubano n’u Bushinwa mu rwego rw’uburezi.”

Hari abatabona kimwe ishoramari ry’u Bushinwa muriu Afurika

Ibihugu byo mu Burengerazuba bw’Isi bishinja u Bushinwa kuzamura izina ryabwo muri Afurika kubera ikigega cy’imitungo kamere kitarakorwaho na rimwe kiharangwa no kwishakira isoko ry’inganda zabwo.

Gusa Amb. Kayonga avuga ko ibyo bihugu byaba bivuga ibyo kubera amateka bifite muri Afurika.

Yagize ati “Byari muri Afurika mu myaka amagana, ariko se ubu ni iki tubona muri uyu mugabane? Ubukoloni no gukomeza gushaka kugenzura ibihugu mu bundi buryo. Ubu hari impinduka mu maso ya Afurika nyuma y’uruhare rw’u Bushinwa mu myaka mirongo itatau ishize, ubwo nabwo bwateraga imbere.”

“Uko tubibona nk’u Rwanda, mu bihugu byinshi biri gushora imari muri Afurika, u Bushinwa ni imbaraga zikomeye ziri gufasha iterambere ry’umugabane wacu. Imikorere y’u Bushinwa ishingiye ku nyungu z’impande zombi n’ubwubahane, kandi nibyo biri kuba, bizanatugirira akamaro.”

Kayonga yavuze ko ubusanzwe ibihugu byo mu burengerazuba bw’Isi byagiye biha inkunga Afurika ariko ugasanga ifite ibiyiherekeje.

Yagize ati “Ndatekereza ko imikorere y’u Bushinwa ibereye Afurika. Nk’uko umugani w’umushinwa uvuga, aho guha umuntu ifi wamwigisha kuyiroba. Ndatekereza ko ibi aribyo biri gukorwa. Inkunga y’Uburengerazuba bw’Isi akenshi iba iri muri politiki kandi ikagira n’amabwiriza ayiherekeza, ibintu u Bushinwa budakora.”

U Bushinwa buri gushyira imbere cyane gahunda yo guteza imbere ibikorwa remezo by’ubwikorezi, muri gahunda izwi nka ‘One Belt and One Road initiative’. Ni gahunda Kayonga avuga ko ihura n’icyerekezo 2063 Afurika yihaye, ngo izabe ari umugabane uhahirana.

Muri Afurika y’Iburasirazuba hari umuhanda wa gari ya moshi uzazenguruka ibihugu bigize akarere, u Bushinwa bukazawugiramo uruhare runini cyane, mu bushobozi bw’amafaranga, abakozi n’ubumenyi.

Ubucuruzi hagati y’ibihugu byombi bukeneye kuzamurwa

U Rwanda rutumiza ibicuruzwa byinshi cyane mu Bushinwa ariko rukoherezayo bike, ibintu Kayonga avuga ko hari imbaraga zirongerwamo.

Yakomeje agira ati “Mu biganiro bya Xi na Kagame, impande zombi ziyemeje gushishikariza abashoramari b’Abashinwa gushora imari yabo mu Rwanda mu kuzamura urwego rw’inganda, binyuze mu guteza imbere ibice byagenewe inganda, inkunga y’amafaranga, igenamigambi n’ibindi.”

“Aho kohereza mu mahanga ibintu bibyazwa ibindi bicuruzwa, nitubyongerera agaciro ubundi tukohereza hanze ibyanyuze mu nganda, cya kinyuranyo kizagabanuka.”

Nyuma y’uruzinduko rwa Perezida Kagame mu Bushinwa, hari imishinga iri kunozwa mu birebana na politiki, inganda, iterambere ry’ubuhinzi, ubukerarugendo, ubucukuzi bw’amabuye y’agaciro, amahoro n’umutekano, ubufatanye mu kubaka ibikorwa remezo n’ibindi.

Hari nk’ikigo Yiyi Investment Management Ltd cyo mu Bushinwa cyagaragaje ubushake bwo kubaka no gukoresha igice cyagenewe inganda i Musanze no kureshya abashoramari bazahubaka inganda, ubutaka bukazatangwa na leta y’u Rwanda.

Perezida Kagame ubwo yakirwaga mu Bushinwa na mugenzi we w'iki gihugu, Xi Jinping, kuwa 17 Werurwe 2017 / Ifoto: Village Urugwiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza