Amateka ya Gereza ya 1930 yubakiwe Abanyarwanda ku nyungu z’abakoloni b’Ababiligi

Yanditswe na IGIHE
Kuya 16 Nyakanga 2018 saa 04:46
Yasuwe :
0 0

Mu ntangiriro z’uku kwezi, abagororwa ba nyuma bari basigaye muri Gereza ya Nyarugenge yari izwi nka 1930, bimuriwe muri Gereza yubatse Mageragere. Ni umunsi washyize iherezo ku mateka y’inyubako yari imaze imyaka isaga 80 icumbikira abanyarwanda bahamijwe ibyaha n’ababiketsweho.

Ubuyobozi bw’Akarere ka Nyarugenge bwatangaje ko igice kimwe cy’ubutaka bwari bwubatseho iyo gereza abashoramari bazabwubakaho amacumbi agezweho, ikindi gisigaye kikagirwa igicumbi cy’amateka.

Nkuko biteganywa n’igishushanyo mbonera cy’Umujyi wa Kigali, igice kimwe cy’iyahoze ari gereza ya 1930 kizajya mu mubare w’izindi nyubako zigaragaza amateka nka Kiliziya ya Sainte Famille, urusengero rw’aba- Presbytérienne, Kiliziya ya St Michel, St Etiènne n’umusigiti wa Alfath.

Nubwo Gereza ya 1930 yafunzwe burundu, ntabwo ari inyubako izwiho byinshi uretse wenda abayifungiwemo nabo bazi igice kimwe kijyanye n’imyaka bayibayemo.
Iyi gereza niyo ya mbere yubatswe ku butaka bw’u Rwanda, yubakwa n’abakoloni b’Ababiligi.

Umuhanga mu by’amateka, Prof Déo Byanafashe yabwiye The New Times ko iyi gereza nigirwa inzu ndangamateka, bizaba ari ingirakamaro ku bashaka kumenya amateka cyane cyane ay’abakoloni mu Rwanda.

Byanafashe avuga ko iyi nyubako ari yo yazanye mu Rwanda ubundi buryo bwo guhana abahamijwe ibyaha butari bumenyerewe, butandukanye n’uko byakorwaga mbere.

Yagize ati “Ibya gereza byari mu mico y’abanyaburayi, ntabwo ariko byari bimeze mu banyarwanda, byazanywe n’abakoloni. Igicumbi ndangamateka kizafasha mu kubika amateka y’ubukoloni iki gihugu cyanyuzemo.”

Undi munyamateka, Bernard Noël Rutikanga yavuze ko gereza zubatswe n’abakoloni zari zigamije gufungirwamo abantu b’ibigande batubahirizaga amategeko y’abakoloni.

Ati “Bifuzaga gutwara ubukungu bw’ibihugu byari bikolonijwe nta nzitizi bahuye nazo cyangwa ngo hagire ubigumuraho. Uwashakaga kwigumura ku mategeko y’abakoloni yahitaga acibwa ingufu. Kugira ngo bizere umutekano wabo, bubatse za gereza.”

Mbere y’umwaduko wa gereza mvaburayi, Rutikanga avuga ko abanyarwanda bakoze amakosa bahanwaga hashingiwe ku buremere bw’ikosa cyangwa icyaha bakoze. Hari abihanangirizwaga, abatamazwaga biciye mu buvanganzo nk’indirimbo n’ibindi, hari n’abacibwaga amande.

Avuga ko igihano cy’urupfu cyahabwaga umuntu wishe cyangwa wagambaniye igihugu. Umwami yashoboraga no gutanga ibindi bihano birimo kunyaga umutunzi bitewe n’ibyaha bikomeye yakoze.

Abakoloni bamaze kugera mu Rwanda, ibihano n’uburyo bwo guhana byahindutse.
Rutikanga ati “Gereza yari ikomeye mu Rwanda ni iya ‘1930’ yitiriwe umwaka yubatswemo. Kugeza mu 1959 imfungwa zajyagamo zabaga ari izakoze ibyaha bitandukanye nk’ubwicanyi, ubujura, guhohotera abandi, kutishyura imisoro.”

Bivugwa ko ubuzima bwo muri gereza bwari bubi cyane ku buryo uwaterwaga ubwoba ko ashobora kuhafungirwa hari ubwo yatorokeraga mu mahanga. Binavugwa ko hari abagiye bagwa muri gereza z’abakoloni kubera gufatwa nabi.

Umuvugizi w’Urwego rushinzwe Imfungwa n’abagororwa, SSP Hillary Sengabo, yavuze ko gereza ya mbere mu Rwanda itubatswe ku busabe bw’Umwami kuko iyo biba bityo hari kuba hagaragara ibindi bikorwa remezo bigamije iterambere byubatswe icyo gihe.

Yavuze ko gereza zubatswe ku nyungu z’abakoloni zigamije gucubya abashoboraga kugaragaza ibitekerezo by’ubwigenge.

Ati “Gereza ya mbere yashyiriweho abantu bashoboraga kugaragaza ko bashaka ubwigenge. Yego ishobora kuba yaranafungiwemo abandi banyabyaha ariko cyane cyane intego yari abagaragazaga kugira ibitekerezo by’ubwigenge”.

SSP Sengabo avuga ko unarebye uburyo inyubako ya gereza ya mbere mu Rwanda yari iteye, yari ihenze ku buryo abakoloni batari kuyubaka mu nyungu z’undi muntu wese utari bo.

Umunyamategeko Laurent Nkongoli, umwe mu bafungiwe muri gereza yitwa Icyitso cy’Inkotanyi mu myaka ya 1990, akagira amahirwe yo kuyitoroka, yavuze ko urebye gereza abakoloni bubakaga hirya no hino mu karere, bari biteze ko byanze bikunze ibikorwa byabo bitazishimirwa n’abaturage bakolonijwe.

Ati “Ntabwo zari gereza zigenewe abajura n’abandi banyabyaha, zari zigenewe abadashyigikiye imikorere y’abakoloni. Abakoloni bari babizi ko icyo ari cyo cyose bazaza gukorera mu bihugu bya Afurika kitazakirwa neza n’abaturage. Bari babizi ko hari abazabigumuraho”.

Muri Gashyantare 2017 nibwo abagabo bagera ku 3000 bari bafungiye muri iyi gereza bimuriwe i Mageragere. Abagore 607 bari basigayemo bimuwe tariki ya 1 Nyakanga 2018.

Igice kimwe cy'iyahoze ari gereza 1930 kizasigara ari igicumbi ndangamateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza