Amatafari ya Rukarakara yemerewe kubakishwa inzu zo guturamo

Yanditswe na Ferdinand Maniraguha
Kuya 1 Kanama 2019 saa 11:55
Yasuwe :
0 0

Ikigo cy’Igihugu gishinzwe imyubakire, Rwanda Housing Authority (RHA) cyasohoye amabwiriza yemera iyubakishwa ry’amatafari ya Rukarakara ku nzu zimwe na zimwe zo guturamo.

Ayo mabwiriza yasohotse kuri uyu wa Kane tariki ya 1 Kanama, avuga ko amatafari ya rukarakara yemewe kubakishwa ku nzu zo guturamo mu gihugu cyose ku nyubako zo mu cyiciro cya kabiri gusa.

Inyubako zo mu cyiciro cya kabiri, ni inyubako z’ubutegetsi, iziturwamo n’iz’ubucuruzi ukuyemo inganda, inyubako zibika ibintu byahumanya n’inyubako z’amavuriro zitageretse cyangwa ngo zigire igice cyo munsi y’ubutaka (basement) kandi zikaba zitarengeje ubuso bwa metero kare 200.

Amabwiriza mashya agenga imyubakishirize ya Rukarakara, avuga ko nta nzu y’ubucuruzi yemerewe kubakishwa amatafari ya Rukarakara.

Nubwo kubakisha Rukarakara byemewe mu gihugu hose, ushaka kuyubakisha azajya abanza kubisabira uruhushya aruhabwe hashingiwe ku gishushanyo mbonera cya buri karere n’umujyi wa Kigali.

Amabwiriza agira ati “Akarere cyangwa Umujyi wa Kigali bashobora kugena ibice byihariye bitemerewe kubakwamo inzu zo guturamo za rukarakara bitewe n’igenamigambi rya buri hantu kandi hakemezwa n’inama njyanama imaze kugirwa inama n’abatekinisiye bashinzwe imiturire.”

Inzu yose yo guturamo ya Rukarakara igomba kuba ifite uruhushya rwo kubaka rutangwa hakurikijwe amategeko. Uwubatse nta ruhushya afite, ahanwa hakurikijwe amategeko.

Mu mabwiriza agenga imyubakishirize ya Rukarakara, havugwamo ko itafari rya rukarakara rigomba kuba ritarengeje santimetero 20 z’ubugari, sentimetero 30 z’uburebure na sentimetero 15 z’ubuhagarike.

Inzu yose yubakishihije rukarakara igomba kuba ifite fondasiyo yubakishije amabuye hakoreshejwe sima n’umucanga. Iyo fondasiyo igomba kuba itari munsi ya sintemetero 40 z’ubujyakuzimu na sentimetero 20 hejuru y’ubutaka.

Ikigo cy’Igihugu cy’imyubakire yatangaje ko mu rwego rwo kunoza imyubakire y’inzu zo guturamo, abafundi bose bagomba kwibumbira mu mashyirahamwe.

Ayo mashyirahamwe agomba kugirana amasezerano y’imikoranire na buri karere abarizwamo. Nta mufundi wemerewe gukora imirimo y’ubwubatsi bw’inzu za rukarakara atari mu ishyirahamwe.

Impushya zo kubakisha Rukarakara mu turere zitangwa n’umurenge naho mu mujyi wa Kigali zigatangwa n’ishami rishinzwe ubutaka, ibikorwa remezo n’imiturire mu karere.

Mu myaka ya 2007 nibwo rukarakara zabujijwe kubakishwa mu mujyi wa Kigali. Kuva icyo gihe no mu bice bimwe na bimwe byo hanze ya Kigali naho batangiye kugenda bazibuza.

Umwaka ushize bamwe mu baturage babwiye IGIHE ko uretse kuba rukarakara ihendutse ngo inakomeza inzu.

Mu bice bimwe by’umujyi wa Kigali, nibura itafari rimwe rya rukarakara rifite santimetero 20 kuri 40 ribumbwa kuri 70 Frw.

Kubakisha Rukarakara ku nzu zimwe na zimwe zo guturamo byemewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza