Amashuri y’imyuga yasabwe kuba umusemburo w’iterambere mu gace akoreramo

Yanditswe na Prudence Kwizera
Kuya 19 Nzeri 2018 saa 07:54
Yasuwe :
0 0

Ikigo cy’Igihugu gishinzwe guteza imbere imyuga n’ubumenyingiro mu Rwanda, WDA, cyasabye amashuri y’imyuga gusohoka hanze agatoza abaturage aturanye nabo kunoza ibyo bakora, bityo akababera umusemburo w’iterambere rirambye.

Byavuzwe n’Umuyobozi Mukuru wa WDA, Gasana Jérôme, ubwo yatangizaga ku mugaragaro ibizamini bisoza amashuri yisumbuye ku banyeshuri ibihumbi 23,112 bari gusoza umwaka wa Gatandatu mu mashuri y’imyuga n’ubumenyingiro.

Gutangiza ibyo bizamini ku rwego rw’igihugu byabereye mu Karere ka Huye mu ishuri ry’imyuga rya EAV Kabutare.

Abanyeshuri bahiga 248 bahiga nibo batangiye ibizamini bijyanye n’amasomo bahabwa arimo gutunganya ibiribwa, gufata neza amashyamba, ubuhinzi n’ubworozi ndetse no kuvura amatungo.

Muri iryo shuri kandi haboneka inkoko za kijyambere, uburyo bugezweho bwo kurarira amagi no kuyaturaga, amatungo magufi n’amaremare yorowe kijyambere, ubuhinzi bugezweho n’ibindi.

Gasana, yavuze ko ibikorerwa muri iryo shuri ari byiza kandi byagira akamaro mu iterambere ry’igihugu, bityo bakwiye gutangira ku bigeza ku baturage baturanye nabo.

Yagize ati “Nimusohoke mu kigo mwegere abaturage, ushobora gusanga nk’umuturage utuye hepfo hano atazi ko mugira inkoko nk’izi. Icyo nshaka kuvuga mubigire imihigo, nk’uko i Nyagatare bavuga ngo bagiye korora inka buri muturage akaba afite inka, mushobora no kuvuga ngo buri muturage hano mu Karere ka Huye tumuhaye icyororo cy’inkoko nk’izi.”

Abanyeshuri batangiye ibizamini bisoza amashuri y’imyuga muri EAV Kabutare bagaragaje ko hari byinshi bamaze kumenya bibaha ubushobozi bwo kwihangira imirimo no guhangana ku isoko ry’umurimo.

Dushimimana Janvier ati “Niga ubuvuzi bw’amatungo, ubu nzi byinshi bijyanye nabwo nko kubaga itungo nkarivura neza. Ubu musanze turi kubaga igifu cy’ihene kugira ngo turebe ikibazo kirimo imbere. Ningera hanze nzajya mfasha abaturage kubavurira amatungo cyangwa nshinge farumasi y’imiti y’amatungo nkorere amafaranga.”

Umuyobozi wa EAV Kabutare, Nkusi Christophe, yavuze ko ibyo basabwe byo kwegera abaturage no kubabera umusemburo w’iterambere bishoboka kandi batangiye kubitegura.

Ati “Ibyo natwe turi kubitegura kandi bizashoboka nk’uko mubibona twabanje kwiyubaka kugira ngo tugire ibikorwa bifatika ku buryo n’uwadusura twagira icyo tumwereka. Ibyo duteganya gukora hanze ni ubujyanama ku byo dukora hano, yaba ari mu buhinzi, mu bworozi n’ibijyanye n’amashyamba, izo tekinike zo twigisha hano ku buryo twazigeza mu giturage.”

Abanyeshuri bakora ibizamini by’imyuga n’ubumenyingiro bagiye biyongera kuva muri 2011 aho bavuye ku bihumbi 16 bagera kuri 23,112 muri uyu mwaka wa 2018.

Aba 23,112 barimo abagera ku 21, 788 biga mu mashuri agera ku 184 aboneka mu gihugu ndetse n’abandi 1, 324 bazakora nk’abakandida bigenga. Bose bazakorera ibizamini ku masite 118.

Biteganyijwe ko ibyo bizamini byatangiye kuri uyu wa 19 bizasozwa ku ya 31 Nzeri 2018.

Abanyeshuri bo muri EAV Kabutare bari gukora ikizamini cyo kuvura amatungo. Aha bari kubaga igifu cy'ihene bareba ikibazo ifitemo
Abanyeshuri bo muri EAV Kabutare berekanye uko bazi gutunganya ibiribwa ibizwi nka 'Food Processing'
Bamwe mu banyeshuri biga ibijyanye n'amashyamba, ubutaka no kurwanya isuri muri EAV Kabutare
Muri EAV Kabutare haboneka uburyo bwo guhinga kijyambere kandi hari uburyo bwo gutubura imbuto mu murima
Umuyobozi Mukuru wa WDA, Jerome Gasana, yerekwa imashini irarira amagi ikanayaturaga muri EAV Kabutare
Umuyobozi Mukuru wa WDA, Gasana, yasabye ko ibikorerwa mu mashuri y'imyuga byagezwa no hanze ku baturage

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza