Kwamamaza

Amarira y’ibyishimo ubwo Ngendahimana yabonanaga n’umuryango we nyuma y’imyaka 22

Yanditswe kuya 30-08-2016 saa 21:10' na IGIHE


Abo mu muryango wa Ngendahimana basazwe n’ibyishimo bivanze n’amarira ubwo bamubonaga nyuma y’imyaka 22 batandukanye na we.

Ngendahimana yatandukanye n’abo mu muryango we mu 1994 ubwo bahungiraga muri Repubulika Iharanira Demokarasi ya Congo. Icyo gihe yari afite imyaka ine gusa nk’uko byemezwa na se, Jean Biziyaremye wo mu Karere ka Bugesera.

Yongeye kubona umuryango we nyuma nyuma y’imyaka irenga 22 Komite Mpuzamahanga ya Croix-Rouge (CICR) ibigizemo uruhare muri gahunda yayo yo guhuza abatanye n’ababo mu bihe by’intambara cyangwa imidugararo.

Akimara kubona se umubyara n’abavandimwe be kuri uyu kabiri tariki 30 Kanama 2016, Ngendahimana ntiyabashije kwihangana kuko yahise arira kubera ibyishimo.

Yagize ati “Nari nzi ko bose bashize, siniyumvishagako nshobora kuba mfite umuryango.”

Umubyeyi we Biziyaremye nubwo ari umusaza w’imyaka 60, na we yaturitse ararira ubwo yamuhoberaga ku bw’ibyishimo byo kumubona ari umugabo baherukanaga ari akana gato.

Biziyaremye n’ikiniga cyinshi yagize ati “Sinigeze nemera ko umwana wanjye yapfuye kuko buri gihe nahoraga nibwira ko nzamububona, none Imana iramungaruriye.”

Uyu musore amenye ko afite umuryango ndetse ko afite aho akomoka mu karere ka Bugesera mu murenge wa Nyamata, ibintu ubundi byajyaga bihora bimushengura kuba atazi aho akomoka.

Mu bo mu muryango we Ngendahimana yakundaga gutekereza cyane, ni mushiki we witwa Yamfashije yibukiraga ku kabyiniriro ka “Kigufuri” kanamufashije cyane gukomeza gutekereza uyu muryango.

Ku bavandimwe n’abaturanyi, byari ibyishimo ndetse n’ibitangaza bikomeye kubona uwo musore yongeye kugaragara mu gihe bari barihebye bazi ko yapfuye.

Ubuzima bubi yanyuzemo n’uburyo bwahinduye no kongera kubona umuryango

Ngendahimana yisanze muri Congo Kinshasa wenyine hafi y’umupaka wa Angola. Yatoraguwe n’umuryango w’Abanyecongo uramurera ndetse ngo unamuha izina rishya rya Ntabanganyimana Aboubacar Raymond kuko atari acyibuka amazina yiswe n’ababyeyi be.

Komite Mpuzamahanga ya Croix-Rouge ni yo yaje kuhamukura imugarura mu Rwanda kugira ngo imufashe gushakisha umuryango we.

Nyuma y’igihe kitari gito umuryango we ushakishwa ukabura, uyu musore yaje kujyanwa kurerwa muri kimwe mu bigo by’imfubyi mu Rwanda, aho yavanywe ajyanwa mu muryango ngo umurere.

Asobanura ko umuryango waje kumunanira ndetse ahitamo kuyoboka iy’umuhanda, ubuzima yabayemo mu gihe kitari gito.

Gusa ngo guhora atekereza ko ari we wenyine usigaye mu muryango, dore ko atari azi naho akomoka, yavuye mu buzima bwo mu muhanda ahitamo kwishakira akazi atangira kwitunga.

Asanzwe yibera mu mujyi wa Kigali aho akora akazi ko gukora isuku ku manywa ndetse no kurara izamu nijoro kugira ngo abashe kwiteza imbere aharanira kubaho.

Mu ntangiriro z’ukwezi kwa Gatandatu uyu mwaka nibwo yegereye CICR ayisaba kumutangira itangazo rirangisha ababyeyi be ngo agerageze amahirwe ya nyuma.

Amahirwe yaje kumusekera, se ahita yandikira CICR ayimenyesha ko uwo mwana ari uwe.

Ngendahimana avuga ko kuba yabonye umuryango we ari impinduka ikomeye mu buzima bwe igiye gutuma noneho arushaho kugira ishyaka n’icyizere cyo kubaho.

Ati “Ubu mfite uwo nzajya ngisha inama nkamwita papa, mbese nanjye mbaye umwana mu bandi kuko nabagaho naribuze, ntazi icyo ndicyo.”

CICR ikomeje guhuza abanyarwanda, cyane cyane abana batandukanye n’ababo mu gihe cy’intambara.

Kuva nyuma ya Jenoside yakorewe Abatutsi mu 1994, abasaba 20000 bamaze guhuzwa n’ababo ariko hakaba hakiri abana bato basaga 150 ndetse n’abakuru barenga 110 bagishakisha imiryango yabo.

Usibye guhuza Abanyarwanda kandi, CICR ikomeje no guhuza imiryango y’impunzi z’Abarundi yagiye itatana mu gihe cyo guhunda berekeza mu Rwanda no mu bindi biguhu by’ibituranyi.

Ubwo yahuraga na se bwa mbere mu cyumweru gishize
Biziyaremye yananiwe kwihangana ararira kubera ibyishimo by'uko umuhungu we yongeye kugaruka mu rugo
Se wa Ngendahimana asobanura ibyishimo bye
Ngendahimana asobanura amateka yanyuzemo
Ifoto ya Ngendahimana akiri muto ubwo CICR yatangiraga kumushakisha

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved