Amanyanga mu bucuruzi bw’ibirayi yashyize ihurizo ku biciro i Kigali

Yanditswe na David Eugène Marshall
Kuya 11 Nzeri 2018 saa 02:08
Yasuwe :
0 0

Ikibazo cy’ubuke bw’ibirayi ku masoko yo muri Kigali gikomeje kuvugisha benshi, aho iki gihingwa ubusanzwe cyabarirwaga mu ngandurarugo cyaje kuba nk’izahabu yihahira umugabo igasiba undi.

Ikibazo cy’ibirayi kigenda gihindura isura, kuko byavuye mu bihe byaboreraga mu murima mu turere twa Rubavu na Nyabihu kubera kubura abaguzi mu mpera z’umwaka ushize, kigera aho byabaye bike ku isoko.

Muri ibi byose ariko igabanuka ry’umusaruro w’ibirayi mu turere bihingwamo n’uburiganya bukorwa hagati y’abahinzi n’ababarangurira mu byo bita ‘gukomaho’, bikomeje gutuma igiciro cyabyo kiba ingorabahizi.

IGIHE yaganiriye n’impande zose kuva ku muhinzi, umuguzi, abatunda ibirayi, ababiranguza n’urwego rureberera ubucuruzi bwabyo, APTC (Agro Processing Trust Corporation).

Abari muri ubu bucuruzi bavuga ko igiciro fatizo cya Minisiteri y’Ubucuruzi n’Inganda (Minicom), gishyirwaho ku buryo bunogeye buri wese, bakagira uruhare mu kubigena, ariko iyo umusaruro ubaye muke kubera imihindagurikire y’ibihe, ntihabura kuba ikibazo.

Ubusanzwe ibirayi bigenerwa ibiciro hakurikijwe ubwoko bwabyo, ariko ubwoko bwa Kinigi nibwo bufite ibiciro byo hejuru kurusha andi moko 12 ahingwa mu Rwanda.

Biteganywa ko umuhinzi wejeje ibirayi ajya ku ishyirahamwe gusaba icyangombwa cyo kubisarura. Umucuruzi ubikeneye nawe anyura muri APTC akagaragaza ingano akeneye, akanishyura, agahabwa inyemezabwishyu.

Hakurikiraho kubigeza ku ikusanyirizo, umuhinzi agahabwa hagati ya 186 Frw na 191 ku kilo cy’ibya Kinigi binyuze muri APTC. Gusa hari ubwo iyi nzira idakurikizwa, umuhinzi n’umucuruzi bakisanga bari kwiyumvikanira igiciro bitanyuze ku ikusanyirizo, ari naho hava amanyanga.

Intambwe ikurikiraho ni abarangura ibirayi babikura ku ikusanyirizo ku mafaranga 204 Frw cyangwa 209 Frw (Kinigi), ababitunda bakabigeza ku ikusanyirizo rikuru rya Kigali mu Nzove, bigaherako bisaranganywa mu merekezo yose agize umujyi.

Igiciro cyo hejuru umuturage atakagombye kurenza igihe agura ibirayi ni 260 Frw/kg kuri Kinigi, 220 Frw ku bwoko bundi butandukanye na 209 Frw ku byitwa Paco nk’uko Minisiteri y’Ubucuruzi n’inganda ibivuga.

Nyamara iyo ugeze ku iduka hamwe ugurira ibirayi, usanga ibiciro bihari bitandukanye n’ibi. Ubu ikilo cya Kinigi bakigurisha guhera kuri 350Frw.

‘Gukomaho’, umuco washegeshe ubucuruzi bw’ibirayi

Gukomaho bimaze kuba nka virusi yamunze abafite uruhare mu buhinzi, ubucuruzi n’ubundi bushabitsi bw’ibirayi.

Mu gihe ibirayi byabaye bike mu murima, gukomaho bikorwa n’umuranguzi wumvikana n’umuhinzi igiciro runaka hagendewe ku byagenwe na Minicom.

Nyamara ibyo biba ari ibyo mu nyandiko gusa, kuko umuhinzi aba yagurishije umusaruro we ku giciro cy’umurengera, maze umuranguzi akamwongera andi ku ruhande, byo bise gukomaho.

Ibyo ubirenganiramo ni umuguzi wa nyuma kuko uwo mucuruzi nawe yishyiriraho igiciro cye, gitandukanye n’icyagenwe na Minisiteri.

Mukundufite Jean Baptiste, umuhinzi w’ibirayi mu Karere ka Rubavu mu Murenge wa Bugeshi, avuga ko umuco wo gukomaho ukorwa cyane kandi ugira ingaruka ku bucuruzi.

Yagize ati “Ubikora mu mayeri kuko iyo APTC ikuvumbuye urahanwa, umuhinzi nyirizina ariko uba wamwishyuye amafaranga yose ku giciro kizwi ugakomaho ayo yagusabye kurenzaho ibisigaye ukirwariza."

Gusa aho Ikigo APTC cyinjiriye mu bugenzuzi bw’ubu bucuruzi muri Gashyantare 2018 byabaye nk’ibicogora kubera amande y’ibihumbi 30 Frw yashyizweho, ariko hari abatayatinya kuko bateganya ko nibayacibwa, bagera hirya bagatumbagiza igiciro cy’ibirayi, wa muguzi akabyirengera.

Mu guhangana n’abakora aya manyanga, kuri buri guriro ry’ibirayi haba hari abakozi babiri ba APTC, hanamanitse indangururamajwi zivuga ibiciro byemewe ku buryo ufatiwe mu cyuho azamura ibiciro acibwa amande agenwa na Minicom.

Nyamara kubera ubwumvikane bw’umuhinzi n’umuguzi, hari ubwo bikorwa kandi ntibyorohe kubitahura.

APTC yahagurukiye ibi bibazo

Umwe mu bayobozi ba APTC, Nzamurambaho Emmanuel yabwiye IGIHE ko ubusanzwe ikibazo cyari muri ubu bucuruzi cyabagaho mu Ukuboza, igihe umusaruro w’ibirayi uba ari mwinshi, abahinzi babuze aho bawujyana.

Muri icyo gihe umuhinzi ni we uryamirwa kuko niba agomba kugurirwa ku mafaranga 135 Frw ku kilo, abacuruzi bamugurira ku mafaranga 110 Frw; yishakamo ikinyuranyo cya 25 Frw akayaha umucuruzi kugira ngo bizagararire Minicom ko ibirayi byacurujwe ku mafaranga yagenwe.

Ayo ngo akazabagarukira binyuze mu nzira zisanzwe zinyuzwamo ayaguzwe umusaruro wabo, ku buryo ngo inzego zigenzura ubucuruzi bw’ibirayi zitarabukwa.

Yakomeje avuga ko Umujyi wa Kigali ubusanzwe ukenera toni hagati ya 600 na 1000 zituruka mu gihugu no hanze nko muri Kenya na RDC, ariko ko ubu byagabanutse bigasaranganywa abatuye umujyi hakurikijwe uko buri gace kabikenera.

Ku kibazo cy’abacuruzi bifuza ko ibiciro byajya bisubirwamo kenshi, Nzamurambaho yagize ati “Igiciro si cyo kibazo, abacuruzi n’abahinzi bamwe badakoze uburiganya mu cyo bita gukomaho, bagakurikiza ibiciro byagenwe na Minicom kandi bagize uruhare mu kubishyiraho ubwabo, nta gihombo bagira kuko hari ikinyuranyo cy’amafaranga hagati ya 20 na 25 abacuruzi basigirwamo ngo batagwa mu gihombo.”

Impuguke mu by’ubukungu, Teddy Kaberuka avuga ko uretse umuguzi ibirayi bigeraho bihenze, ibi atari ibihe bibi ku bahinzi kuko babiboneramo amafaranga ahagije.

Avuga ko abashinzwe kugenzura ibiciro badakwiye kujenjekera amande acibwa abatubyubahiriza, hirindwa ko ibiciro byazamuka cyane kuzabimanura bikazaba ikibazo, bikaba byanagira ingaruka ku ifaranga ry’igihugu.

Yakomeje agira ati “Ubundi icyo ayo mande yaba agamije ni ukurandura uwo muco w’uburiganya mu bucuruzi, harengerwa inyungu z’umuguzi, no gutuma abakayatanze babitinya, naho niba ari amande atuma umuntu ashobora kuyakoresha kugirango agere ku nyungu ze, ntacyo yaba amaze mu kukemura iki kibazo.”

Ibiciro by’ibirayi biriho byashyizweho kuwa 2 Kanama 2018, mu gihe ibyaherukaga byari byarashyizweho kuwa 28 Gicurasi 2018.

Ibiciro by'ibirayi ku masoko y'i Kigali bikomeje kuzamuka
Amakamyo aba ari urujya n'uruza ajyana cyangwa avana ibirayi muri Nzove, amwe abivanye mu mahanga andi abijyana mu mujyi wa Kigali
Ikigo APTC cyashyize abagenzuzi b'ibiciro babiri kuri buri soko ry'ibirayi, n'indangururamajwi zo kubwira abaguzi igiciro cya Minicom uko gihagaze
Umwe mu bacuruzi b'ibirayi avuga ko ibiciro bikwiye kujya bihora bisuzumwa
Kuri buri guriro haba indangururamajwi ibwira abaguzi ibiciro ngo batavaho bahendwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza