00:00:00 IGIHE NETWORK KN KINYARWANDA EN ENGLISH FR FRANCAIS

Amanota y’abarangije ayisumbuye yatangajwe; abiga TVET na TTC batsinze ku kigero cyo hejuru

Yanditswe na Kanamugire Emmanuel
Kuya 15 Ugushyingo 2021 saa 03:17
Yasuwe :
0 0

Minisiteri y’Uburezi yatangaje amanota y’ibizamini bya Leta bisoza amashuri yisumbuye igaragaza ko abize mu mashuri y’imyuga n’ubumenyingiro n’Inderabarezi bitwaye neza ugereranyije n’abize mu bijyanye n’ubumenyi rusange.

Amanota yatangajwe kuri uyu wa Mbere, arimo ay’abanyeshuri basoje Umwaka wa Gatandatu w’amashuri yisumbuye (S6), uwa Gatatu w’amashuri nderabarezi (TTC) n’umwaka wa gatanu y’amashuri y’Imyuga n’Ubumenyingiro (L5).

Nubwo hari inyito ’umwaka wa gatatu’ ku barangije mu nderabarezi, na bo baba babanje kwiga icyiciro rusange. Iyo bageze muri TTC, umwaka wa kane mu yandi mashuri bawita uwa mbere, uwa gatanu ufatwa nk’uwa kabiri naho uwa gatandatu ugafatwa nk’u wa gatatu.

Naho ku mashuri y’imyuga bavuga umwaka wa gatanu kuko bahera ku mwaka wa gatatu, ni ukuvuga ko abari mu mwaka wa gatatu baba bari ku rwego rumwe n’abari mu mwaka wa kane mu yandi mashuri.

Minisitiri w’Uburezi, Dr Uwamariya Valentine, yavuze ko mu mashuri y’ubumenyi rusange hiyandikishije abakandida 47.638 mu gihe abakoze ibizamini ari 47.399. Muri bo hatsinze 40.435 bahwanye na 85.3%. Abasigaye batabonye amanota fatizo ni 14.7%.

Mu mashuri Nderabarezi hiyandikishije abakandida 2.988, bose barakoze ariko abatsinze ni 2.980 bahwanye na 99.9%.

Mu mashuri y’Imyuga n’Ubumenyingiro hiyandikishije abakandida 22.686 ariko abakoze ibizamini ni 22.523. abatsinze ni 21.768 bihwanye na 95.7%, abahwanye na 4.3% ntabwo bagejeje ku manota fatizo.

Minisitiri Dr Uwamariya yavuze ko muri rusange abanyeshuri bitwaye neza nubwo hari aho igipimo cy’imitsindire cyagabanutse.

Yagize ati “Muri rusange, abanyeshuri batsinze neza kuko iyo urebye igipimo batsinzeho ntabwo kinyuranye n’imyaka yashize.’’

Mu 2020, igipimo cy’imitsindire mu bumenyi rusange cyari 89.5% mu gihe uyu mwaka cyabaye 85.3%.

Mu mashuri y’Inderabarezi (TTC), igipimo cy’imitsindire cyarazamutse kuko urebye mu mitsindire mu 2019 cyari kuri 98.2%, ubu cyabaye 99.9%.

Mu mashuri y’imyuga n’ubumenyingiro byari 91.2% mu 2020, ubu igipimo cy’imitsindire ni 95.7%.

Umuyobozi w’Ikigo cy’Igihugu Gishinzwe Ibizamini n’Ubugenzuzi mu Mashuri (NESA), Dr Bahati Bernard, yasobanuye ko inota fatizo rigenwa hagendewe ku buryo abana batsinze mu masomo atandukanye.

Yagize ati “Uwatsinze ibizamini bya Leta ni uba ufite hagati y’amanota icyenda na 73 bakoreraho. Abo ni abiga amashuri y’Uburezi Rusange n’Imyuga n’Ubumenyingiro.’’

“Abiga mu mashuri ategura abajya kuba abarimu bakorera ku ijana, hafatiwe kuri 40%, abatsinze na bo bazabona impamyabumenyi zabo.’’

Minisitiri Dr Uwamariya yavuze ko abanyeshuri batabonye inota fatizo bafite uburenganzira bwo kuzakora ikizamini cya Leta nk’abakandida bigenga.

Ibanga ryatumye abanyeshuri batsinda neza

Umunyeshuri witwa Mugisha Abdoul Karim wigaga siyansi ( Physique-Chimie-Maths) muri Riviera High School, yavuze ko gukurikira neza amasomo yo mu ishuri no kwiyigisha ubwe biri mu byamufashije gutsinda neza.

Ati "Kuba nabaye uwa mbere byanshimishije. Mu gihe cya Covid-19 nashatse uburyo nakomeza kwiga kugira ngo ntabyibagirwa, nshaka ibitabo nkagenda nsubiramo gake gake."

Umuhuza Gatete Kelia wigaga muri Gashora Girls Academy wabaye uwa kabiri mu bumenyi rusange na we yavuz eko umuhate yashyize mu masomo n’inyunganizi y’ababyeyi byagize uruhare mu mitsindire ye.

Ati “Icyamfashije kugera kuri uyu mwanya ni uko nashize imbaraga mu masomo yanjye. Nakoraga ibyo nagombaga gukora mu ishuri ngasubira mu masomo ndetse ngakora imikoro abarimu babaga baduhaye."

Yongeyeho ati "Ababyeyi bampaga ibikoresho byose nabaga nkeneye bakamba hafi ndetse bakandema agatima mu bihe bikomeye cyane muri Covid-19. Uyu mwanya sinawukekaga, nanjye byantunguye kuko kuva natangira kwiga ni bwo bwa mbere ntsinze ku rwego rw’igihugu.”

Aline Muhongerwa, umubyeyi w’uyu munyeshuri, yavuze ko urugendo rwo kurera umwana kugira ngo agere ku rwego nk’uru bisaba kumuha umwanya, gukorana na we umunsi ku wundi ndetse n’ubuyobozi bw’ikigo yigaho.

Ati "Umwana wacu yari umuhanga kuva mu ntangiriro, yaratsindaga bishimishije ariko ntitwakekaga ko yagera kuri uyu mwanya wa kabiri yabonye ku rwego rw’igihugu. Ndahimira buri wese witanze ngo umwana wacu abe abashije kugera kuri uru rwego."

Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyingiro, Irere Claudette, yabwiye abanyeshuri barangije ayisumbuye ko kwiga bitarangiye, abakiri ku ntebe y’ishuri abasaba gushyira imbaraga mu myigire kugira ngo umusaruro w’ubutaha uzabe mwiza kurusha uw’uyu mwaka.

Yasabye kandi abayobozi b’amashuri uruhare rwabo kugira ngo impinduka zikenewe mu burezi zibashe kugerwaho.

Ukeneye kureba amanota anyura ku rubuga rwa internet rwa NESA akandika code y’umunyeshuri ahabugenewe cyangwa agakoresha telefone akorehereza code y’umuyeshuri kuri 4891.

Urutonde rw’abanyeshuri 10 batsinze neza mu mashuri y’ubumenyi rusange

1.Mugisha Abdoul-Karim (Riviera High School)
2.Umuhuza Gatete Kellia (Gahora Girls Academy of Science and Technology
3.Uwonakunze Anaise Marie(Gahora Girls Academy of Science and Technology)
4.Gatwaza Kubwimana Jean Yves (Ecole des Sciences Byimana)
5.Iraguha valens (Collège Saint André)
6.Ngoga Uwizeye Josaphat (Ecole des Sciences de Byimana)
7.Byishimo Benoït( Ecole des Sciences Nyanza)
8.Iragena Eric (Ecole des Sciences Nyamirama)
9. Muhawenimana (Collège Saint André)
10.Ishimwe Iragira Joseph( Ecole des Science de Gisenyi)

Abatsinze neza mu mashuri y’imyuga n’ubumenyingiro

1. Migisha Dieumerci ( Saint Kizito Save)
2.Twizeyimana Jean Claude (GS. BTR Rwamiko)
3.Ishimwe Shalom (Nyanza TVET School)
4.Birasa Edson (Saint Kizito Save)
5.Niyomurinzi Daniel (SEG Karama)
6.Ntakirutimana Donat (GS. BTR Rwamiko)
7.Ishimwe Gilbert (Cyondo TVET School)
8.Bagiramenshi (College Saint Joseph Kansi)
9.Asiimwe Patrick(Saint Kizito Save)
10.Mugisha Sam(IPRC Kigali)

Abatsinze neza mu Nderabarezi Rusange

1.Nsengiyumva Theogene (TTC Muhanga)
2.Niyogusa Gervais (TTC Mururu)
3.Dusabe Robert (TTC Nyamata)
4.Uwase Valerie (TTC Rubengera)
5.Dusenge Nadia (TTC Save)
6.Uwurukundo Providence (TTC Muhanga)
7.Girinshuti Elissa (TTC Bicumbi)

Minisitiri w’Uburezi, Dr Uwamariya Valentine, ni we watangaje amanota y'abasoje amashuri yisumbuye mu byiciro bitandukanye/Ifoto: RBA
Umunyamabanga wa Leta muri Minisiteri y'Uburezi Ushinzwe Amashuri Abanza n'Ayisumbuye,Twagirayezu Gaspard
Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyingiro, Irere Claudette
Minisitiri w'Uburezi, Dr Uwamariya Valentine ashyikiriza igihembo, Mugisha Abdoul-Karim wabaye uwa mbere mu mashuri y'ubumenyirusange
Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyingiro, Irere Claudette, ashyikiriza igihembo Migisha Dieumerci
Umunyamabanga wa Leta muri Minisiteri y'Uburezi ushinzwe amashuri abanza n'ayisumbuye, Twagirayezu Gaspard ashyikiriza igihembo Nsengiyumva Theogene wabaye uwa mbere muri TTC
Umuyobozi wa NESA, Dr Bahati Bernard ashyikiriza igihembo Ishimwe Shalom wabaye uwa gatatu mu mashuri y'imyuga n'ubumenyingiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .