Kwamamaza

Amajyepfo:Uturere dufite abana benshi bagwingiye twaranenzwe

Yanditswe kuya 27-10-2016 saa 21:17' na Prudence Kwizera


Ubushakashatsi bwakozwe na Ministeri y’Ubuzima ku bufatanye n’Umuryango SFH Rwanda ku mibereho y’Abaturage muri 2014-2015 bwagaragagaje uko uturere duhagaze ku kibazo cy’imirire mibi itera abana bari munsi y’imyaka itanu kugwingira.

Akarere ka Nyamagabe ni ko gafite umubare munini mu Ntara y’Amajyepfo ku kigero cya 51.6 % kagakurikirwa na Huye ifite 42.6%.

Mu nama yabaye kuwa 25 Ukwakira 2016 ihuje abayobozi bo mu Ntara y’Amajyepfo kuva ku murenge kugeza ku Ntara, hagarutswe ku bibazo bibangamira imibereho y’Abanyarwanda birimo umwanda, imirire mibi n’indwara ziyiturukaho, icyorezo cya Sida, imiryango ibyara abo idashoboye kurera n’ibindi.

Umuyobozi wa SFH Rwanda, Manasseh Gihana Wandera, mu kiganiro yatanze yagaragaje ko ikibazo cy’imirire mibi n’umwanda bidakwiye kugaragara ku Munyarwanda, asaba ubufatanye mu kukirandura burundu.

Yagize ati “Ku rwego rw’Igihugu imibare igaragaza ko 38.5% by’abana bari munsi y’imyaka itanu bagwingiye, ndagira ngo rwose buri muyobozi uri ahangaha arebe iyi mibare y’abana bagwingiye kuko biteye agahinda, ariko icyiza ni uko twese dufite uruhare rwo kuba twahindura iyi mibare”.

Ibipimo byerekana ko utundi turere two mu Majyepfo dufite abana benshi bagwingiye ugendeye ku bipimo byo ku rwego rw’Igihugu, ari Nyaruguru iri ku kigero cya 41.7%, Muhanga kuri 41.6% na Ruhango ifite 41.1%.

Umuryango SFH Rwanda n’Ihuriro ry’Amasosiyete arwanya ikibazo cy’imirire mibi mu Rwanda (SUN Alliance) biyemeje ko bagiye gutegura imfashanyigisho yoroshye izahabwa abayobozi ku nzego z’ibanze bikaborohera gukangurira abaturage kurwanya imirire mibi n’umwanda.

Muri iyi nama hatanzwe ibitekerezo ku cyafasha kurandura burundu imirire mibi mu bana b’u Rwanda, uturere tukiri inyuma turanengwa, ariko dusabwa kwisubiraho.

Umuyobozi w’Akarere ka Nyamagabe, Philbert Mugisha, yavuze ko bagiye kongera ingufu mu kurwanya imirire mibi n’umwanda bakora ubukangurambaga mu baturage kandi ababyeyi bakigishwa gutegura neza amafunguro binyuze mu gikoni cy’umudugudu no mu mugoroba w’ababyeyi.

Kuri ibi ngo haziyongeraho gukomeza kwigisha abaturage kugira uturima tw’igikoni, konsa neza abana babo no kubaha imfashabere yujuje ibyangombwa kandi mu gihe gikwiye.

Guverineri w’Intara y’Amajyepfo, Marie Rose Mureshyankwano, ubwo yifatanyaga n’abaturage bo mu Karere ka Gisagara mu muganda kuwa 26 Ukwakira 2016, yagarutse ku kibazo cy’imirire mibi igarara muri imwe mu miryango avuga ko ku bufatanye n’inzego z’ibanze bagiye kucyitaho.

Yasabye abaturage kurwanya imirire mibi bita ku gutegura neza ifunguro kandi buri rugo rukagira akarima k’igikoni gahinzemo imboga.

Mureshyankwano kandi yasabye ko buri rugo rugomba kugira ubwiherero bumeze neza, kandi abagize umuryango bakarangwa n’isuku muri byose.

Abayobozi batanze ibitekerezo ku cyafasha kurandura imirire mibi
Guverineri w'Intara y'Amajyepfo, Marie Rose Mureshyankwano avuga ko ikibazo cy'imirire mibi kigiye guhagurukirwa
Manasseh Gihana Wandela, Umuyobozi wa SFH aganira n'abayobozi ku nzego zitandukanye
Imibare igaragaza imiterere y'ikibazo cy'igwingira ry'abana mu Ntara y'Amajyepfo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved