Amajyepfo: Gisagara ku isonga muri mituweli, Nyamagabe ni iya nyuma

Yanditswe na Prudence Kwizera
Kuya 10 Kanama 2019 saa 05:37
Yasuwe :
0 0

Guverineri w’Intara y’Amajyepfo, CG Gasana Emmanuel, yavuze ko kugira ngo umuntu abeho neza ari uko aba afite ubuzima bwiza yarwara akivuza bitamugoye, ashimira uturere dukomeje kuza imbere mu gutanga mituweri.

Yabivugiye mu Karere ka Gisagara kuri uyu wa Gatanu mu gikorwa cyo kurwanya no gukumira indwara ya malaria. Yashimiye abaturage bo mu Karere ka Gisagara ko bari imbere mu gutanga ubwisungane mu kwivuza, asaba utundi turere kubigiraho.

Ibipimo byerekana ko imirenge yose yo mu Karere ka Gisagara iri imbere y’iyo mu tundi turere twose two mu Majyepfo, mu kwitabira gutanga umusanzu w’ubwisungane mu kwivuza.

Guverineri Gasana yagize ati “Nashimira ko Gisagara mu Ntara yose y’Amajyepfo ari ko karere gafite mituweli nyinshi kurusha ahandi. Rwose muri indashyikirwa mu kuzamura imyumvire mu baturage bakamenya ko ubwishingizi mu kwivuza bukenewe cyane. Abandi bakwiye kubigiraho.”

Imibare yerekana ko mu Karere ka Gisagara umwaka ushize warangiye abaturage batanze mituweli ku kigero cya 88.1% naho muri uyu wa 2019/20 bageze kuri 83.13%.

Icyegeranyo cy’ibipimo by’Intara y’Amajyepfo cyerekana ko Akarere ka Nyamagabe ari ko gafite imirenge myinshi iri inyuma mu kwitabira gutanga umusanzu w’ubwisungane mu kwivuza.

Icyo cyegeranyo gisoza kigira kiti ‘Imirenge 13 yose y’Akarere ka Gisagara iri muri 18 ya mbere mu mirenge 101 igize Intara y’Amajyepfo. Imirenge ya Nyamagabe ikabije kuba myinshi mu ya nyuma.’

Gahunda y’Ubwisungane mu kwivuza yatangijwe mu 2004 hagamijwe gufasha abanyarwanda bose kubona serivisi z’ubuvuzi bitabahenze.

Abaturage bo mu Karere ka Gisagara bashimiwe ko bitabira gutanga ubwisungane mu kwivuza
Guverineri Gasana yashimiye abaturage bo mu Karere ka Gisagara ko bari ku isonga mu gutanga umusanzu w'ubwisungane mu kwivuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza