Kwamamaza

Amakosa akomeye yakozwe na ICTR mu rubanza rwitiriwe Butare

Yanditswe kuya 14-09-2016 saa 14:54' na IGIHE


Mu Ugushyingo 1994 nibwo umwanzuro w’akanama k’umutekano ka Loni washyizeho Urukiko Mpuzamahanga Mpanabyaha, ICTR, ngo rucire imanza abakekwaho ibyaha bya Jenoside n’ibyibasiye inyokomuntu muri Jenoside yakorewe Abatutsi.

Kuva rwatangira guca imanza mu 1997 kugeza mu Ukuboza umwaka ushize, rwahamije ibyaha abagera kuri 61, rugira abere abagera kuri 14 muri bo batandatu gusa nibo bamaze kubona ibihugu bibakira.

Pierre Hazan, umwanditsi w’Ikinyamakuru JusticeInfo n’umwarimu muri Kaminuza ya Neuchâtel mu Busuwisi, yifashishije urubanza rwitiriwe Butare agaragaza amahano yarukozwemo, rukaburamo ubutabera mpuzamahanga, rukagaragaramo amakosa menshi, imikorere mibi n’imyitwarire idahwitse y’urukiko ku batangabuhamya n’abarokotse Jenoside.

Urubanza rwitiriwe Butare rwatangiye muri Kamena 2001, nirwo rubanza runini ICTR yari iburanishije rurimo abantu batandatu bashinjwa ibyaha bya Jenoside n’ibyibasiye inyokomuntu, abo ni Pauline Nyiramasuhuko, umuhungu we Arsène Shalom Ntahobali, ababurugumesitiri babiri, Perefe umwe n’umusirikare mukuru umwe.

Arsène ni umuhungu wa Pauline Nyiramasuhuko, wari Minisitiri w’Iterambere ry’Umugore n’Umuryango, akaba ari we wayoboye ibitero by’interahamwe zakoze Jenoside zikanafata abagore n’abakobwa ku ngufu mu yahoze ari Perefegitura ya Butare.

Mu 2003, Hazan yagiranye ikiganiro cyitwa ‘Rwanda: une justice prise en otage’ n’umwana w’imyaka 15, Espérance uvuka i Butare wapfushije abavandimwe n’imiryango barenga 60, akaba yaranatanze ubuhamya mu gihe cy’iperereza ryakorwaga na ICTR cyane cyane uko yafashwe ku ngufu inshuro nyinshi.

Umwirondoro w’umutangabuhamya washyizwe ku karubanda

Muri icyo kiganiro cyaciye kuri Televiziyo yo mu Busuwisi, Espérance avuga uko urukiko rwamwijeje ko rutazatangaza umwirondoro we, rwiyemeza kumugaragaza nk’umutangabuhamya ‘TA’. Ubuhamya bwe bwari ingirakamaro mu rubanza rwa Arsène Shalom Ntahobali, wari ufite imyaka 24 mu gihe cya Jenoside akaba yari akuriye Interahamwe muri Butare.

Imikorere mibi y’urukiko muri uru rubanza yagaragaye bwa mbere ubwo rwashyiraga mu kaga ubuzima bw’umutangabuhamya rugatangaza imyirondoro ye.

Espérance yagize ati “Ubwo nagarukaga iwanjye, abaturanyi bambwiye ko nabagambaniye. Ubwo nabaga ndyamye mu ijoro, sinabaga nizeye ko buri buke. Bashoboraga kuza hano bakanyica igihe icyo aricyo cyose.”

Guhahamura umutangabuhamya

Ikindi cya kabiri cyagaragaye nk’imikorere mibi y’urukiko ni amahano umutangabuhamya avuga ko yakorewe n’umwunganizi mu by’amategeko w’Umunyakenya witwa Duncan Mwanyumba, wamuhase ibibazo bikomeretsa.

Esperance yavuze ko Mwanyumba yamubajije ingano y’imyenda yari yambaye mbere yo gufatwa ku ngufu, itariki yaherukiragaho kwiyuhagira, akamubwira ko yari kuba akurura abantu, yasaga nabi ku buryo atari bufatwe ku ngufu. Yanamusabye kuvuga inshuro Arsène Shalom yamufashe ku ngufu, anamubaza niba yari asiramuye.
Ibi bibazo ngo byahahamuye umutangabuhamya.

Nta tegeko rirengera abacitse ku icumu

Ikintu cya gatatu kigaragara nk’imikorere mibi ya ruriya rukiko, igendanye n’uko nta mategeko arengera ibihumbi by’abagore bafashwe ku ngufu muri Jenoside, aho bigaragazwa ko 2/3 byabo bashobora kuba barandujwe Virusi itera Sida.

Ngo amategeko ya ruriya rukiko mpuzamahanga yakozwe n’Abanyamategeko b’i Burayi, ntacyo bigeze batekereza ku bukungu n’imibereho by’u Rwanda rwashegeshwe na Jenoside ngo bagene uko abo bagore bavuzwa, bakitabwaho yaba mu mirire n’indi mibereho ya buri munsi.

Nyamara ayo mategeko ateganya ibijyanye no kwita ku bakekwaho Jenoside yaba ku buzima bwabo n’ubundi burenganzira, ariko ntateganye uko abarokotse Jenoside bakitabwaho yaba mu kuvuzwa n’ibindi.

Gukerereza imanza

Ikindi kigarukwaho nk’imikorere mibi y’urukiko rwa TPIR nkuko ikinyamakuru Le Monde cyabyanditse ni ugutinza imanza. Hagarukwa ku rubanza rwitiriwe Butare, aho abaruregwagamo bafashwe hagati ya 1995 na 1998, rugatangira muri 2001 rukarangira muri 2015. Ni urubanza rwatinze cyane ku buryo budasanzwe.

Nta mpozamarira no kuriha ibyangijwe

Nkuko umugenzacyaha Carla Del Ponte yabitangaje, ku bakorewe ibyaha, buriya butabera bwarabazitiraga. Bagombaga gutangira ubuhamya imbere y’abakekwaho Jenoside, bavuzwa neza, barya neza kandi baba muri gereza zimeze neza, mu gihe bo batari bafite uburenganzira bwo guhabwa impozamarira cyangwa ngo barihwe imitungo yangijwe.

Ibi bituma hari ababona ko nta butabera burimo kuko n’abagerageje kwishyurwa ibyangijwe byanyuze mu buryo bugoranye cyane.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved