Amafaranga yinjijwe n’abaherwe 10 kuva Covid-19 yatangira, yagura inkingo zaterwa abatuye Isi bose

Yanditswe na Muhonzire Sylvine
Kuya 26 Mutarama 2021 saa 09:16
Yasuwe :
0 0

Raporo y’Umuryango Mpuzamahanga urwanya ubusumbane, Oxfam, yagaragaje ko abaherwe 10 ba mbere ku Isi binjije amafaranga angana na miliyari 540 $ kuva icyorezo cya Coronavirus cyakoreka Isi, amafaranga uyu muryango uvuga ko yagura inkingo zaterwa abatuye Isi yose.

Uyu muryango usanzwe uzwiho gukora raporo zerekana ubusumbane bushingiye ku mikoro mu batuye Isi, aho kuri iyi nshuro werekanye ko amafaranga abaherwe icumi binjije mu gihe Covid-19 yari yigabije Isi, yo yonyine ubwayo yarinda buri wese kugwa mu bukene bwatewe n’iki cyorezo ndetse ko yagura inkingo zaterwa buri wese.

BBC dukesha iyi nkuru ivuga iyi raporo yiswe virusi y’ubusumbane, igaragaza ko umutungo wose abo baherwe batunze uwushyize hamwe ungana neza n’amafaranga ibihugu bikomeye biba mu muryango wa G20 byatakaje mu bikorwa bijyanye no guhashya icyorezo cya Coronavirus.

Mu bihugu bigize umuryango wa G20 ibyinshi byibasiwe cyane n’iki cyorezo, aho twavuga nk’ u Bushinwa, Leta Zunze Ubumwe za Amerika, u Bwongereza, u Burusiya, u Bufaransa, u Budage, u Butaliyani, u Buhinde, Afurika y’Epfo n’ibindi.

Nubwo ariko abaherwe binjije akayabo, bagize uruhare mu gufasha Isi guhangana no gushaka ibisubizo iki cyorezo cyateje, aho abagera kuri 209 batanze angana na miliiyari 7,2 z’amadolari yo gufasha.

Umutungo w’abaherwe ba mbere ku Isi wiyongereyeho angana miliyari ibihumbi 3,9 z’amadolari ya Amerika.

Bayungutse hagati yo ku wa 18 Werurwe na 31 Ukuboza 2020, bituma umutungo wabo wose uwubariye hamwe ungana na miliyari ibihumbi 11,95.

Mu baherwe icumi bungutse agatubutse ubwo Isi yari iri guhura n’ibibazo by’ubukungu byatewe n’icyorezo, harimo Jeff Bezos, washinze sosiyete ya Amazon, nyiri sosiyete ya Tesla ikora imodoka z’amashanyari, Elon Musk, unaherutse kuba umukire wa mbere ku Isi, ndetse na Mark Zuckerberg washinze Facebook.

Oxfam ivuga ko imitungo y’abaherwe yiyongereye kubera ko amasoko y’imigabane yari ari kujegajega, ibintu uyu muryango uvuga ko byateje ubusumbane bukabije bushingiye ku mikoro mu gihe Isi yari iri mu bihe bibi by’ubukungu.

Iyi raporo kandi ivuga ko Bezos yungutse amafaranga menshi muri Nzeri 2020 ku buryo iyo aramuka ahaye abakozi 876.000 ba Amazon agahimbazamusyi k’ibihumbi 105$ yari kuguma ari umuherwe nk’uko yari ameze Coronavirus itarazahaza Isi.

Uyu muryango ukomeza uvuga ko kugira ngo abakene cyane ku Isi babashe kuva mu bukene byabafata imyaka irenze icumi. Ndetse ko nibura hagati ya miliyoni 200 na 500 z’abantu zirenga bari babayeho mu bukene mu 2020.

Umuyobozi wa Oxfam, Danny Sriskandarajah, avuga ko aba bakene bakwiye gushyirirwaho imisoro yihariye, kugira ngo abaturage b’abakene babashe kubaho ubuzima busanzwe nk’ubw’abandi bave munsi y’umurongo w’ubukene.

Jeff Bezos umuherwe wungutse akayabo mu gihe Isi yari iri guhangana n'ibibazo by'ubukungu kubera Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .