“Amafaranga akoreshwa mu bukwe asigaye ayingayinga ayagura ikibanza giciriritse”

Yanditswe na Kanamugire Emmanuel
Kuya 29 Ukwakira 2016 saa 08:09
Yasuwe :
0 0

Umuhango w’ubukwe usa n’ugenda utakaza umwimerere kuko hari byinshi bihindura isura uko iminsi ishira indi igataha, ariko ikiriho ni ibisa n’urwiganwa bituma hari abashaka kwishima aho batishyikira.

Abataha ubukwe kuri iki gihe babivugaho byinshi, nko kuba busigaye butwara akayabo rimwe na rimwe kadahwanye n’ubushobozi bw’ababukora.

Imyambaro, imitako, imodoka, indabo, aho kwakirira abashyitsi, kwishyura abazavuga imisango n’ibindi bitandukanye bisigaye bibarirwa akayabo k’amamiliyoni y’amafaranga, hakaba ubwo usanga angana n’ayagura ikibanza giciriritse cyo kubakamo inzu.

Nta bukwe bugipfa kuba hatabayeho inama zibutegura, haba ku ruhande rw’abasore ndetse no ku ruhande rw’abakobwa.

Ku ruhande rw’abasore dore ko ari na bo baba basabwa byinshi, usanga kuri ubu hari n’abadatinya gutegura ibifite agaciro gahanitse hagendewe ku cyiciro buri wese arimo n’aho aherereye kuko ubukwe bwo mu cyaro butahwana n’ubwo mu mujyi, kimwe n’uko ubw’abaciriritse butandukanye n’ubw’abifite.

Mu nama z’ubukwe bakunze kubaza umukobwa cyangwa umuhungu amafaranga afite, igisubizo cya bamwe kikaba ‘Ntacyo mfite keretse abantu.” Aha baba bashatse kuvuga ko bahanze amaso intwererano.

‘Bategura ibifite agaciro gahwanye n’amafaranga yagura ikibanza’

Ibitekerezo by’abantu batandukanye bigaragaza kutishimira iki gisubizo, nk’uko bamwe mu bo twaganiriye babidutangarije.

Minani Jonas, utuye mu Murenge wa Gatsata mu Karere ka Gasabo yagize ati “Umusore arihanukira agategura ingengo y’imari y’amamiliyoni angana n’ayagura ikibanza giciriritse mu mujyi wa Kigali agiye kuba mu nzu y’inkodeshanyo. Ibi bintu mbona Leta ikwiye kubihagurukira ikigisha abaturage kutisumbukuruza.”

Undi muturage wo mu Murenge wa Kigarama mu Karere ka Kicukiro ati “Umuvandimwe wanjye yagujije miliyoni eshatu agiye kurongora, akodesha inzu y’ibihumbi magana abiri ku kwezi. None ubu ni induru mu rugo rwe, kwishyura byabaye ikibazo, we n’umugore bari kwitana bamwana.Twamugiriye inama yo gukora ubukwe buciriritse nibura agasigaza amafaranga yanaguramo ikibanza aratunanira.”

‘Bigira ingaruka ku bukungu bw’igihugu’

Impuguke mu bukungu Teddy Kaberuka, avuga ko gukoresha ubukwe amafaranga y’inguzanyo, bigira ingaruka ku bukungu.

Yagize ati “Bigira ingaruka ku bukungu kubera ko inguzanyo yo gukora ubukwe, iba yakoreshejwe ibintu bitunguka. Ntabwo umuntu yakagombye gukora ubukwe akoresheje ingengo y’imari irenze ubushobozi bwe.”

Mu mwaka wa 2014, Minisiteri y’Uburinganire n’Iterambere ry’Umuryango, yatangaje ko igiye gutangiza ubukangurambaga bwo kuburira urubyiruko kudakora ubukwe buhenze, kuko iyo burangiye usanga imiryango ihise isenyuka kubera amadeni bamwe baterwa no kwirarira.

Mu mwaka wa 2014 kandi Perezida wa Sena Bernard Makuza yatunze urutoki umuco weze mu rubyiruko wo guhiganwa no kwiganana gukora ubukwe buhenze cyane, bituma bamwe bibasirwa n’imyenda nyuma y’ubukwe bikaba n’intandaro y’isenyuka rihutiyeho ry’ingo z’iki gihe.

Indi nkuru wasoma: Leta itewe impungenge n’abakora ubukwe buhambaye bikabata mu madeni abasenyera

Sena yanenze urwiganwa rw’abageni basesagurira mu bukwe ibyakabatunze

Ubukwe bw'iki gihe busigaye butwara akayabo kibazwaho na benshi
Ahabera ubukwe usanga hateguwe ku buryo hakosha
Aho abageni bicara hatatse bigezweho ni kimwe mu bitwara amafaranga menshi
Gukodesha imodoka ku batazifite no kuzitaka na byo usanga byihagazeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244