Kwamamaza

Akeso k’ipfunwe: Ingufu zose i Gasabo, ikarenga ikaba iya nyuma

Yanditswe kuya 15-10-2014 saa 12:00' na NTWALI John Williams


Mu buryo bw’impurirane, inzego zose zifite uruhare rukomeye mu buzima bw’igihugu zubakiye i Gasabo, haba mu buyobozi, ubucamanza, umutekano, iterambere, ..., ariko aka karere kazicumbikiye zose ntikabasha kuzifatiraho icyitegererezo ngo kaze ku isonga, ahubwo kahisemo kuba Rushorerizindi.

Ese aho ntibyaba bihamanya na ya migani y’Abanyarwanda igira iti:

- Abaturiye iriba nibo barara amazi
- Kuba mu mazi siko guca amaga
- Kuba mu bibuba siko guhunika ibigega

N’iyindi?

UBUYOBOZI BUKURU BW’IGIHUGU

Perezidansi ya Repubulika

Ibiro by’ Umukuru w’ Igihugu biri mu Karere ka Gasabo. Bizwiho ubukerebutsi, gushishoza no kuyobora Abanyarwanda mu nzira igana iterambere rizabashyitsa ku idembe. Kuki akarere kabacumbikiye katabigiraho imiyoborere ihamye?

Ibiro bya Minisitiri w’Intebe

Ibiro by’Umukuru wa Guverinoma bibarizwa mu Karere ka Gasabo. Minisitiri w’Intebe ashinzwe guhuza ibikorwa bya Guverinoma, ibi ntiyabigeraho adafite gahunda ihamye n’ikurikiranabikorwa rishimitse. Kuki Gasabo icumbikiye Primature itayigiraho inama ku ihuzabikorwa rihamye?

Minisiteri hafi zose ziri i Gasabo

Havuyemo Minisiteri eshatu zonyine, izisigaye zose zikorera mu Karere ka Gasabo. Ese niba zibasha gukora igenamigambi zikarishyira mu bikorwa ku butaka bwose bw’igihugu, kuki Gasabo izicumbikiye itazifatiraho urugero ngo ubuso buto iriho bugire igenabikorwa nyaryo?

Ikigo cy’Igihugu cy’Imiyoborere/ RGB

Ikigo cy’igihugu cy’Imiyoborere (RGB) na Minisiteri gishamikiyeho (MINALOC) ari nayo ikuriye Akarere ka Gasabo, byombi bifite icyicaro muri aka Karere. Gasabo ibuzwa n’iki kubagisha inama ku miyoborere myiza, ku buryo abaturutse i Kantarange bayirusha kuyobora no kuyoboka?

UMUTEKANO N’UBUSUGIRE BW’IGIHUGU

Inzego zose zishinzwe umutekano n’ituze by’abenegihugu bishinze imizi mu Karere ka Gasabo.

Ibiro bikuru by’Ingabo z’Igihugu/ MINADEF

Etat-Major y’Ingabo z’u Rwanda na Minisiteri y’Ingabo bibarizwa mu Karere ka Gasabo. Ese ko ingabo zose mu gihugu n’iziri hanze yacyo (mu butumwa bw’akazi) zihabwa amabwiriza aturutse i Gasabo ku cyicaro gikuru cyazo kandi ntihabeho gusobanya, kuki Akarere katabegera ngo kababaze ibanga mpamyabikorwa bakoresha?

Icyicaro Gikuru cya Polisi y’Igihugu/ RNP

Umutekano w’Abanyarwanda wabamo icyuho gikomeye Polisi y’Igihugu (RNP) idahari. Kuba aho buri mupolisi uri ku butaka bw’u Rwanda akorera ku cyerekezo kiba cyatanzwe n’abamukuriye, ku rwego rwo hejuru bakaba babarizwa i Gasabo, habura iki ngo aka Karere kabigireho inozabikorwa?

UBUBASHA NSHINGAMATEGEKO

Inteko Ishinga Amategeko – Umutwe w’ Abadepite

Uru rwego rufite inshingano yo kwiga, kuvugurua no gushyiraho amategeko. Rufite icyicaro mu Karere ka Gasabo.

Inteko Ishinga Amategeko – Umutwe wa Sena

Uru rwego “Nkenguzamateka” rwunganira urw’ Abadepite mu gushishoza ibijyanye n’amategeko, no kuyanoza. Rugenzura kandi ibikorwa bya Leta ngo itava aho ita umurongo. Narwo rukorera i Gasabo.

UBUTABERA N’ UBUCAMANZA

Minisiteri y’Ubutabera

Iri mu Karere ka Gasabo. Ifite mu nshingano kubahiriza ireme ry’ubutabera nyabwo. Kuki Gasabo ihorana imanza zitabarika zidasobanutse, kandi ifite hafi abo yakagishije inama?

Urukiko Rukuru

Urukiko Rukuru ruri henshi mu gihugu. Ariko za manza z’icyitegererezo, za zindi amahanga yose ahanga amaso zibera mu Rukiko Rukuru ruherereye mu Karere ka Gasabo.

Urukiko rw’Ikirenga

Ni urwego rwa nyuma rwiyambazwa mu bijyanye n’imanza, zaba iza Gisivili cyangwa iza Gisirikare. Uru rwego rwubahwa na bose rukorera i Gasabo, kandi runoza inshingano rwahawe. Kuki akarere karucumbikiye katarwigiraho imikorere?

Ubushinjacyaha Bukuru

Ibiro by’Umushinjacyaha Mukuru biri i gasabo. Ni urwego rufatanya na Polisi y’igihugu n’izindi nzego mu gukurirkirana abanyabyaha no kubashyikiriza inkiko, hagamijwe ineza n’ituze bya rubanda. Ese Akarere ka Gasabo ntabwo kazi ko buri mu bwatsi bwako?

Ibiro by’Umuvunyi Mukuru

Urwego rw’ Umuvunyi Mukuru rugira uruhare mu bijyanye no gufahsa abantu kubona ubutabera bukwiye, muri gahunda yarwo yo kurwanya ruswa n’akarengane. Ese ko abaturage ba Gasabo barwiyambaza ku bwinshi ni uko baruturiye, cyangwa ni uko barushakiramo ibyo babuze mu Karere karucumbikiye?

ITERAMBERE N’UBUKUNGU

Ikigo cy’igihugu gishinzwe Iterambere (RDB)

Iki kigo gifite icyicaro muri Gasabo. Gikurikirana ibikorwa byose bifite aho bihurira n’iterambere ry’igihugu. Ese mu bafashwa gutera imbere, Gasabo iba yagannye he?

Ikigo cy’Igihugu Gishinzwe kwinjiza Imisoro n’Amahoro

Ni ikigo gifishe runini mu gusigasira ubukungu n’iterambere ry’igihugu, kuko amafaranga cyinjiza afatiye runini ingengo y’imari. Icyicaro cyacyo kiri i Gasabo.

Akarere gakungahaye ku mabuye y’ Agaciro

Mu mujyi wa Kigali wose, Akarere ka Gasabo niko kaza ku isonga mu kugira amabuye y’agaciro menshi mu butaka bwako. Muri Gasabo ni naho haboneka ibirombe byinshi bicukurwamo ayo mabuye, kurusha ahandi hasigaye muri Kigali. Ese uyu mutungo ufasha bingana iki mu kuzamura ubukungu bw’ abaturage bagize aka karere?

Akarere kanini muri Kigali

Gasabo niko Karere kanini kurusha utundi muri Kigali, ni nayo ituwe cyane kurusha utundi turere. Ifite amasambu menshi, ikagira ubutaka bugari kandi bwera, ese biyunganira iki mu bukungu n’iterambere?

Ahabarizwa amakaritsiye y’abaherwe

Akarere ka Gasabo niko gafite amakaritsiye yitwa ko ari ay’ abaherwe n’ abifite. Ahavugwa kenshi ni Nyarutarama, Kibagabaga, Gaculiro, agace ka Gisozi. Hari kandi benshi bibitseho ifaranga ritubutse batuye muri Kimironko ya Gasabo.

Amahoteli menshi muri Kigali

Amahoteli menshi mu Murwa Mukuru w’ u Rwanda abarizwa mu Karere ka Gasabo. Haboneka kandi amazu atagira ingano acumbikwamo.

AMATEKA N’UMUCO

Gasabo: Isoko-muzi y’ u Rwanda

Amateka agaragaza ko Gasabo ari yo nkomoko y’u Rwanda, niho rwavukiye, niho rwatangiriye kwanda (kwaguka). Niyo mpamvu n’ubu rucyitwa u Rwanda rwa Gasabo. Ibi bituma Gasabo ibonekamo bimwe mu bigabiro bya kera cyane, burya na rindi.

Kuba iyi Gasabo aho u Rwanda rushoye imizi iza iherekeje abandi mu iterambere, uwaba azirikana abakuru, uyu mukurambere yumvise iyi nkuru ntiwaba ukimuhembereye ngo umuneze, ntiwamucanira ngo yote, ntiwamusasira ngo asusuruke, ntiwamuganiriza ngo umugushe neza, ntiwamugusha neza ngo agororoke.

Ntora kwa Cyilima Rujugira

Umwami Cyilima Rujugira yatuye ku musozi wa Ntora (Gisozi y’ubu). Ni umwami wahinduye byinshi mu miyoborere y’u Rwanda, ku gihe cye nibwo hemejwe urukurikirane rw’ abami. Niwe kandi waciye iteka ryemeza Ikinyarwanda nk’ ururimi rw’ abenegihugu, ari nayo nkomoko y’Urunyacyilima, ururimi mwimerere Ikinyarwanda kivomaho (Nubwo magingo aya cyamaze kwangirika bikabije).

Kuba Gasabo iba iya nyuma, ni igitutsi ku Mwami Cyilima Rujugira waharambagije akahatura.

Inteko y’ Ururimi n’ Umuco

N’ubwo Ikinyarwanda cyangizwa kigatobatobwa nk’ urugo rutagira nyirarwo, Inteko y’Igihugu y’Ururimi n’Umuco iri i Gasabo, aho igihugu giteye inkingi.

IBINTU N’IBINDI

Iby’ i Gasabo ntibyarondorwa ngo tubiheze. Niho hari kandi...

Stade Nkuru y’Igihugu

Amahoro National Stadium: Yakira ibirori byose bikomeye mu gihugu, bityo Gasabo ikagira uruhare mu gususurutsa abaturarwanda n’abarugenda.

Ibitaro bikomeye mu Gihugu: King Faisal Hospital

Hari kandi...

Icyicaro gikuru cy’Inganda zigezweho

Icyicaro cy’ishyaka Riyoboye Igihugu

Icyicaro cy’Ihuriro ry’Imitwe ya Politiki yemewe mu Rwanda

N’ibindi, ...

Uko biri kose;

Nta mpamvu n’imwe yasobanura impamvu Akarere ka Gasabo kaba aka nyuma, ariko impamvu Gasabo yagombye kuba ku isonga zo zingana uburo buhuye.

Ese ubundi ko abakora neza bahabwa ibikombe, uwagaragaweho ubugwari we ntaba akwiye akeso k’ipfunwe?

Akarere ka Gasabo na Meya wako Willy Ndizeye (Photo:IREME))

Ese uturere dutatu Perezida Kagame yavuze ko twahisemo gutura inyuma (Gasabo, Rwamagana na Gatsibo), bene two ni ryari bazatura aka keso k’ipfunwe ngo gahabwe abandi?

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved