Kwamamaza

Akarere ka Nyanza kahaswe ibibazo ku ruhare rwako mu mushinga w’uruganda rw’ikigage

Yanditswe kuya 30-09-2016 saa 08:55' na Philbert Hagengimana


Kuba Akarere ka Nyanza karemeye kugura imigabane 100 ifite agaciro ka miliyoni 100 ariko kagatanga miliyoni 30 gusa mu mushinga wo kubaka uruganda rwenga ikigage, ni kimwe mu byo katumirijwe gusobanurira Komisiyo y’Abadepite ishinzwe kugenzura imikoreshereze y’imari n’umutungo bya Leta (PAC).

Nyuma y’ibiganiro mpaka hagati ya Minisiteri y’Ubutegetsi bw’Igihugu (MINALOC) na Minisiteri y’Imari n’Igenamigambi, uturere twemerewe gushora imari, tugura imigabane muri sosiyete runaka, ariko mu gihe kabishatse kakayisubiza ku isoko nk’uko byasobanuwe na Murenzi Abdallah wahoze ari Umuyobozi w’Akarere ka Nyanza.

Kuri icyo cyemezo, ni ho ako Karere kavanye uburenganzira bwo kugura imigabane 100 muri sosiyete SPIC, yari ihuriwemo n’uturere tw’Intara y’Amajyepfo igamije kubaka uruganda rwari kwenga ikigage.

Ubwo Umugenzuzi Mukuru w’Imari ya Leta yagenzuraga ako karere, yasanze kamaze kwishyura miliyoni 30 gusa muri izo ijana kemeye, ariko abajije inyandiko mvugo y’imbanzirizamushinga, ntibayimuha, bishyirwa muri raporo, maze ako karere gatumizwa na PAC ngo kabisobanure.

Umunyamabanga Nshingwabikorwa w’Akarere ka Nyanza w’agateganyo, Nkurunziza Enock, yasobanuye ko icyo kibazo cyatewe no kuba hari imishinga ikorerwa ku rwego rubakuriiye ariko ntibahabwe inyandko zibigaragaza.

Ati "Mu by’ukuri ni ikibazo cyari cyabayeho, kuko ibintu bikorerwa ku rwego rw’intara ntitugezweho izo nyandiko ku rwego rw’akarere ariko nyuma yo kubona ko ari ikibazo, twarakurikiranye kugira ngo tugire izo nyandiko natwe nk’abanyamuryango.”

Gusa ngo amafaranga agaragara ko yatanzwe muri uyu mushinga atagaragarizwa inyandiko y’imbanzirizamushinga, si umwihariko w’Akarere ka Nyanza kuko icyo kibazo gihuriweho n’uturere tw’Intara y’Amajyepfo, ari na cyo cyatumye Depite Nkusi agira amatsiko yo kumenya icyo ayo mafaranga yakusanyirijwe.

Kuba byarakozwe mu 2008 ubwo Akarere ka Nyanza kayoborwaga na Murenzi Abdallah, ni cyo cyatumye ari we uhabwa umwanya ngo abisobanure, maze agira ati “Ubundi uburyo umushinga wa SPIC watangiye, byari uburyo bwo guteza imbere ishoramari ku rwego rw’Intara, noneho uturere tuba abanyamigabane. Nk’Akarere ka Nyanza twemeye imigabane 100 ingana na miliyoni 100. Icyo gihe hari hari umushinga wo gukora ikigage mu Ntara y’Amajyepfo.”

Ibyo ngo byari mu rwego rwo kongerera agaciro umusaruro w’amasaka ahingwa na bake mu Ntara y’Amajyepfo dore ko atari no mu bihingwa byatoranyijwe guhingwa mu Karere ka Nyanza.

Murenzi yabwiye Abadepite ko icyo cyemezo cyo kwenga ikigage gikoze neza cyafashwe mu rwego rwo kurinda abaturage kujya banywa inzoga zitemewe nk’ibikwangari, Nyirantare n’ibindi kuko byangiza ubuzima bwabo bikanagira uruhare mu guhungabanya umutekano mu ngo.

Icyakora ngo inyigo yarakozwe, hakorwa ingendo shuri, ariko uburyo uwo mushinga wagiye ukererwa, byatumye utakaza agaciro ku rwego rw’Intara, uza kwegurirwa akarere ka Gisagara, ndetse ngo n’uruganda rwamaze kubakwa, hasigara hatekerezwa ikindi ayo mafaranga yakusanyijwe yakoreshwa.

Ubwo Akarere ka Gisagara kitabaga PAC ku wa 27 Nzeri, kari kayimurikiye umushinga wo kwenga urwagwa mu rwego rwo kongerera agaciro ibitoki, icyo kikaba cyateye abadepite urujijo, kuko ntaho bumvise havugwa umushinga w’ikigage.

Murenzi yakomeje avuga ko watangiye ari uw’ikigage, nyuma hazamo no kwenga urwagwa, bityo urwo ruganda rukaba rushobora kujya rubikora byombi.

Mu bindi Akarere ka Nyanza kagaragarijwe muri raporo y’umugenzuzi mukuru w’imari ya Leta y’umwaka wa 2014-2015, harimo kuzuza nabi ibitabo by’ibaruramari, aho hasobanuwe ko byaturukaga ku buryo bw’ikoranabuhanga byakorwagamo, icyakora ngo byagaragaye mu mwaka w’ingengo y’imari washize, ariko muri uyu ho ngo byarakosotse.

Ibi bibazo byaturutse mu bitabo by’icungamari, byatumye ako karere kagira ikinyuranyo cy’amafaranga y’u Rwanda asaga miliyoni ebyiri, cyari hagati y’ayo cyasoje umwaka w’ingengo y’imari muri Kamena 2014 gifite n’ayo katangiranye umwaka wakurikiyeho.

Ako karere ngo kinjije imisoro y’amafaranga asanga miliyoni 100 ariko hatagaragara aho yaturutse, ibi ngo bikaba byaratewe n’uko uwari ufite isoko ryo gusoresha atagaragaje agatabo byari bikubiyemo, ariko nyuma ngo yaje gushakishwa arabyerekana.

Ako karere kanafite ibibazo bishingiye ku masezerano kagiranye na ba rwiyemezamirimo, arimo ayo gushyira amatara ku mihanda, kubaka isoko ry’akarere, kugeza amazi meza ku baturage n’ibindi, aho ibyo bikorwa byadindiye bikabije, gusa ngo bimwe muri byo imirimo yabyo imaze kurangira ku kigero cya 90%, ukuyemo isoko ry’akarere riri ku kigero cyo hasi bitewe n’uko rwiyemezamirimo wari waritsindiye yaritaye ritarangiye.

Akarere ka Nyanza ubwo kaherukaga kugenzurwa, inama kagiriwe kazikurikije ku kigero cya 63%, kakaba kandi karanaje ku mwanya wa karindwi n’amanota 76.7% mu kwesa imihigo y’umwaka wa 2015-2016.

Meya Ntazinda Erasme (ibumoso) n'abo bari bajyanye mu Nteko basobanuriye abadepite byinshi ku makosa yagaragajwe n'umugenzuzi w'imari
Abadepite babajije akarere impamvu katagaragaje inyandiko z'imbanzirizamushinga ijyanye n'uruganda rwo kwenga ikigage

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved