Kwamamaza

Akarere ka Nyamagabe kashinjwe gusuzugura Ubugenzuzi bukuru bw’imari ya leta

Yanditswe kuya 12-10-2016 saa 06:27' na Philbert Hagengimana


Abadepite bagize PAC bashinje Akarere ka Nyamagabe gusuzugura ubugenzuzi bukuru bw’Imari ya Leta, bahita basaba Ubushinjacyaha ko bwanakurikirana bukareba niba nta cyihishe inyuma yo kudatanga amakuru mu igenzura ku bayobozi bashinzwe iby’imari muri ako Karere.

Kuri uyu wa 11 Ukwakira, Komisiyo y’Abadepite ishinzwe kugenzura imikoreshereze y’imari n’umutungo wa Leta, PAC, yakiriye Akarere ka Nyamagabe ngo gasobanure amakosa arimo ay’imicungire y’imari no kutubahiriza amategeko, yagaragajwe muri raporo y’Umugenzuzi Mukuru w’Imari ya Leta mu 2014/2015.

Itsinda ry’Abakozi b’Akarere ka Nyamagabe ryari rirangajwe imbere n’Umuyobozi w’Inama Njyanama, Ndahindurwa Fiacre wari kumwe na Philbert Mugisha, Umuyobozi w’Akarere ndetse na Nshimiyimana Jean Pierre, uyu akaba Umunyamabanga Nshingwabikorwa.

Akarere ka Nyamagabe, inama kagiriwe n’Umugenzuzi Mukuru w’Imari ya leta mu mwaka wa 2014/2015 kazishyize mu bikorwa ku kigero cya 28.6% gusa, ibi bikaba ari byo Komisiyo y’Abadepite ishinzwe gukurikirana imikoreshereze y’imari n’umutungo wa leta yabanje gusabira ibisobanuro abayobozi b’ako karere.

Philbert Mugisha, Umuyobozi w’Akarere yahise abwira Abadepite ko mu myaka yabanje bari bazishyize mu bikorwa ku kigero cyo hejuru, aho mu 2013/2014 zari zubahirijwe ku kigero cya 72%, ndetse ngo uhereye mu 2011, inama bagiriwe zavuye kuri 39 zikaba zari zigeze kuri 7, ibyo bikaba byagaragajwe nk’aho izari zisigaye zari zikomeye.

Icyakora zimwe mu mbogamizi uwo muyobozi yagaragaje kuri zimwe muri izo nama, ni nko kuba hari telefoni BRD yahaye abaturage ku nguzanyo, zikaba zaragombaga kwishyuzwa 100%.

Mugisha yagize ati “Aho rero ntabwo byatworoheye kubera ko twakoze isesengura tugasanga abagombaga kwishyura barimo ibyiciro bitandukanye, aho harimo n’abimutse batakiba no mu Karere n’abandi batakiriho.”

Nyuma y’ubusesenguzi bikagaragara ko harimo n’abatari bafite ubushobozi bwo kwishyura, Nyobozi yabigiyeho inama na Njyanama, ngo harebwe umurongo byashyirwamo maze ikibazo kigakemuka bya burundu.

Ikindi kibazo cyatumye bahabwa amanota make, ni icy’ubwisungane mu kwivuza (Mutuelle de Santé), n’ibindi Ubuyobozi bw’Akarere buvuga ko zari inama nke ariko zikomeye.

Ubujiji bw’abakozi cyangwa gusuzugura Ubugenzuzi bukuru bw’Imari ya Leta?

Nyuma yo kugaragaza ibibazo mu micungire y’imari no kumva ibisobanuro by’abayobozi b’Akarere ka Nyamagabe, Umugenzuzi Mukuru w’Imari ya Leta wungirije, Habimana Patrick, yabwiye Abadepite ko aka karere kagora abakozi b’uru rwego mu gutanga amakuru, avuga ko bishobora kuba ari na yo ntandaro y’amakosa bakora.

Habimana yakomeje agaragaza ko bigoranye kugenzura Nyamagabe bitewe n’uko abakozi bayo bananiza abagenzuzi, kugeza aho abagiyeyo batifuza gusubirayo kuko abakwiye kubaha amakuru babananiza mu kazi kabo kugera aho bavayo mu gicuku kandi hari n’ayo batahawe.

Yagize ati “Hari uturere duke turimo na Nyamagabe […] kugenzura biragoranye cyane, uyu munsi turi hano barabibasobanuriye ariko ejo wajyayo ugasanga byahindutse, dutanga inama gusa byo kuzitanga. Ubu nsigaye ngira ikibazo cyo kohereza abakozi i Nyamagabe, ikipe igiyeyo ntabwo yongera gusubirayo, kugira ngo ubone amakuru muri Nyamagabe ni ikibazo.”

Uyu mugenzuzi yavuze ko impapuro z’icungamari inzego zitanga muri Minisiteri y’Imari n’Igenamigambi bisa n’aho ari iz’agateganyo kuko iyo umugenzuzi agiyeyo bamubwira ko zitaraboneka, ibi bamwe mu Badepite bakaba babifashe nk’agasuzuguro, ndetse na Habimana arabishimangira.

Abadepite babajije Umuyobozi Mukuru mu bashinzwe Imari n’Igenaigambi (Chef Budget Officer) basanga ari Umunyamabanga Nshingwabikorwa Nshimiyimana Jean Pierre umaze imyaka umunani muri ako kazi, akaba akorana n’abandi bakozi bafite uburambe, maze batungurwa no kumva ko bima amakuru abo itegeko ribategeka kuyaha.

Umuyobozi w’Akarere ka Nyamagabe, Philbert Mugisha

Umuyobozi wa PAC, Depite Nkusi Juvénal, yahise yibutsa abayobozi ba Nyamagabe ko ingingo ya 7 mu Itegeko rishyiraho Ibiro by’Umugenzuzi Mukuru w’Imari ya leta, ivuga ko ibyo umugenzuzi asabye agomba kubihabwa, kuko iri tegeko rinakuraho ibanga ry’akazi, asoza yibaza “icyo ibyo bisobanuye”.

Depite Theogene Munyangeyo we yagize ati “Abantu bamaze imyaka umunani […], iyo umuntu adatanze amakuru haba harimo ubujiji cyangwa agasuzuguro […] ubu se tuba tubabaza iki? Umuntu muramugora ni we jisho ryacu ku baturage, nimutubwire aho bipfira, wasanga hari abafite ubujiji cyangwa se bakaba bafite impamvu babyimana.”

Aha ni ho Depite Nkusi yahise asaba uwari uhagarariye Ubushinjacyaha kumanuka bakagenzura neza bakareba niba nta cyihishe inyuma mu kwima inyandiko Umugenzuzi Mukuru w’Imari ya Leta.

Mu bindi Akarere ka Nyamagabe kabajijwe, ni ibirebana n’imanza katsinzwe kandi kakishyura akayabo, aho batsinzwe imanza eshatu kishyuyemo miliyoni hafi 15, Abadepite bakagaragaza ko byashobokaga ko kagirana ibiganiro n’abakareze kandi ibibazo bigakemuka hatiyambajwe inkiko.

Muri izo manza, katsinzwe ku rubanza rw’uwabakoreye imiyoboro y’amazi bakamwishyura iyo bashakaga, indi irenga ku yo bateganyaga bakanga kuyishyura, bituma rwiyemezamirimo yiyambaza inkiko maze zitegeka ko yishyurwa miliyoni zisaga 13.

Urundi rubanza ni urw’umuturage ako karere kahaye uburenganzira bwo gusarura ibiti 36 mu ishyamba, yagera ku cya 20 bakamuhagarika, maze na byo bigatezwa cyamunara. Uwo na we yarareze maze inkiko zitegeka ko yishyurwa amafaranga y’u Rwanda 400,000.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved