Kwamamaza

Akarere ka Kicukiro kasobanuriye Abadepite icyakikoreje akeso k’ipfunwe

Yanditswe kuya 5-10-2016 saa 08:23' na Philbert Hagengimana


Amafaranga Akarere kateganyaga kwinjiza ntikayabone, ni yo mpamvu nyamukuru Abayobozi ba Kicukiro babwiye Abadepite nk’iyatumye bava mu myanya y’icyubahiro bari bariho mu kwesa imihigo bakisanga mu myanya ya nyuma.

Akarere ka Kicukiro kari gasanzwe kajya mu nkera y’abahizi kagiye kwakira ibikombe, ariko muri uyu mwaka kahagarutse kaje kureba abamaze kugahiga.

Aho ni na ho haherereye imbumbe y’ibibazo byagaragajwe n’Umugenzuzi Mukuru w’Imari ya Leta muri Raporo ye y’Umwaka wa 2014/2015, ari na yo Komisiyo y’Inteko Ishinga Amategeko Umutwe w’Abadepite, ishinzwe kugenzura imicungire y’imari n’umutungo wa Leta, yagendeyeho itumiza ubuyobozi bw’ako Karere, ngo bwisobanure ku makosa yagaragajwe muri iyo raporo.

Ku isonga y’ibyasubije inyuma Akarere ka Kicukiro mu kwesa imihigo, ni ikibazo cy’ibura ry’amafaranga, ryaturutse ku buke bw’imisoro ako karere kinjije, aho kateganyaga miliyoni 600 ariko kakinjiza miliyoni 88 gusa.

Mu gusobanura icyo kinyuranyo hagati y’imisoro yari iteganyijwe n’iyinjijwe, Umuyobozi ushinzwe imari mu Karere ka Kicukiro yavuze ko icyo kinyuranyo cyaturutse ku kuba Ikigo cy’Imisoro n’Amahoro (RRA) cyarasoresheje, amafaranga cyakiriye kikaza kuyohereza nk’ikigo cya Leta cyoherereje ikindi, ibyo bite “Transfer”.

Ibyo kandi byiyongereyeho abaturage bagiye binangira kwishyura imisoro, ibyo bikaba byaratumye ako Karere kabura amafaranga yo kwishyura ba rwiyemezamirimo bari baragiranye amasezerano atandukanye kandi ashingiye ku bikorwa remezo.

Umuyobozi w’ako Karere, Dr Nyirahabimana Jeanne, yabwiye Abadepite ko kubura amafaranga byatumye imishinga myinshi idindira, bityo ibyo ako karere kari karahize ntikabasha kubigeraho.

Dr.Nyirahabimana yagize ati “Ingorane z’amafaranga zituma ibintu byinshi bidindira. Isoko rya Kigarama ryadindiye kimwe n’irya Kicukiro, Pariki y’Inganda irimo kwimurwa, aho ni hamwe mu ho twakuraga amafaranga ariko tutakiyabonera.”

Yakomeje agaragaza ko ako karere gatuwe n’abaturage benshi ariko hakaba nta bikorwa by’ubushabitsi byinshi bihakorerwa, ari nayo mpamvu amafaranga kinjiza hafi ya yose ari aturuka mu misoro y’ubukode bw’ubutaka.

Akarere ka Kicukiro ni ko kari gasanzwe kikusanyiriza imisoro, ariko RRA izamo ngo ijye iyikusanya, ari na yo mpamvu imirimo y’ibanze yagombaga gukorwa yatumye hazamo ubukererwe, ariko ngo hari ingamba nk’uko Dr.Nyirahabimana yabitangarije IGIHE.

Yagize ati “Nk’uko nabivuze, Kicukiro ni akerere gatuwe cyane, bityo imisoro myinshi ni iy’ubukode bw’ubutaka. RRA yaje nk’urwego ruje kudufasha gukusanya iyo misoro, iza ifite uburyo igomba kubanza kubikora ikabishyira muri ‘Systeme’ (ikoranabuhanga), biza kugaragara ko intego twari twihaye tutabashije kuyigeraho, kandi ayo mafaranga iyo atugezeho kare ni yo atuma dukora ibikorwa kare.”

“Ubu rero ingamba twafashe, ni izo gufasha RRA, tukabatiza imbaraga kugira ngo tugende urugo ku rundi, inzu ku yindi, kandi ndabona kuva aho tubitangiriye biri gutanga umusaruro, ndabona hari icyizere cy’uko uyu mwaka tuzinjiza amafaranga neza.”

Isoko rya Kigaragama ryajemo amananiza

Abadepite bahase ibibazo Akarere ku bijyanye n’isoko rya Kigarama ryadindiye bikabije, aho rimaze imyaka ine abaturage baritegereje ngo babone aho bakorera, ariko kugeza ubu rikaba ari igihuru, inzu bari basanzwe bacururizamo zikaba zikinze mu gihe basigaye bacururiza mu manegeka.

Rukebanuka Adalbert, Umunyamabanga Nshingwabikorwa w’Akarere ka Kicukiro yabwiye Abadepite ko ubutaka bugomba kubakwaho iryo soko babuhaye rwiyemezamirimo ngo aryubake mu buryo bugezweho, agatangira imirimo ariko yagera hagati akavuga ko yabuze amafaranga yo gukomeza, kugeza ubwo ubwe yazanye ibyangombwa by’ubwo butaka akabusubiza Akarere.

Yakomeje avuga ko bahise babusubiza ku isoko ngo bashake undi babuha, ariko wa wundi wa mbere aritambika kugira ngo abanze asubizwe amafaranga y’ibikorwa yari amaze gushyiramo.

Abadepite mu gushaka kumenya icyatumye bidakorwa, Umuyobozi w’Akarere Dr.Nyirahabimana yasobanuye ko uwo mushoramari yari yageneye ibikorwa bye agaciro ka miliyoni zisaga 900 mu gihe bo bakoze igenagaciro bagasanga bitageze no kuri miliyoni 180.

Ibyo byakuruye impaka, bituma Urwego rw’Umuvunyi rubagira inama yo gushaka Umugenagaciro wigenga, ubu akaba arimo gukora imirimo ye, ndetse ngo yabijeje ko muri iki Cyumweru aza kuba yarangije imirimo ye.

Imishinga yaradindiye hakibazwa ukwiye kuryozwa igihombo yateje

Ibiro by’Umurenge wa Gahanga n’inzu mberabyombi y’Akarere ka Kicukiro, hakiyongeraho isoko rya Kicukiro n’irya Kigarama, ni imwe mu mishinga Abadepite bagarutseho yadindiye, aho Nkusi Juvenal, Umuyobozi wa PAC yanabajije ati “igihombo kizaryozwa nde?”

Ku kibazo cy’ibiro by’Umurenge wa Gahanga byadindiye amezi ane , Paul Jules Ndamage wahoze ayobora Akarere ka Kicukiro yabwiye Abadepite ko uwo Murenge wubakirwaga ibiro bishya usanzwe ufite ibindi ukoreramo, ku buryo nta serivise yagombaga kuwutangirwamo itaratanzwe, bityo bikaba nta gihombo byateje n’ubwo wari uri gukorera mu kibanza kizubakwamo sitade.

Ubuyobozi bw’Akarere ka Kicukiro bwabwiye Abadepite ko ibyo biro by’Umurenge byuzuye ndetse byanatashywe ku mugaragaro, iyo nzu mberabyombi y’akarere nay o ngo yaruzuye ndetse ubu irakodeshwa ikinjiza amafaranga.

Abadepite basabye Akarere ka Kicukiro gukosora amakosa mu icungamari, ayo mu ikusanya ry’imisoro ndetse n’imishinga idindira.

Umuyobozi w’Akarere ka Kicukiro, Dr. Nyirahabimana Jeanne

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 29 Ugushyingo 2016
Copyright © 2009 -2014 - IGIHE Ltd - All Rights Reserved