00:00:00 IGIHE NETWORK KN KINYARWANDA EN ENGLISH FR FRANCAIS

Akanyamuneza ku bacuruzi b’Iburengerazuba bongeye gukirigita ifaranga

Yanditswe na Nsanzimana Erneste
Kuya 12 Ugushyingo 2021 saa 08:48
Yasuwe :
0 0

Ubuzima buri kugaruka nyuma y’icyorezo cya Covid-19 cyazahaje ibikorwa by’ubucuruzi, cyane cyane ibishamikiye ku myidagaduro ndetse n’ibirori.

Mu bikorwa byahagaritswe igihe kirekire harimo utubari ndetse n’imihango yagutse y’ubukwe, busanzwe ari isoko ikomeye y’amafaranga ku bantu bakora ubucuruzi burimo kwakira abashyitsi, kwambika abageni n’ibindi nk’ibyo.

Kampire Claudine, umugore wo mu karere ka Rutsiro ukora ubucuruzi bwo kwambika abageni no gutegura ibirori, avuga ko Guma mu Rugo yagize ingaruka zikomeye ku bushabitsi bwe, gusa ngo ubuzima buri kugaruka nubwo bitaramera neza nka mbere.

Yagize ati “Muri Guma mu Rugo twarahombye cyane, nkanjye ukora ibijyanye no kurimbisha ahabera ibirori (decoration), ubucuruzi bwanjye bwari bwarahagaze, ariko ubu nyuma y’aho bafunguye turabona biri kugenda biza. Gusa ubu imbogamizi ni uko tujya gushaka ibikoresho tugasanga byarahenze, bakatubwira ko impamvu ari uko imipaka ifunze. Mbere ya Guma mu Rugo twabonaga abakiliya benshi, ntabwo naburaga ibihumbi 500 Frw ku kwezi nahembye n’abakozi, ariko ubu tubona make, iyo mbonye n’ibihumbi 200 Frw ku kwezi mbishimira Imana.”

Umutoni Sandrine, ukora mu kabari gaherereye mu murenge wa Rubengera mu karere ka Karongi, avuga ko muri Guma mu Rugo bahuye n’ubuzima bugoye cyane, gusa ngo ubu barashima Leta kuko ibikorwa by’ikingira biri gutuma ubuzima burushaho kugaruka mu gihugu.

Yagize ati “Muri Guma mu Rugo twahuye n’ubuzima bubi, turakubitika, tubura ibyo kurya, amafaranga yarabuze, akazi karabuze. Twarishimye cyane twumvise ko bakomoreye utubari. Ubu biri kugenda neza nubwo bitarasubira ku murongo neza nk’uko byahoze”.

Umutoni avuga ko nubwo utubari twafunguwe, batarongera kubona abakiliya nk’abo babonaga mbere ya Covid-19. Ati “Nkeka ko kuba tutabona abakiliya nk’abo twabonaga mbere, ari uko Guma mu Rugo yatumye abantu bose muri rusange bakena. Mbere sinashoboraga kubura nk’ibihumbi 180 Frw ku kwezi, ubariyemo umushahara n’uduhimbazamusyi (tips), ubu ntabwo ndenza ibihumbi 70 Frw ku kwezi iyo byagenze neza. Gusa nubwo amafaranga ari make nibura mbona uko nohereza umwana ku ishuri, nkanabona icyo arya.”

Kugeza ubu, ingamba zo kwirinda icyorezo cya Covid-19 ziracyahari mu bice bimwe na bimwe by’igihugu, ariko ibikorwa by’ubucuruzi byinshi byarakomorewe, nubwo bigisabwa kubahiriza ingamba zo kwirinda Covid-19.

Mu gihe abarenga miliyoni enye bamaze guhabwa nibura doze ya mbere y’urukingo rwa Covid-19, hari icyizere ko mu gihe u Rwanda rwakomereza kuri uyu muvuduko, rushobora guhashya iki cyorezo burundu, ibikorwa by’ubucuruzi bigakomeza mu buryo bwari busanzwe.

Ibikorwa by'ubucuruzi birimo utubari biri gukomorerwa mu gihe ibikorwa by'ikingira biri kwiyongera mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .