00:00:00 IGIHE NETWORK KN KINYARWANDA EN ENGLISH FR FRANCAIS

Ahazaza ha FDLR mu mboni za Gen James Kabarebe

Yanditswe na Iradukunda Serge
Kuya 19 Nyakanga 2021 saa 07:13
Yasuwe :
0 0

Umujyanama wa Perezida Paul Kagame mu by’Umutekano, Gen James Kabarebe yavuze ko Umutwe w’iterabwoba wa FDLR wamaze igihe kinini urwanya Leta y’u Rwanda uri mu minsi yawo ya nyuma.

Imyaka irenga 25 irihiritse amashyamba yo mu Burasirazuba bwa DRC ari indiri y’imitwe yitwaje intwaro irimo n’irwanya u Rwanda nka FDLR yiganjemo abasize bakoze jenoside yakorewe abatutsi bagahungira muri icyo gihugu.

Kuva muri Mutarama 2019, ibintu byatangiye guhinduka ubwo Antoine Felix Tshisekedi yajyaga ku butegetsi asimbuye Joseph Kabila Kabange.

Guhashya imitwe yose yitwaje intwaro ikorera mu mashyamba yo mu Burasirazuba bwa Repubulika Iharanira Demokarasi ya Congo, byabaye umwe mu mihigo y’ibanze ya Perezida Tshisekedi utarahwemye kuvuga ko iyo mitwe ntacyo irwanira uretse kubuza amahoro abaturage b’igihugu cye n’akarere muri rusange.

Perezida Tshisekedi yatangaje ibi nyuma y’igihe gito ingabo z’igihugu cye,FARDC zitangiye ibikorwa bya gisirikare byo gusenya iyo mitwe hakoreshejwe imbaraga za gisirikare ariko nanone abemeye kwitandukanya na yo bakakirwa bagashyikirizwa ibihugu byabo.

Uko ni ko imitwe irwanya u Rwanda irimo FDLR, RUD-Urunana, FLN, RNC n’indi yakijweho umuriro na FARDC maze bamwe mu barwanyi bayo babarirwa mu magana bagafatwa mpiri abandi bakahasiga ubuzima.

Umutwe w’iterabwoba wa FDLR na wo washegeshwe bikomeye n’ibitero bya FARDC ndetse muri Nzeri 2019 Gen Mudacumura wari umuyobozi wawo ahasiga ubuzima. Ibi byakurikiwe no gutakaza uduce twinshi iyi mitwe yagenzuraga.

Mu batawe muri yombi bagashyikirizwa u Rwanda harimo na Nizeyimana Marc wari mu mutwe wa FLN, wemeza ko n’uwari umuyobozi w’uwo mutwe Lt. Gen. Irategeka Wilson yaguye mu bitero by’ingabo za FARDC ari kumwe n’abandi basirikare bakuru bawo.

Iri mu minsi ya nyuma

Mu kiganiro yagiranye n’itsinda ry’urubyiruko rw’Abanyarwanda ruba mu mahanga mu ntangiriro z’uku kwezi, Gen James Kabarebe yavuze ko FDLR iri mu minsi ya nyuma ku buryo nta bushobozi igifite bwo guhungabanya umutekano w’u Rwanda.

Gen James Kabarebe yatangiye asobanurira uru rubyiruko amavu n’amavuko ya FDLR ababwira n’uko yabanje kwitwa ALIR.

Ati “Ingabo zakoze Jenoside hano zimukiye mu gihugu cy’abaturanyi cya Zaire, ni muri Repubulika Iharanira Demokarasi ya Congo y’uyu munsi; bakoze umutwe witwa ALIR. Ubwo watangazwaga nk’umutwe w’iterabwoba bahinduye izina bajya kuri FDLR. Ni umutwe wagiye ugaba ibitero ku Rwanda kuva mu 1996, 1997 kugeza mu 2001.”

Yavuze ko kubera politiki y’ivangura abagize FDLR baje kwicamo ibice bagendeye ku ho bakomoka.

Ati “Uyu mutwe w’ingabo zakoze Jenoside ufite ibirindiro mu Burasirazuba bwa Repubulika Iharanira Demokarasi ya Congo. Nyuma y’igihe kubera politiki yabo y’amacakubiri biciyemo ibice bibiri bashingiye ku ho bakomoka abatekereza ko baca mu majyaruguru y’u Rwanda biyita abakiga bagumye ari FDLR, bariya bumva ko bakomoka mu majyepfo y’u Rwanda biyita abanyenduga bayobowe na Rusesabagina na Wilson Irategeka bimukiye mu majyepfo ya Kivu banyuze mu Burundi batera u Rwanda babinyujije muri Nyungwe.”

Yakomeje avuga ko abagize igice FDLR cyagannye mu majyepfo ya Kivu aribo bagize uruhare mu bitero byagabwe ku Rwanda binyuze mu ishyamba rya Nyungwe.

Ati “Politiki yabo y’amacakubiri bamaranye igihe yabinjiyemo baritandukanya bashingiye ku byo bakeka ko bibatandukanya. Abaturutse i Burundi bagiye batera u Rwanda banyuze muri Nyungwe ariko igice cyabo kinini cyagumye muri Congo cyararwanyijwe ndetse gitsindwa n’Ingabo za Congo abagera muri 330 barabadushyikirije, abake muri bo babashije kwambuka bajya i Burundi batangira kugaba ibitero banyuze mu Ishyamba rya Nyungwe.”

Gen Kabarebe yavuze ko muri iyi minsi ingabo z’u Burundi na zo zahagurukiye kurwanya abagize uyu mutwe, yemeza ko ari ryo herezo ryabo.

Ati “Uko iminsi yagiye ishira bagiye bacibwa intege ndetse vuba aha Ingabo z’u Burundi zagiye zibagabaho ibitero ndetse zikabafata, ku bw’ibyo dushobora kuvuga ko bari mu minsi yabo ya nyuma, ni cyo nshobora kuvuga; bari mu minsi ya nyuma kubera ko abasirikare babo bari muri Kivu y’Amajyepfo baratsinzwe, abarokotse barabadushyikirije bari hano mu kigo cya Mutobo.”

“Abacitse bakajya mu Burundi batsinzwe n’Ingabo z’u Rwanda muri Nyungwe basubira mu Burundi, Ingabo z’u Burundi ubwazo na zo zatangiye kubahiga kugeza n’uyu munsi. Bari mu minsi yabo ya nyuma yo kubaho.”

Gen James Kabarebe yavuze ko FDLR iri mu minsi yayo ya nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .