Kwamamaza

Agakeregeshwa wasigarana kuri Rwanda Day

Yanditswe kuya 19-09-2016 saa 09:50' na Cyprien Niyomwungeri


Kuva mu 2010 Abanyarwanda baba mu gihugu no mu mahanga, kimwe n’inshuti z’u Rwanda bagena igihe bagahura bakaganira ku cyarushaho guteza imbere igihugu, abamaze igihe kitari gito batakigeramo bakamarwa amatsiko babwirwa aho kigeze, bityo buri wese agasuzumira hamwe n’abandi uruhare rwe mu iterambere ryacyo.

Uyu muhuro uzwi nka Rwanda Day, ni umwanya Abanyarwanda babona impinduka zabaye mu bihugu baba bagiyemo zikabafasha nabo guhindura imitekerereze mu bijyanye no gukora ibikorwa by’ iterambere, bakumva ko nubwo waba uri mu Rwanda ushobora gukora ibintu bigahindura igihugu kikaba nk’uko ibihugu byateye imbere bimeze.

Ubu wanabaye umwanya mwiza wo kwagura ishoramari ryaba iry’abanyamahanga baza mu gihugu cyangwa Abanyarwanda bajya kuyishora hanze, kuko kuri gahunda igenga uyu munsi abacuruzi bahura bakanaganira.

Abitabiriye uwo munsi bahabwa umwanya wo kubaza ibibazo Umukuru w’Igihugu, gutanga ibitekerezo n’ibyifuzo. Bituma benshi batarya indimi bakavuga uko babona iterambere u Rwanda rumaze kugeraho n’ibyakomeza gukorwa ngo risugire.

Urugero muri Rwanda Day yabereye i Atlanta, Rwigema Pierre Celestin wigeze kuba Minisitiri w’Intebe w’u Rwanda mu 1995-2000, yavuze amagambo akomeye ku bakwirakwiza ibinyoma ku Rwanda.

Yagize ati “Nagirango mbwire Abanyarwanda bari hanze mbahe ubutumwa, iyo mvuze Abanyarwanda bari hanze ndavuga abadashyigikiye gahunda ya Leta, mbasabe gushyira ubwenge ku gihe, mbasabe ko bakwiye kwirinda ibinyoma kuko burya umuvuduko w’ikinyoma ukwira ku Isi igihe ukuri kugifunga imishumi y’inkweto ngo gutambuke.”

“Ndagira inama ababa bibeshya cyangwa se babeshywa ko bashobora gutaha barwana, bibeshya ko bafite ingabo bashobora kuzatera u Rwanda, ko ibyo bintu bitagishoboka muri iki gihe, ko u Rwanda aho rugeze uwakwibeshya yakubitwa rwose.”

Umwe mu nshuti z’u Rwanda zitabiriye Rwanda Day i Paris, Umma Dajara wo muri Benin, abikuye ku mutima yasabye Abanyarwanda kubyaza umusaruro amahirwe bafite yo kuyoborwa na Perezida Kagame.

Yagize ati“Nk’umugore, nakozwe ku mutima na politiki yawe yo guha abagore umwanya mu nzego zifata ibyemezo, ibikorwa byanyu ni byinshi sinabivuga ngo mbirangize, niyo mpamvu nteruye mbwira iyi mbaga iri hano nti ‘mwebwe mufite amahirwe yo kugira Kagame nka Perezida, mubibyaze umusaruro kuko hariho benshi banyotewe umuntu nkawe.”

Mamadou wo muri Guinea wari witabiriye Rwanda Day i Londres, yasabye Perezida Kagame ko ibitangaza yakoze mu Rwanda yajya kubisangiza abayobozi bo muri Guinea.

Yagize ati “Ntekereza ko ibyabaye mu Rwanda ari igitekerezo cyiza cyo kureberaho, mwakemera gutwara ibyabaye mu Rwanda ku bayobozi n’abaturage bo muri Guinea kugira ngo babyigireho?”

Umwihariko wa Rwanda Day 2016

Rwanda Day y’uyu mwaka izaba kuwa 24 Nzeri ibere mu Mujyi wa San Francisco muri Leta ya California, imwe muri 50 zigize Leta Zunze Ubumwe za Amerika.

Uyu mwaka yahawe izina ryihariye ‘Rwanda Cultural Day’ hagamijwe kurushaho kwita ku muco Nyarwanda no kuwukundisha abatawuzi. Ufite insanganyamatsiko igira iti “Agaciro: Umurange wo kwiyubaha’.

Muri Rwanda Day 2016, Abanyarwanda n’inshuti zabo bazibutswa uburyo umuco Nyarwanda ari isoko ya byinshi n’inkingi mwikorezi mu kubaka igihugu. Hazaganirwa uko u Rwanda rwabashije kwishakamo ibisubizo rugendeye ku muco gakondo n’uburyo byafashije igihugu gukemura ibibazo.

Indangagaciro z’ubumwe n’ubwiyunge n’uburyo umuco wagira uruhare mu kugabanya ubukene no kwimakaza imiyoborere myiza bizagarukwaho muri Rwanda Day y’uyu mwaka.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved