AfDB igiye kongera ishoramari mu guteza imbere ubwikorezi bw’indege muri Afurika

Yanditswe na Rabbi Malo Umucunguzi
Kuya 24 Ugushyingo 2017 saa 08:50
Yasuwe :
0 0

Umuryango mpuzamahanga w’Ibigo by’Ubwikorezi bw’Indege (IATA) na Banki Nyafurika Itsura Amajyambere (AfDB), bashyize umukono ku masezerano agiye kubaka ubufatanye bugamije kuzamura urwego rw’ubwikorezi bw’indege muri Afurika.

Ayo masezerano yashyizweho umukono mu ntangiro z’iki Cyumweru, i Abuja muri Nigeria, ahaberaga inama y’Ihuriro Mpuzamahanga ry’Ibigo Bigenzura imikorere y’indege (ICAO), hagati y’Umuyobozi wa IATA, Alexandre de Juniac n’uwa AfDB, Dr Akinwumi Adesina.

Urwego rw’indege rubarwa ko rwinjiza mu bukungu bw’uyu mugabane agera kuri miliyari $72.5, rugatanga imirimo miliyoni 6.8, abahabwa akazi kubera ibikorwa by’indege bakaba ku mpuzandengo y’abantu 130 000 ku gihugu.

Nk’uko bigaragara mu itangazo AfDB yashyize ahagaragara, de Juniac yagize ati “Ibi biratanga amahirwe afatika. Ariko kubigeraho ntabwo bizikora, hagomba ubufatanye buhagije. Aya masezerano na AfDB azafasha mu guteza imbere urwego rw’indege muri Afurika. Mu kubikora, bizongera ubukungu binahindure ubuzima bw’abaturage mu bihugu 54 bigize uyu mugabane.”

Muri ayo masezerano, ibyo bigo byombi bizafatanya mu kubaka imikorere y’urwego rw’indege, gushyiraho gahunda n’imishinga yihariye irimo kubaka ubushobozi, kongera ibyerekezo by’ingendo z’indege, umutekano n’ibikorwaremezo indege zikenera.

Dr Adesina we yagize ati “Urwego rw’indege ni ingenzi cyane kuko rufungurira amarembo abashoramari. Abantu bake cyane usanga aribo bashobora gushora imari ahantu bigoye kugera. Niyo mpamvu koroshya ingendo z’indege bihita bigira ingaruka nziza ku bukungu.”

“Tugomba kuzamura urwego rw’indege muri aka karere kandi tukagabanya ibiciro, tukazamura imikorere kandi tukongera n’ibyerekezo.”

Yasabye ko ibihugu bifungurirana amarembo kugira ngo indege zibashe gutambuka mu mudendezo kandi zikorere inyungu ifatika, ibyo bikazatuma ibihugu by’uyu mugabane byubaka ubukungu buhamye.

AfDB nibura mu myaka icumi ishize yashoye hafi miliyari imwe y’amadolari ya Amerika mu kwagura aho indege zigwa ku bibuga, kimwe n’irindi shoramari ryagiye rishyirwa mu kugura indege nshya.

Ifite n’umushinga urimo impano zigamije kubaka ubushobozi n’ikoranabuhanga ku bihugu 25 n’ibibuga by’indege 69, hagamijwe ko umubare w’ibibuga by’indege byujuje amabwiriza mpuzamahanga y’umutekano biva kuri 3 bikagera kuri 20 bitarenze umwaka wa 2019.

Mu myaka 20 iri imbere, byitezwe ko uru rwego rugomba kuzamuka ku gipimo cya 6% buri mwaka. Bibarwa ko indege muri Afurika zatwaye abagenzi miliyoni 120 mu 2015, uyu mubare ukaba ushobora kuzaba wikubye gatatu ukagera muri miliyoni 300 kugeza mu 2035.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza